இந்திய உணவு முறையிலும், பாரம்பரிய மருத்துவத்திலும் வெந்தயம் வெறும் சமையல் பொருள் மட்டுமல்ல. வாதம், பித்தம், கபம் ஆகிய மூன்று முக்கிய தோஷங்களையும் சமநிலைப்படுத்தும் அபூர்வ மூலிகையாகப் பார்க்கப்படுகிறது. இந்த வெந்தய விதைகளை முறையாக உட்கொள்வதன் மூலம் நாம் பெறும் ஏராளமான ஆரோக்கிய நன்மைகள் குறித்து இந்தப் பதிவில் காணலாம்.
வெந்தய நீரின் செரிமான நன்மைகள் :
இரவு முழுவதும் வெந்தய விதைகளைத் தண்ணீரில் ஊற வைத்து, காலையில் வெறும் வயிற்றில் அந்த நீரைக் குடிப்பது ஆயுர்வேதத்தில் பரிந்துரைக்கப்படுகிறது. இந்த நீர் குடல்களைத் திறம்படச் சுத்தப்படுத்தி, அஜீரணக் கோளாறுகள், அதிகப்படியான வாய்வு, நெஞ்செரிச்சல் மற்றும் நாட்பட்ட மலச்சிக்கல் போன்ற செரிமானப் பிரச்சினைகளுக்கு உடனடியாக நிவாரணம் அளிக்கிறது. மேலும், உடலின் உள் சுத்தம் மேம்படுவதால் முகம் பொலிவு பெறுகிறது.
உடல் எடை குறைப்பு மற்றும் கொழுப்புக் கட்டுப்பாடு :
உடல் எடையை குறைக்க முயற்சிப்பவர்களுக்கு வெந்தய நீர் ஒரு சிறந்த நண்பனாக செயல்படுகிறது. இதில் உள்ள அதிகப்படியான நார்ச்சத்து, தேவையற்ற பசியைக் குறைத்து, அதிக உணவு உட்கொள்வதைத் தடுக்கிறது. பல்வேறு ஆய்வுகளின்படி, வெந்தயத்தில் உள்ள அதே நார்ச்சத்து, உடலில் சேரும் அதிகப்படியான கொழுப்பை உடைக்க உதவுவதுடன், மொத்த கொழுப்பின் அளவையும் சீராகப் பராமரிக்கிறது.
இதயம் மற்றும் பெண்களின் ஆரோக்கியம் :
இதய ஆரோக்கியத்தைப் பாதுகாப்பதிலும் வெந்தய நீர் முக்கியப் பங்கு வகிக்கிறது. இது இரத்தத்தில் உள்ள கெட்ட கொழுப்பைக் (LDL) குறைத்து, நல்ல கொழுப்பின் (HDL) அளவை அதிகரிக்க உதவுகிறது. இதன் மூலம் இதயத் தமனிகளில் அடைப்பு ஏற்படும் அபாயத்தைக் குறைக்கிறது. ஆயுர்வேதத்தின்படி, வெந்தய நீர் இதயத்திற்குப் புத்துணர்வூட்டி, சீரான இரத்த ஓட்டத்தை ஊக்குவிக்கிறது.
இதுமட்டுமல்லாமல், வெந்தயம் பெண்களுக்கு ஏற்படும் தைராய்டு குறைபாடுகள் மற்றும் மாதவிடாய் பிரச்சினைகளுக்கும் நிவாரணம் அளிக்கும் திறன் கொண்டது. இது உடலில் ஈஸ்ட்ரோஜன் அளவைச் சமன் செய்து, தோல் மற்றும் முடி ஆரோக்கியத்தைப் பாதுகாக்கிறது. வெந்தயத்தில் உள்ள சக்திவாய்ந்த ஆக்சிஜனேற்றிகள் உடலில் இருந்து நச்சுக்களை வெளியேற்றி, சருமத்தைப் பளபளப்பாகவும், இளமையாகவும் வைத்திருக்க உதவுகின்றன.
