இந்திய ரிசர்வ் வங்கி (RBI) வெளியிட்டுள்ள 2026-ஆம் ஆண்டுக்கான அதிகாரப்பூர்வ விடுமுறை பட்டியலின்படி, ஜனவரி மாதத்தில் நாடு முழுவதும் உள்ள வங்கிகளுக்கு பல நாட்கள் விடுமுறை அறிவிக்கப்பட்டுள்ளது. இதில் மாநிலங்களுக்கு இடையேயான கலாச்சார பண்டிகைகள் மற்றும் தேசிய விடுமுறைகள் என பல்வேறு காரணங்கள் அடங்கியுள்ளன. குறிப்பாக தமிழகத்தை பொறுத்தவரை, பொங்கல் பண்டிகையை முன்னிட்டு ஒரு நீண்ட விடுமுறை காலம் காத்திருக்கிறது.
ஜனவரி மாத முக்கிய விடுமுறைப் பட்டியல் : புத்தாண்டு தினமான ஜனவரி 1-ஆம் தேதி சென்னை உள்ளிட்ட நாட்டின் பெரும்பாலான பகுதிகளில் வங்கிகள் இயங்காது. அதனைத் தொடர்ந்து, ஜனவரி 3-இல் உத்தரப்பிரதேசத்தில் ஹஸ்ரத் அலி பிறந்தநாளும், ஜனவரி 12-இல் மேற்கு வங்கத்தில் விவேகானந்தர் பிறந்தநாளும் அந்தந்த மாநிலங்களுக்குரிய விடுமுறை நாட்களாக அறிவிக்கப்பட்டுள்ளன. மாதத்தின் இரண்டாவது சனிக்கிழமை (ஜனவரி 10) மற்றும் நான்காவது சனிக்கிழமை (ஜனவரி 24) ஆகிய தேதிகளில் நாடு முழுவதும் உள்ள வங்கிகளுக்கு வழக்கமான விடுமுறை அளிக்கப்படும்.
தமிழகத்தில் தொடர் விடுமுறை : தமிழக வங்கி வாடிக்கையாளர்களுக்கு ஜனவரி மாதத்தின் பாதியில் ஒரு மிக நீண்ட விடுமுறை காத்திருக்கிறது. ஜனவரி 15-ஆம் தேதி (வியாழன்) தைப்பொங்கல் பண்டிகையுடன் இந்த விடுமுறை தொடங்குகிறது. அடுத்தடுத்து வரும் ஜனவரி 16 (திருவள்ளுவர் தினம்) மற்றும் ஜனவரி 17 (உழவர் திருநாள்) ஆகிய தினங்களும் அரசு விடுமுறை என்பதால் வங்கிகள் செயல்படாது. இதனைத் தொடர்ந்து ஜனவரி 18-ஆம் தேதி ஞாயிற்றுக்கிழமை என்பதால், தமிழகத்தில் தொடர்ந்து 4 நாட்கள் வங்கிகள் மூடப்பட்டிருக்கும். இந்த நாட்களில் ஏடிஎம்களில் பணத்தட்டுப்பாடு ஏற்பட வாய்ப்புள்ளதால், பொதுமக்கள் முன்கூட்டியே தங்களுக்குத் தேவையான பணத்தைத் தயார் செய்து கொள்வது நல்லது.
குடியரசு தின வார விடுமுறை : மாத இறுதியில் மற்றொரு 3 நாள் விடுமுறை அமையவுள்ளது. ஜனவரி 24-ஆம் தேதி நான்காவது சனிக்கிழமை மற்றும் ஜனவரி 25 ஞாயிறு ஆகியவற்றை தொடர்ந்து, ஜனவரி 26-ஆம் தேதி (திங்கள்) நாடு முழுவதும் குடியரசு தின விழா தேசிய விடுமுறையாக கொண்டாடப்படுகிறது. இதனால் மாத இறுதியில் சனி முதல் திங்கள் வரை 3 நாட்கள் வங்கிகள் இயங்காது.
வங்கிகளின் இந்த விடுமுறை பட்டியல் அந்தந்த மாநிலங்களின் சிறப்பு தினங்களுக்கு ஏற்ப மாறுபடும் என்பதால், வாடிக்கையாளர்கள் தங்களது வங்கி சார்ந்த பணிகளை முன்கூட்டியே திட்டமிட்டு முடித்துக் கொள்ளுமாறு அறிவுறுத்தப்படுகிறார்கள். இணைய வங்கிச் சேவைகள் (Net Banking) மற்றும் மொபைல் வங்கிச் சேவைகள் இந்த விடுமுறை நாட்களிலும் தடையின்றிச் செயல்படும் என்பது குறிப்பிடத்தக்கது.
