சிபிஎஸ்இ (CBSE) நடத்தும் 12ஆம் வகுப்பு கணிதத் தேர்வு கேள்வித்தாளில் இருந்த QR குறியீடு குறித்து சமூக வலைதளங்களில் வெளியாகி பரபரப்பை ஏற்படுத்தியது.. 12ஆம் வகுப்பு கணிதம் மற்றும் பயன்பாட்டு கணிதம் தேர்வுகள் காலை 10.30 மணி முதல் மதியம் 1.30 மணி வரை நடைபெற்றன.
தேர்வு கேள்வித்தாளின் மேல் இடது மூலையில் அச்சிடப்பட்டிருந்த QR குறியீட்டை ஸ்கேன் செய்தால், அது ஒரு இசை வீடியோவுக்கு செல்கிறது என்று சமூக வலைதளங்களில் சிலர் கூறினர். அந்த கேள்வித்தாளின் படங்கள் இணையத்தில் பரவலாக பகிரப்பட்டன. மேலும் அந்த QR குறியீட்டை ஸ்கேன் செய்து பார்க்கும்படி பலரும் மற்றவர்களை ஊக்குவித்தனர்.
சிபிஎஸ்இ 2018ஆம் ஆண்டில் இருந்து கேள்வித்தாள்களில் QR குறியீட்டை பயன்படுத்தத் தொடங்கியது. இது கேள்வித்தாள் கசிவைத் தடுக்கும் பாதுகாப்பு நடவடிக்கையாக அறிமுகப்படுத்தப்பட்டது.
சமூக வலைதளங்களில் பரவி வரும் தகவல்களின்படி, அந்த QR குறியீட்டை ஸ்கேன் செய்தால் 1987ஆம் ஆண்டு வெளியான Never Gonna Give You Up என்ற பாடலின் வீடியோ திறக்கிறது என கூறப்படுகிறது. இந்த பாடலை பாடியவர் ரிக் அஸ்ட்லி.
இந்த பாடல் இணையத்தில் “Rickroll” எனப்படும் பிரபலமான மீமாக (meme) அறியப்படுகிறது. 2000களின் நடுப்பகுதியில் இருந்து இணையத்தில் ஒருவரை ஏமாற்றும் வகையில் எதிர்பாராத விதமாக இந்த பாடல் வீடியோவிற்கு மாற்றும் நகைச்சுவை நடைமுறையாக இது பயன்படுத்தப்படுகிறது. மேலும் சமூக வலைதளங்களில் பகிரப்பட்ட ஒரு வீடியோவில், ஒரு மாணவர் அந்த QR குறியீட்டை ஸ்கேன் செய்து காட்ட, பின்னர் அந்த பாடல் ஒலிப்பதும் காணப்படுகிறது.
ஆனால் இந்த விவகாரம் குறித்து சிபிஎஸ்இ இதுவரை எந்த அதிகாரப்பூர்வ விளக்கத்தையும் வெளியிடவில்லை. 12ஆம் வகுப்பு பொதுத்தேர்வுகள் பிப்ரவரி 17ஆம் தேதி தொடங்கியுள்ளன. அவை ஏப்ரல் 10ஆம் தேதி நிறைவடைய உள்ளன என்பது குறிப்பிடத்தக்கது..
