கோதுமை மாவை கடைகளில் வாங்கினால் கட்டுப்படியாகாது. காரணம் சுவையும் சற்று வித்தியாசமாக இருக்கும், விலையும் அதிகம். இதனால் பலர் கோதுமையை வாங்கி அதை நன்கு சுத்தம் செய்து, காய வைத்து பிறகு மில்லில் கொடுத்து அரைத்து வைத்துக் கொள்வார்கள். பின் தேவைப்படும்போதெல்லாம் அதை பயன்படுத்துவார்கள்.
பொதுவாக அரைக்கும் வெள்ளை மாவுகளில் கொழுப்பு குறைவாக இருப்பதால் அவை நீண்ட நாட்கள் கெட்டுப் போகாமல் அப்படியே இருக்கும். ஆனால் கோதுமை மாவு அப்படி இல்லை. அது குறைந்த நாள் தான் கெடாமல் இருக்கும். இதனால் சீக்கிரமாகவே அதில் வண்டுகள், பூச்சிகள் பிடித்து விடும். இதனால் மொத்தமாகவும் வீணாகிவிடும். ஆனால் சிலர் மாவில் வண்டு வந்தால் கூட அதை சலித்து பயன்படுத்துவார்கள். இன்னும் சிலரோ அதை குப்பையில் கொட்டி விடுவார்கள். கோதுமையை நன்கு அலசி காய வைத்து அரைத்த பிறகும் ஏன் வண்டு வருகிறது என்று யோசிக்கிறீர்களா? அதற்கான காரணங்கள் என்றும், கோதுமை மாவில் வண்டு வருவதை தடுப்பது எப்படி என்றும், அதை சேமிக்கும் சரியான முறை பற்றியும் இந்த பதிவில் பார்க்கலாம்.
காற்று புகாதவாறு இறுக்கமான மூடி கொண்ட பாத்திரங்களில் மாவை போட்டு வைக்க வேண்டும். மூடி இறுக்கமாக இருப்பதால் எளிதில் பூச்சிகள் பாத்திரத்திற்குள் நுழைய முடியாது. மேலும், மாவு காற்றில் வெளிப்படும் போது, அது ஆக்ஸிடேஷன் ஆகும். இந்த ஆக்ஸிடேஷன் செயல்முறையானது மாவில் உள்ள கொழுப்புகளை மாற்றி, சுவையற்ற மற்றும் பழைய சுவை ஏற்பட வழிவகுக்கும்.மாவுகளை உலர வைத்து பராமரிக்க வேண்டும். ஈரப்பதத்துடன் வைத்தால், அது பாக்டீரியாக்களின் வளர்ச்சிக்கு வழிவகுக்கும்.
மாவில் பூச்சிகள் ஏறினால் அதனால் அவை மாசுபடும் மற்றும் பயன்படுத்த பாதுகாப்பற்றதாக இருக்கும். எனவே பூச்சிகள் மாவில் ஏறாமல் இருக்க மாவு இருக்கும் பாத்திரங்களுக்குள் பிரியாணி இலை, கிராம்பு போன்ற பொருட்களை போட்டு வைக்கலாம். அதன் மூலம் பூச்சிகள் அண்டாமல் மாவை பாதுகாக்கலாம்.
வெப்பநிலையின் ஏற்ற இறக்கங்கள், ஒளியின் வெளிப்பாடு மற்றும் முறையற்ற சேமிப்பு பாத்திரங்கள் அனைத்தும் மாவின் தன்மையை விரைவாக இழக்க பங்களிக்கின்றன. நீண்ட நாட்கள் மாவு கெடாமல் புதிதாக இருக்க வேண்டும் என்றால் அதை நாம் எவ்வாறு பத்திரப்படுத்தி வைத்திருக்கிறோம் என்பதில் தான் அடங்கி இருக்கிறது. முறையாக மாவை பத்திரப்படுத்தி வைத்தால், அறையின் சாதாரண வெப்பநிலையில் 6 முதல் 8 மாதங்களுக்கு அது கெடாமல் இருக்கும். மேலும், ஃபிரிட்ஜில் வைத்தால் 1 வருடத்திற்கும். ஃப்ரீசரில் வைத்தால் 2 ஆண்டுகள் வரை மாவை கெடாமல் பாதுகாக்கலாம்.
