தமிழக அரசியல் களத்தில் ஓ.பன்னீர்செல்வம் எடுத்து வரும் மௌனமான நிலைப்பாடு, அவரது கூடாரத்தையே காலி செய்யும் நிலைக்குத் தள்ளியுள்ளது. 2026 சட்டமன்றத் தேர்தலை நோக்கிய பயணத்தில், ஓபிஎஸ் இன்னும் தனது அரசியல் வியூகத்தையோ அல்லது தேர்தல் நிலைப்பாட்டையோ வெளிப்படையாக அறிவிக்காமல் காலம் தாழ்த்தி வருகிறார். இந்த இழுபறி நிலையால் அதிருப்தியடைந்த அவரது தீவிர ஆதரவாளர்கள், தங்கள் அரசியல் எதிர்காலத்தை கருதி மாற்றுப் பாதையைத் தேடத் தொடங்கியுள்ளனர்.
அந்த வகையில், ஓபிஎஸ்-இன் சொந்த ஊரான தேனி மாவட்டத்திலேயே அவருக்குப் பலத்த அடி விழுந்துள்ளது. அவரது சொந்த தொகுதியான போடியில், ஓபிஎஸ் அணிக்குத் தூணாக விளங்கிய முக்கிய நிர்வாகிகள் உட்பட 300-க்கும் மேற்பட்டோர் அந்த அணியிலிருந்து விலகியுள்ளனர். இதேபோல், கன்னிசேர்வைபட்டி பகுதியைச் சேர்ந்த 120-க்கும் மேற்பட்ட ஆதரவாளர்கள், அதிமுக பொதுச்செயலாளர் எடப்பாடி பழனிசாமியின் தலைமையை ஏற்றுத் தங்களை தாய்க்கட்சியான அதிமுகவில் இணைத்துக் கொண்டனர்.
தேனி மாவட்டம் மட்டுமின்றி, தென் மாவட்டங்களின் பிற பகுதிகளிலும் ஓபிஎஸ் அணிக்குச் சரிவு ஏற்பட்டுள்ளது. சிவகங்கை மாவட்டத்தில் நீண்டகாலமாக ஓபிஎஸ்-உடன் பயணித்த ஆதரவாளர்கள் பலரும், தற்போது அதிமுகவில் இணைந்து வருகின்றனர். ஒருபுறம் ஆளுங்கட்சியான திமுக மற்றும் புதிதாகத் தொடங்கப்பட்டுள்ள தமிழக வெற்றிக் கழகம் (TVK) ஆகிய கட்சிகளை நோக்கிச் சிலர் நகர்ந்தாலும், பெரும்பாலான தொண்டர்கள் இரட்டை இலை சின்னமே தங்களுக்குப் பாதுகாப்பானது எனக் கருதி மீண்டும் அதிமுகவுக்கே திரும்புகின்றனர்.
தலைமை எடுக்கும் முடிவுகளில் தெளிவு இல்லாதது மற்றும் தேர்தல் களம் சூடுபிடித்துள்ள நிலையிலும் அமைதி காப்பது போன்ற காரணங்களால், ஓபிஎஸ் அணி நாளுக்கு நாள் பலவீனமடைந்து வருவதாக அரசியல் நோக்கர்கள் கருதுகின்றனர். இந்தத் தொடர் வெளியேற்றம், வரும் தேர்தலில் ஓபிஎஸ்-ன் அரசியல் செல்வாக்கிற்கு பெரும் சவாலாக அமையும் என்பதில் சந்தேகமில்லை.
Read More : முட்டையுடன் இந்த உணவுகளை மட்டும் தப்பித் தவறி சாப்பிடாதீங்க..!! பாய்சனாக கூட மாறலாம்..!! எச்சரிக்கை..!!
