தூத்துக்குடி மாவட்டம் தாளமுத்துநகரை அடுத்த திரேஸ்நகரை சேர்ந்தவர் சக்திமகேஸ்வரி (38). இவருக்குத் திருமணமாகி இரண்டு மகள்கள் உள்ளனர். இவருடைய கணவர் ராமசுப்பு. இவர், கர்நாடகாவில் செல்போன் கோபுரம் அமைக்கும் பணியில் உள்ளார். இந்நிலையில், கணவர் வெளிமாநிலத்தில் வேலை செய்து வரும் நிலையில், மனைவி சக்திமகேஸ்வரிக்கும், தூத்துக்குடி சிப்காட் காவல் நிலையத்தில் பணியாற்றும் காவலர் ஒருவருக்கும் பழக்கம் ஏற்பட்டுள்ளது.
இந்த பழக்கம் நாளடைவில் கள்ளக்காதலாக மாறிய நிலையில், இருவரும் அடிக்கடி உல்லாசமாக இருந்து வந்துள்ளனர். இந்த விவகாரம் காவலரின் மனைவி மற்றும் குடும்பத்தினருக்கு தெரியவந்த நிலையில், அவர்கள் இந்த உறவை கைவிடுமாறு கண்டித்துள்ளனர். ஆனாலும், இந்த உறவை தொடர்ந்து வளர்த்து வந்துள்ளனர்.
இதனால், கோபித்துக் கொண்ட காவலரின் மனைவி அவரை விட்டு பிரித்துச் சென்றார். மகனும், மகளும் தந்தையுடன் வசித்து வருகின்றனர். தனது தாயை பிரித்து, குடும்பத்தை சீர்குலைத்ததற்கு சக்திமகேஸ்வரிதான் காரணம் என காவலரின் 16 வயது மகன் நினைத்துள்ளார். இதனால், ஆத்திரமடைந்த அவர், தனது நண்பனுடன் சேர்ந்து, சம்பவத்தன்று மாலை சக்திமகேஸ்வரி வீட்டுக்கு சென்றுள்ளார். அங்கு மறைத்துக் கொண்டுச் சென்ற அரிவாளை எடுத்து சக்தி மகேஸ்வரியை சரமாரியாக இருவரும் வெட்டியுள்ளனர்.
இந்த சம்பவத்தால் துடிதுடித்துப் போன சக்திமகேஸ்வரி, ரத்த வெள்ளத்தில் சம்பவ இடத்திலேயே உயிரிழந்தார். பின்னர், கொலை செய்த இரண்டு சிறுவர்களும் அங்கிருந்து தப்பிச் சென்றனர். இந்நிலையில், இச்சம்பவம் குறித்து போலீசுக்கு தகவல் தெரிவிக்கப்பட்ட நிலையில், அவர்கள் சம்பவ இடத்திற்கு விரைந்து வந்து உடலை கைப்பற்றி, பிரேத பரிசோதனைக்கு அனுப்பி வைத்தனர். மேலும், தலைமறைவாக உள்ள சிறுவர்கள் இருவரையும் போலீசார் வலைவீசி தேடி வருகின்றனர்.
