ரஜினி நடிப்பில் 20 ஆண்டுகளுக்கு முன்பு வெளிவந்த ‘பாபா’ திரைப்படம் விரைவில் மறுவெளியீடு செய்யப்பட உள்ள நிலையில், படத்தின் ட்ரெய்லர் இன்று மாலை 6 மணிக்கு வெளியாகிறது.
கடந்த 2002ஆம் ஆண்டு ரஜினி நடிப்பில் சுரேஷ் கிருஷ்ணா இயக்கத்தில் வெளியான திரைப்படம் ‘பாபா’. ரஜினிகாந்த் தயாரித்த இந்த படத்திற்கு ஏ.ஆர்.ரகுமான் இசையமைத்திருந்தார். ‘படையப்பா’ படம் வெளியாகி 3 ஆண்டுகளுக்கு பின்னர் ரஜினி நடித்து வெளியான இந்த படம் பெரும் எதிர்ப்பார்ப்பை தூண்டியபோதிலும், எதிர்பார்த்த வெற்றியை பெறவில்லை. இந்நிலையில், ‘பாபா’ படத்தை ரஜினிகாந்த் மறுவெளியீடு செய்ய உள்ளார். மீண்டும் எடிட் செய்யப்பட்டு டிஜிட்டல் முறையில் மெரூகூட்டப்பட்ட ‘பாபா’ படம் விரைவில் மறுவெளியீடு செய்யப்பட உள்ளது.
புதிதாக சில வசனங்களும் படத்தில் சேர்க்கப்பட்டுள்ளதால் அதற்காக சமீபத்தில் ரஜினிகாந்த் டப்பிங் பேசினார். அந்த புகைப்படம் இணையத்தில் வைரலானது. பாபா மறுவெளியீட்டை கொண்டாட ரஜினி ரசிகர்கள் தயாராகி வரும் நிலையில், அவர்களை உற்சாகப்படுத்தும் வகையில், படத்தின் ட்ரெய்லர் இன்று மாலை 6 மணிக்கு வெளியாக இருக்கிறது.
