தமிழக அரசியல் களம் 2026 சட்டமன்ற தேர்தலை நோக்கி விறுவிறுப்பாக நகர்ந்து கொண்டிருக்கும் வேளையில், நடிகர் விஜய்யின் ‘தமிழக வெற்றிக் கழகம்’ எடுக்கப்போகும் கூட்டணி முடிவுதான் தற்போதைய பேசுபொருளாக மாறியிருக்கிறது. இதுவரை தனித்து போட்டி என்ற முழக்கத்துடன் களப்பணிகளை முடுக்கிவிட்டுள்ள தவெக-வை நோக்கி, இரண்டு பிரதான தேசியக் கட்சிகள் தூது விட்டு வருவதாக அரசியல் வட்டாரங்கள் கூறுகின்றன.
குறிப்பாக, டெல்லியில் இருந்து வரும் அழுத்தமான அழைப்புகள் பனையூரில் உள்ள கட்சித் தலைமையகத்தில் தீவிர ஆலோசனைகளை முடுக்கிவிட்டுள்ளன. பாஜக தலைமையிலான தேசிய ஜனநாயகக் கூட்டணி (NDA), விஜய்யின் தவெக-வை தங்கள் பக்கம் இழுக்கப் பெரும் சலுகைகளை முன்வைத்துள்ளதாக கூறப்படுகிறது. தவெக கேட்கும் தொகுதிகளை ஒதுக்குவது மட்டுமல்லாமல், கூட்டணிக்கு வரும் பட்சத்தில் துணை முதலமைச்சர் பதவி மற்றும் நாடாளுமன்ற மாநிலங்களவை உறுப்பினர் இடங்கள் என பவர்ஃபுல்லான உத்தரவாதங்களை பாஜக தலைமை வழங்கியுள்ளதாக தெரிகிறது.
விஜய்யின் அரசியல் வருகை தமிழகத்தில் ஒரு மாற்றத்தை ஏற்படுத்தும் எனக் கருதும் பாஜக, அவரைத் தங்கள் கூட்டணிக்குள் கொண்டு வருவதன் மூலம் திராவிடக் கட்சிகளுக்குப் பலமான சவாலை அளிக்கத் திட்டமிட்டுள்ளது. மறுபுறம், காங்கிரஸ் கட்சியின் டெல்லி மேலிடமும் விஜய்யுடன் ரகசியப் பேச்சுவார்த்தையில் ஈடுபட்டு வருவதாக தகவல்கள் தெரிவிக்கின்றன. தமிழகத்தில் பல தசாப்தங்களாக திமுக கூட்டணியில் அங்கம் வகிக்கும் காங்கிரஸ், வரும் தேர்தலில் தவெக-வுடன் கைகோர்ப்பதன் மூலம் தனது பேரம் பேசும் சக்தியை அதிகரிக்க முயலலாம் என அரசியல் நோக்கர்கள் கருதுகின்றனர். இந்த இரட்டைத் தேசியக் கட்சிகளின் அழைப்பால், “தனித்து போட்டியா அல்லது கூட்டணியா?” என்ற குழப்பத்தில் தவெக தலைமை இருப்பதாக கூறப்படுகிறது.
தற்போதைய நிலவரப்படி, பனையூர் இல்லத்தில் கட்சியின் உயர்மட்டக் குழுவினருடன் விஜய் தொடர் ஆலோசனையில் ஈடுபட்டு வருகிறார். கட்சியின் கொள்கை நிலைப்பாட்டிற்குப் பாதிப்பு ஏற்படாத வகையிலும், தொண்டர்களின் எதிர்பார்ப்பைப் பூர்த்தி செய்யும் வகையிலும் இறுதி முடிவு எடுக்கப்படும் என எதிர்பார்க்கப்படுகிறது. “வெற்றி மட்டுமே இலக்கு” என்று களமிறங்கியுள்ள விஜய், தேசியக் கட்சிகளின் இந்த ஆஃபர்களை ஏற்பாரா அல்லது தனது தனித்துவத்தை நிலைநாட்டத் தனித்துப் போட்டியிடுவாரா என்பது வரும் நாட்களில் வெளியாகும் அதிகாரப்பூர்வ அறிவிப்பில் தெரியவரும்.
