பிரபல கன்னட நடிகரும் தார்வாட் நாடக இயக்குநருமான ராஜு தாலிகோட் மாரடைப்பால் காலமானார்.. அவருக்கு வயது 62. கர்நாடகாவின் உடுப்பி மாவட்டத்தில் நடந்த திரைப்படத்தின் படப்பிடிப்பின் போது அவர் மயங்கி விழுந்துள்ளார்.. அவர் உடனடியாக மருத்துவமனைக்கு கொண்டு செல்லப்பட்டார். ஆனால் அவர் மாரடைப்பால் இறந்துவிட்டதாக மருத்துவர்கள் தெரிவித்தனர்…
அவருக்கு இரண்டு மனைவிகள், இரண்டு மகன்கள் மற்றும் மூன்று மகள்கள் உள்ளனர். நடிகர் ராஜு தாலிகோட் ஏற்கனவே இதய நோயால் பாதிக்கப்பட்டிருந்ததாக அவரின் மகன் தெரிவித்துள்ளார். அவரின் மறைவுக்கு கன்னட பிரபலங்கள் மற்றும் அரசியல் தலைவர்கள் இரங்கல் தெரிவித்து வருகின்றனர்..
ஜனதா தள மதச்சார்பற்ற கட்சி ராஜு தாலிகோட் மறைவுக்கு இரங்கல் தெரிவித்துள்ளது.. தனது அதிகாரப்பூர்வ எக்ஸ் பக்கத்தில் இரங்கல் தெரிவித்து, நாடகம் மற்றும் சினிமா உலகம் ஒரு பிரகாசமான நட்சத்திரத்தை இழந்துவிட்டதாக தெரிவித்துள்ளது. ராஜு தாலிகோட்டின் மறைவு கன்னட திரைப்படத் துறைக்கு ஈடுசெய்ய முடியாத இழப்பு என்றும் தெரிவிக்கப்பட்டுள்ளது..
கர்நாடக துணை முதல்வர் அஞ்சலி
கர்நாடக துணை முதல்வர் டி.கே. சிவகுமார் அவரது மறைவுக்கு இரங்கல் தெரிவித்தார். தனது எக்ஸ் பக்கத்தில் “ பிரபல நாடக நடிகர், நகைச்சுவை நடிகர் மற்றும் தார்வாட் நாடக இயக்குனர் ராஜு தாலிகோட் மாரடைப்பால் காலமானார் என்பது மிகவும் வருத்தமளிக்கிறது. பல கன்னட படங்களில் நடித்து பெரும் புகழைப் பெற்ற ராஜு தாலிகோட்டின் மரணம் கன்னடத் திரையுலகிற்கு ஒரு பெரிய இழப்பு” என்று பதிவிட்டுள்ளார்..
ராஜு தாலிகோட் தனது வாழ்க்கையில் 20க்கும் மேற்பட்ட படங்களில் நடித்தார், குறிப்பாக நகைச்சுவை வேடங்களுக்கு பெயர் பெற்றவர். கேஜிஎஃப் நட்சத்திரம் யாஷுடன் ராஜதானி படத்திலும் பணியாற்றினார். அவரது திடீர் மறைவு கன்னடத் திரையுலகில் சோகத்தை ஏற்படுத்தியுள்ளது, ரசிகர்கள் மற்றும் தொழில்துறையினர் இந்த இழப்பு குறித்து ஆழ்ந்த வருத்தத்தை தெரிவித்துள்ளனர்.
ராஜு கடந்த இரண்டு நாட்களாக தொடர்ந்து படப்பிடிப்பில் இருந்ததாகவும், அக்டோபர் 13 ஆம் தேதி, சூப்பர் ஸ்டார் ஷைன் ஷெட்டியுடன் ஒரு படத்தை படமாக்கிக் கொண்டிருந்தபோது, திடீரென மூன்றாவது மாரடைப்பு ஏற்பட்டதாகவும் கூறப்படுகிறது.
ராஜு தாலிகோட் 20 ஆண்டுகளுக்கும் மேலாக கன்னட சினிமாவின் ஒரு பகுதியாக இருந்தார். தனது அற்புதமான நகைச்சுவை நடிப்பால் பார்வையாளர்களை சிரிக்க வைக்க முடிந்தது. அவர் அடிக்கடி துணை மற்றும் நகைச்சுவை வேடங்களில் தோன்றினார், ஆனால் திரையில் அவரது நடிப்பு எப்போதும் சிறப்பு வாய்ந்தது. பஞ்சாபி ஹவுஸ், ஜாக்கி, சுக்ரீவா, ராஜதானி, அல்மிரா, டோபிவாலா மற்றும் வீரா போன்ற படங்கள் மிக பிரபலமானவை.. அவரது திடீர் மறைவு திரையுலகினருக்கு மட்டுமல்ல, அவரது ரசிகர்களுக்கும் மிகப்பெரிய அதிர்ச்சியை ஏற்படுத்தியுள்ளது.
Read More : ஸ்ருதி சொன்ன ஐடியா.. ரோகிணியை மட்டம் தட்டி மீனாவை பாராட்டும் விஜயா..! சிறகடிக்க ஆசை இன்றைய எபிசோட்..
