உங்கள் பேங்க் அக்கவுண்ட்டை பாதுகாக்க வேண்டுமா..? அப்படினா ஆதாரை இப்படி லாக் பண்ணுங்க..!!

இன்றைய டிஜிட்டல் யுகத்தில், இந்திய குடிமக்களின் வாழ்வோடு பின்னிப் பிணைந்துள்ள மிக முக்கியமான ஆவணம் ஆதார் கார்டு. குழந்தைகளின் பள்ளிச் சேர்க்கை முதல் முதியோர்களுக்கான ஓய்வூதியம் வரை அனைத்து அரசு மற்றும் தனியார் சேவைகளுக்கும் ஆதார் அடையாளமே முதன்மையாக கேட்கப்படுகிறது. ஆனால், நாம் அங்கும் இங்கும் நகல் எடுத்து வழங்கும் இந்த ஆதார் அட்டை, நம்மையறியாமலேயே நமது வாழ்நாள் சேமிப்பிற்கு பெரும் ஆபத்தாகவும் முடிய வாய்ப்புள்ளது. உங்களது வங்கி கணக்கிலிருந்து உங்கள் அனுமதி இன்றிப் பணம் திருடப்படுவதை தவிர்க்க, ஆதாரில் உள்ள ஒரு முக்கியமான பாதுகாப்பு வசதியை உடனே செயல்படுத்த வேண்டியது அவசியமாகிறது.

பொதுவாக, நமது ஆதார் அட்டை பான் கார்டு மற்றும் வங்கி கணக்குகளுடன் நேரடியாக இணைக்கப்பட்டுள்ளது. இதில் இடம்பெற்றுள்ள பெயர், முகவரி போன்ற தகவல்களை காட்டிலும், நமது கைரேகை மற்றும் கண்ரேகை (Biometric) போன்ற தரவுகள் மிகவும் ரகசியமானவை. சைபர் குற்றவாளிகள் இந்த பயோமெட்ரிக் தகவல்களைத் தவறாகப் பயன்படுத்தி, ஆதார் மூலம் இயங்கும் பணப்பரிவர்த்தனை வசதி (AePS) வழியாக வங்கி கணக்குகளிலிருந்து பணத்தைக் கொள்ளையடிக்கும் சம்பவங்கள் அதிகரித்து வருகின்றன. இந்த மோசடியைத் தடுக்க, இந்தியத் தனித்துவ அடையாள ஆணையம் (UIDAI) வழங்கும் ‘பயோமெட்ரிக் லாக்’ (Biometric Lock) வசதியைப் பயன்படுத்துவதே தற்போதைய சூழலில் புத்திசாலித்தனமாகும்.

ஆதார் பயோமெட்ரிக் விவரங்களை லாக் செய்வது எப்படி..?

* முதலில், UIDAI-ன் அதிகாரப்பூர்வ இணையதளமான https://myaadhaar.uidai.gov.in என்ற பக்கத்திற்குச் செல்லவும்.

* அங்கு உங்களது 12 இலக்க ஆதார் எண்ணைப் பதிவிட்டு, கேப்ட்சா குறியீட்டை உள்ளிட்டவுடன் உங்கள் மொபைலுக்கு வரும் OTP மூலம் உள்நுழையவும்.

* திரையில் தோன்றும் பல சேவைகளில் ‘Lock/Unlock Biometrics’ அல்லது ‘Enable Biometric Lock’ என்ற விருப்பத்தை தேர்ந்தெடுக்கவும்.

* உறுதிப்படுத்துதல் பொத்தானை அழுத்தியவுடன், உங்கள் பயோமெட்ரிக் விவரங்கள் லாக் செய்யப்பட்டுவிடும்.

இவ்வாறு லாக் செய்வதன் மூலம், இனி உங்கள் கைரேகையை வைத்து உங்கள் அனுமதி இன்றி யாராலும் எந்தப் பரிவர்த்தனையோ அல்லது ஆதாரைச் சரிபார்க்கும் பணியோ செய்ய முடியாது. உங்களுக்குத் தேவைப்படும் நேரத்தில் மீண்டும் இதே இணையதளத்திற்கு சென்று ‘அன்லாக்’ (Unlock) செய்து கொள்ளலாம். தொழில்நுட்பத்தை பயன்படுத்தும் அதே வேளையில், அதன் பாதுகாப்பிலும் கவனம் செலுத்துவது உங்களது கடின உழைப்பின் பலனை மோசடிக்காரர்களிடமிருந்து காப்பாற்றும் என்பது குறிப்பிடத்தக்கது.

Read More : இறைவன் நம்மோடு பேசும் மொழி..!! கோயில்களில் நீங்கள் சாமி கும்பிடும்போது இந்த அறிகுறியை கவனிச்சிருக்கீங்களா..?