இந்தியா மற்றும் ஐரோப்பிய யூனியன் (EU) இடையே மிகப் பெரிய தடையற்ற வர்த்தக ஒப்பந்தம் (FTA) கையெழுத்தானது.. இதனால் ஐரோப்பாவிலிருந்து இந்தியாவுக்கு வரும் பொருட்களில் கிட்டத்தட்ட 97 சதவீதத்திற்கு விதிக்கப்படும் சுங்க வரிகளை குறைக்கவோ அல்லது முற்றிலும் நீக்கவோ முடியும். இதனால், விவசாயம், கார் உற்பத்தி போன்ற பல துறைகளில் உள்ள பொருட்கள் இந்தியர்களுக்கு எதிர்காலத்தில் மலிவாக கிடைக்க வாய்ப்பு உள்ளது.
இந்த ஒப்பந்தத்தின் கீழ், ஐரோப்பிய ஒன்றிய பொருட்களின் 96.6 சதவீத ஏற்றுமதிகளுக்கு விதிக்கப்படும் சுங்க வரிகள் நீக்கப்படவோ அல்லது குறைக்கப்படவோ செய்யப்படும். இதன் கையெழுத்தை பிரதமர் நரேந்திர மோடி செவ்வாய்க்கிழமை முதன்முறையாக அறிவித்தார். இந்த நடவடிக்கையால், ஐரோப்பிய பொருட்களுக்கான சுங்கச் செலவில் ஆண்டுக்கு அதிகபட்சமாக €4 பில்லியன் (யூரோ) வரை சேமிக்க முடியும் என தெரிவிக்கப்பட்டுள்ளது.
இந்த வர்த்தக ஒப்பந்தம் – “இதுவரை EU மற்றும் இந்தியா இணைந்து மேற்கொண்ட மிகப்பெரிய ஒப்பந்தம்” என்று வர்ணிக்கப்படுகிறது. இதன் மூலம், சாக்லேட், வைன், கார்கள் போன்ற EU ஏற்றுமதி பொருட்களின் சுங்க வரி, தற்போது உள்ள 50 முதல் 150 சதவீத அளவிலிருந்து, படிப்படியாக 0 முதல் 20 சதவீதம் வரை குறைக்கப்படும்.
உலகின் இரண்டு பெரிய ஜனநாயக நாடுகளான இந்தியா மற்றும் EU இடையேயான பொருளாதார மற்றும் அரசியல் உறவுகளை இந்த ஒப்பந்தம் மேலும் வலுப்படுத்தும் என ஐரோப்பிய ஒன்றியம் தெரிவித்துள்ளது. “உயரும் புவியியல் அரசியல் பதற்றங்கள் மற்றும் உலகளாவிய பொருளாதார சவால்கள்” நிலவும் காலகட்டத்தில், இந்த உடன்பாடு மிகவும் முக்கியமானதாக பார்க்கப்படுகிறது.
27 உறுப்புநாடுகளை கொண்ட ஐரோப்பிய யூனியன் அமைப்பு, இந்த ஒப்பந்தம் மூலம் சுங்க வரிகளும் நிர்வாக சுமைகளும் குறைக்கப்படுவதால், வர்த்தகம் மேலும் எளிதாகவும், மலிவாகவும், வேகமாகவும் நடைபெறும் என்று கூறியுள்ளது.
இந்த வர்த்தக ஒப்பந்தம் கையெழுத்தானதை அறிவித்த பிரதமர் நரேந்திர மோடி, இது இந்தியா மற்றும் ஐரோப்பாவில் உள்ள மக்களுக்கு பெரிய வாய்ப்புகளை உருவாக்கும் என்று கூறினார். “இது உலகின் இரண்டு பெரிய பொருளாதாரங்களுக்கிடையேயான கூட்டாண்மைக்கு சிறந்த உதாரணம். இந்த ஒப்பந்தம் உலக மொத்த உள்நாட்டு உற்பத்தி (GDP)யில் 25 சதவீதத்தையும், உலக வர்த்தகத்தில் மூன்றில் ஒரு பங்கையும் பிரதிநிதித்துவப்படுத்துகிறது,” என்று அவர் தெரிவித்தார்.
