கடந்த சில காலங்களாக வரலாறு காணாத உச்சத்தை தொட்டு வந்த தங்கம் மற்றும் வெள்ளியின் விலை, தற்போது சர்வதேச சந்தையில் நிலவும் மாற்றங்களால் சரிவைச் சந்திக்க தொடங்கியுள்ளது. புவிசார் அரசியல் பதற்றங்கள் மற்றும் முதலீட்டாளர்களின் ஊகங்களால் விண்ணை முட்டிய விலையானது, தற்போது லாப நோக்கம் கருதி முதலீட்டாளர்கள் தங்கத்தை விற்பனை செய்ய தொடங்கியுள்ளதால் கணிசமாக குறைந்து வருகிறது.
சர்வதேச மற்றும் இந்திய சந்தை நிலவரம் :
சர்வதேச சந்தையில் தங்கம் அதன் உச்ச விலையிலிருந்து சுமார் 7.7 சதவீதம் வரை சரிந்துள்ளது. தற்போது ஒரு அவுன்ஸ் தங்கம் சுமார் $4,500 என்ற அளவில் வர்த்தகம் செய்யப்படுகிறது. வெள்ளியின் விலையும் சுமார் 14 சதவீதம் சரிந்து அவுன்ஸ் ஒன்றுக்கு $72 என்ற நிலைக்கு வந்துள்ளது. இதன் தாக்கம் இந்தியச் சந்தையிலும் எதிரொலிக்கிறது. ஏப்ரல் 2, 2026 அன்று மல்டி கமாடிட்டி எக்ஸ்சேஞ்சில் (MCX) தங்கம் சுமார் 4.57 சதவீதமும், வெள்ளி சுமார் 13 சதவீதமும் சரிவை கண்டன. இந்தியாவில் இறக்குமதி வரிகள் மற்றும் அதிகத் தேவை காரணமாக சர்வதேச விலையை விட உள்நாட்டு விலை சற்று அதிகமாகவே நீடிக்கிறது.
மலிவான விலையில் தங்கம் கிடைக்கும் நாடுகள் :
இந்தியாவோடு ஒப்பிடுகையில் உலகின் சில நாடுகளில் தங்கம் மிகவும் குறைவான விலைக்கு கிடைக்கிறது. அந்தப் பட்டியலில் அமெரிக்கா முதலிடத்தில் உள்ளது. அங்கு 24 காரட் தங்கம் ஒரு கிராமுக்கு சுமார் ரூ.15,905 என்ற விலையில் விற்பனை செய்யப்படுகிறது. ஆஸ்திரேலியா மற்றும் சிங்கப்பூர் ஆகிய நாடுகளும் மலிவு விலையில் தங்கம் கிடைக்கும் நாடுகளின் பட்டியலில் இடம்பிடித்துள்ளன. குறிப்பாக சிங்கப்பூரில் 24 காரட் தங்கம் ஒரு கிராமுக்கு சுமார் ரூ.14,300 என்ற அளவில் வர்த்தகமாகிறது. இது தவிர சுவிட்சர்லாந்து, துபாய் மற்றும் பூட்டான் போன்ற நாடுகளிலும் இந்தியாவை விட குறைந்த விலையில் தங்கம் கிடைப்பதாக தகவல்கள் தெரிவிக்கின்றன.
