நீண்ட நேர உடலுறவு மற்றும் மேம்பட்ட பாலியல் செயல்திறன் ஆகியவற்றுக்காக பிரபலமாக அறியப்படும் வயாகரா (Viagra) மருந்தை, தற்போது மருத்துவ தேவை இல்லாத இளம் தலைமுறையினரும் பயன்படுத்துவது கவலை அளிப்பதாக சுகாதார நிபுணர்கள் எச்சரிக்கை விடுத்துள்ளனர்.
ஒரு காலத்தில் விறைப்புத்தன்மை குறைபாடு (Erectile Dysfunction) உள்ளவர்களுக்கு மட்டுமே சிகிச்சையாகப் பயன்படுத்தப்பட்ட இந்த மருந்து, இப்போது ‘செயல்திறனை உயர்த்தும்’ அல்லது ‘நம்பிக்கையை அதிகரிக்கும்’ ஒரு பொழுதுபோக்குப் பொருளாகப் பரவலாக மாறி வருகிறது.
வயாகரா எப்படி வேலை செய்கிறது..?
வயாகராவில் உள்ள முக்கிய மூலப்பொருள் சில்டெனாபில் சிட்ரேட் (Sildenafil Citrate) ஆகும். இது PDE5 தடுப்பான் என்ற மருந்து வகையைச் சேர்ந்தது. பாலியல் தூண்டுதல் ஏற்படும்போது, இந்த மருந்து ஆணுறுப்பிற்கான இரத்த ஓட்டத்தை அதிகரித்து, விறைப்புத்தன்மையை அடையவும், அதனைப் பராமரிக்கவும் மட்டுமே உதவுகிறது. உண்மையாகவே விறைப்புத்தன்மை பிரச்சனை உள்ளவர்களுக்கு மட்டுமே இந்த மருந்து தேவையானது என்று வனபர்த்தியை சேர்ந்த பொது மருத்துவர் டாக்டர் கஞ்சி பாஸ்கர் விளக்குகிறார்.
இளம் வயதினர் ஏன் பயன்படுத்துகிறார்கள்..?
இளம் தலைமுறையினர் பலர் உண்மையான மருத்துவப் பிரச்சனைகள் இல்லாமலேயே, பாலியல் செயல்திறனை நீட்டிக்கும் நோக்குடனும் அல்லது முன்கூட்டிய விந்து வெளியேற்றம் குறித்த பதட்டத்தை குறைப்பதற்காகவும் ஆர்வத்தில் வயாகராவை எடுத்துக்கொள்கின்றனர். மருத்துவர்களின் கூற்றுப்படி, விறைப்புத்தன்மை குறைபாடு இல்லாதவர்களுக்கு, வயாகரா எந்த ஒரு செயல்திறன் மேம்பாட்டையும் தருவதில்லை. இது ஒரு மூடநம்பிக்கை மற்றும் தேவையற்ற பழக்கமாக மாறி வருகிறது.
பக்கவிளைவுகள் குறித்து எச்சரிக்கை :
மருத்துவர் ஆலோசனை இல்லாமல் சுயமாக வயாகராவை எடுத்துக்கொள்வது கடுமையான உடல்நல அபாயங்களை ஏற்படுத்தும்.
ரத்த அழுத்த அபாயம்: நைட்ரோகிளிசரின் போன்ற இரத்த அழுத்தத்திற்கான மருந்துகளை எடுத்துக்கொள்பவர்கள் வயாகராவையும் சேர்த்தால், ரத்த அழுத்தம் ஆபத்தான அளவுக்குக் குறையக்கூடும்.
பொதுவான பக்கவிளைவுகள்: தலைவலி, முகம் சிவத்தல், தசை வலி, மூக்கடைப்பு மற்றும் தற்காலிகப் பார்வை மங்கல் ஆகியவை இதில் அடங்கும்.
பிரியாபிசம் (Priapism): அரிதான ஆனால் ஆபத்தான ஒரு நிலை. இதில் விறைப்புத்தன்மை தொடர்ந்து 4 மணி நேரத்திற்கும் மேலாக நீடிக்கும். இது நடந்தால், உடனடி மருத்துவ உதவி அவசியம்.
மருத்துவ ஆலோசனை இல்லாமல் பாலியல் தொடர்பான எந்தவொரு மருந்தையும் பயன்படுத்துவது தவறு என்று டாக்டர் பாஸ்கர் வலியுறுத்துகிறார். உண்மையான சிகிச்சை தேவையில்லாதவர்களுக்கு, மனஅழுத்தம் மற்றும் பதட்டத்தை குறைக்கும் வாழ்க்கை முறை மாற்றங்களும், மனநல ஆலோசனைகளும் மட்டுமே சிறந்த தீர்வாக இருக்கும் என்றும் அவர் அறிவுறுத்துகிறார். இந்த மருந்துகளைப் பொழுதுபோக்கிற்காகத் தவறாகப் பயன்படுத்துவது, நீண்டகாலத்தில் இதயம், இரத்த அழுத்தம் மற்றும் மனநலனில் தீவிர விளைவுகளை ஏற்படுத்தக்கூடும் என்று நிபுணர்கள் எச்சரிக்கின்றனர்.
Read More : உங்கள் வீட்டில் பணம் சேராமல் இருக்க இதுதான் முக்கிய காரணம்..!! இந்த பொருட்களை மாற்றினால் பண மழை கொட்டும்..!!