ஐரோப்பிய யூனியன் கமிஷன் தலைவர் உர்சுலா வான் டெர் லெயன், இந்த ஒப்பந்தத்தை “அனைத்து ஒப்பந்தங்களுக்கும் தாய்” (mother of all trade agreements) என்று புகழ்ந்து, “இன்று வரலாறு உருவாக்கப்பட்டுள்ளது” என்று கூறினார்.
வரி குறைப்பைப் பெறும் ஐரோப்பிய ஒன்றியத்தின் தொழில்துறைப் பொருட்களின் முழு பட்டியல்.
| பொருள் (Product) | தற்போதைய வரி (%) | எதிர்கால வரி (%) |
|---|---|---|
| இயந்திரங்கள் மற்றும் மின்சாதனங்கள் | அதிகபட்சம் 44% வரை | கிட்டத்தட்ட அனைத்து பொருட்களுக்கும் 0% |
| விமானங்கள் மற்றும் விண்வெளி சாதனங்கள் | அதிகபட்சம் 11% வரை | கிட்டத்தட்ட அனைத்து பொருட்களுக்கும் 0% |
| ஒளியியல், மருத்துவ மற்றும் அறுவை சிகிச்சை உபகரணங்கள் | அதிகபட்சம் 27.5% வரை | 90% பொருட்களுக்கு 0% |
| பிளாஸ்டிக் பொருட்கள் | அதிகபட்சம் 16.5% வரை | கிட்டத்தட்ட அனைத்து பொருட்களுக்கும் 0% |
| முத்துகள், மதிப்புள்ள கற்கள் மற்றும் உலோகங்கள் | அதிகபட்சம் 22.5% வரை | 20 பொருட்களுக்கு 0%, மற்றவற்றுக்கு சுங்க வரி குறைப்பு |
| இரசாயனப் பொருட்கள் | அதிகபட்சம் 22% வரை | கிட்டத்தட்ட அனைத்து பொருட்களுக்கும் 0% |
| மோட்டார் வாகனங்கள் | 110% | 10% (2.5 லட்சம் வாகனங்களுக்கு ஒதுக்கீடு) |
| இரும்பு மற்றும் எஃகு | அதிகபட்சம் 22% வரை | கிட்டத்தட்ட அனைத்து பொருட்களுக்கும் 0% |
| மருந்துப் பொருட்கள் | 11% | கிட்டத்தட்ட அனைத்து பொருட்களுக்கும் 0% |
வரி குறைப்பைப் பெறும் ஐரோப்பிய ஒன்றியத்தின் விவசாயப் பொருட்களின் முழு பட்டியல்.
| பொருள் (Product) | தற்போதைய சுங்க வரி (%) | எதிர்கால சுங்க வரி (%) |
|---|---|---|
| வைன் (Wine) | 150% | 20% (பிரீமியம் வகை); 30% (நடுத்தர வகை) |
| மதுபானங்கள் / ஸ்பிரிட்ஸ் (Spirits) | அதிகபட்சம் 150% வரை | 40% |
| பீர் (Beer) | 110% | 50% |
| ஆலிவ் எண்ணெய், மார்கரின் மற்றும் பிற தாவர எண்ணெய்கள் | அதிகபட்சம் 45% வரை | 0% |
| கிவி மற்றும் பேரிக்காய் | 33% | 10% |
| பழச்சாறுகள் மற்றும் மதுவில்லா பீர் | அதிகபட்சம் 55% வரை | 0% |
| செயலாக்கப்பட்ட உணவுகள் (ரொட்டி, பேஸ்ட்ரி, பிஸ்கட், பாஸ்தா, சாக்லேட், செல்லப்பிராணி உணவு) | அதிகபட்சம் 50% வரை | 0% |
| செம்மறி ஆடு இறைச்சி | 33% | 0% |
| சாசேஜ்கள் மற்றும் பிற இறைச்சி தயாரிப்புகள் | அதிகபட்சம் 110% வரை | 50% |
