இன்றைய அவசர உலகில், மீந்துபோன உணவை குளிர்சாதன பெட்டியில் வைத்து, தேவைப்படும்போது மீண்டும் சூடுபடுத்தி உண்பது ஒரு பழக்கமாகவே மாறிவிட்டது. ஆனால், சூடுபடுத்துவதுதானே என்று நாம் சாதாரணமாக நினைக்கும் இந்த செயல், சில குறிப்பிட்ட உணவுகளைப் பொறுத்தவரை மெதுவான நஞ்சாக மாறக்கூடும் என ஊட்டச்சத்து நிபுணர்கள் எச்சரிக்கின்றனர். எந்தெந்த உணவுகளை மறுமுறை சூடுபடுத்தக் கூடாது, அதன் பின்னணியில் உள்ள அறிவியல் அபாயங்கள் என்ன என்பது குறித்து இங்கே விரிவாகப் பார்ப்போம்.
அரிசி சாதம் மற்றும் கீரை வகைகள் : சமைத்த அரிசி சாதத்தை அறை வெப்பநிலையில் நீண்ட நேரம் வைத்திருக்கும்போது, அதில் பாக்டீரியா வித்துகள் உருவாகின்றன. இதனை மீண்டும் சூடுபடுத்தினாலும் அந்த நச்சுத்தன்மை நீங்குவதில்லை; மாறாக, இது கடுமையான உணவு நச்சாக மாறக்கூடும். அதேபோல, பசலைக்கீரை போன்ற இலை வகை காய்கறிகளில் நைட்ரேட்டுகள் அதிகம். இவற்றை மீண்டும் சூடுபடுத்தும்போது, அவை ‘நைட்ரைட்டுகளாக’ மாறி, பின் உடலில் ‘நைட்ரோசமைன்கள்’ எனப்படும் புற்றுநோயை உண்டாக்கும் காரணியாக உருமாறுகின்றன.
முட்டை மற்றும் கோழி : புரத களஞ்சியமான முட்டையை சமைத்தவுடன் உண்பதே சிறந்தது. மீண்டும் சூடுபடுத்துவது அதிலுள்ள புரதக் கட்டமைப்பைச் சிதைத்து, செரிமான கோளாறுகளை உண்டாக்கும். அதேபோல, கோழிக்கறியை மீண்டும் சூடுபடுத்தும்போது அதில் ஈ.கோலி மற்றும் சால்மோனெல்லா போன்ற பாக்டீரியாக்கள் வளர வாய்ப்புள்ளது. தவிர்க்க முடியாத சூழலில் சூடுபடுத்தினால், குறைந்தது இரண்டு நிமிடங்கள் அதிக வெப்பநிலையில் வைத்து பாக்டீரியாக்களை அழிக்க வேண்டியது அவசியம். காளான்களைப் பொறுத்தவரை, சமைத்த இரண்டு மணி நேரத்திற்குள் உண்பதே பாதுகாப்பானது; இல்லையெனில் அதிலுள்ள புரதங்கள் விரைவாக கெட்டுவிடும்.
உருளைக்கிழங்கு மற்றும் சமையல் எண்ணெய் : சமைத்த உருளைக்கிழங்கை அறை வெப்பநிலையில் மூடி வைத்தால், ஆக்சிஜன் கிடைக்காத சூழலில் ‘போட்யூலிசம்’ எனும் கொடிய பாதிப்பை ஏற்படுத்தும் பாக்டீரியாக்கள் உருவாகும். இவற்றை மீண்டும் சூடுபடுத்தினாலும் விஷத்தன்மை குறையாது. எல்லாவற்றிற்கும் மேலாக, ஒருமுறை பயன்படுத்திய சமையல் எண்ணெயை மீண்டும் மீண்டும் கொதிக்க வைப்பது மிகப்பெரிய ஆபத்து. இது எண்ணெயை நச்சுத்தன்மையுடையதாக மாற்றி, உடலில் கெட்ட கொழுப்பை (LDL) அதிகரித்து, மாரடைப்பு மற்றும் பக்கவாதம் ஏற்படும் அபாயத்தை நேரடியாக அதிகரிக்கிறது. எண்ணெய் கருப்பாக மாறினாலோ அல்லது நெடி ஏறினாலோ அதனைப் பயன்படுத்துவதைத் தவிர்ப்பதே உத்தமம்.
Read More : அரிசியை ஊறவைக்காமல் சமைப்பதால் இவ்வளவு உடல்நலப் பிரச்சனைகள் வருமா..? வியக்கத்தக்க அறிவியல் உண்மைகள்..!!
