2025-ஆம் ஆண்டு விடைபெற இன்னும் சில தினங்களே உள்ள நிலையில், பிறக்கப்போகும் 2026 புத்தாண்டு சாமானிய மக்கள் முதல் அரசு ஊழியர்கள் வரை அனைவரது வாழ்விலும் பெரும் தாக்கத்தை ஏற்படுத்தக்கூடிய பல முக்கிய மாற்றங்களைச் சுமந்து வரவுள்ளது. நிதி பரிவர்த்தனைகள், வங்கி வட்டி விகிதங்கள், ஊதிய உயர்வு மற்றும் சுற்றுச்சூழல் பாதுகாப்பு என பல்வேறு துறைகளில் ஜனவரி 1 முதல் அமலுக்கு வரவுள்ள இந்த மாற்றங்கள் குறித்து விரிவாக காண்போம்.
பொருளாதார ரீதியாக பார்க்கையில், 2026-ஆம் ஆண்டு கடன் வாங்குபவர்களுக்கு சாதகமான ஆண்டாக அமையவுள்ளது. கடந்த 2025-ஆம் ஆண்டில் இந்திய ரிசர்வ் வங்கி (RBI) தனது ரெப்போ வட்டி விகிதத்தை 6.50 சதவீதத்திலிருந்து 5.25 சதவீதமாக அதிரடியாக குறைத்துள்ளது. இதன் நேரடி விளைவாக, வங்கிகளில் வீட்டுக் கடன் மற்றும் வாகனக் கடன்களுக்கான வட்டி விகிதங்கள் வரும் ஆண்டில் கணிசமாகக் குறையும்.
அதேநேரம், நிலையான வைப்பு நிதி (FD) திட்டங்களுக்கான வட்டி விகிதங்களும் சரிவைக் காணும் என்பதால், முதலீட்டாளர்கள் அதற்கேற்பத் திட்டமிடுவது அவசியம். மற்றொரு முக்கிய மாற்றமாக, வங்கி வாடிக்கையாளர்களின் ‘கிரெடிட் ஸ்கோர்’ (Credit Score) இனி வெறும் 15 நாட்களுக்கு ஒருமுறை அப்டேட் செய்யப்படும் நடைமுறை அமலுக்கு வருகிறது. இது அவசரக் கடன் தேவைப்படுபவர்களுக்குப் பெரும் உதவியாக இருக்கும்.
அடுத்ததாக, மத்திய அரசு ஊழியர்கள் மற்றும் ஓய்வூதியதாரர்களுக்கு 2026 புத்தாண்டு மிகப்பெரிய பரிசை வழங்கவுள்ளது. நீண்டகாலமாக எதிர்பார்க்கப்பட்ட 8-வது ஊதியக் குழு ஜனவரி 1 முதல் அமல்படுத்தப்பட உள்ளது. இதன் மூலம் ஊழியர்களின் அடிப்படை ஊதியம் மற்றும் ஓய்வூதியம் 20 முதல் 35 சதவீதம் வரை உயரக்கூடும் என தெரிகிறது.
அதேவேளையில், பொதுமக்களுக்கான சில கட்டுப்பாடுகளும் தீவிரமாகின்றன. குறிப்பாக, வரும் டிசம்பர் 31-க்குள் பான் மற்றும் ஆதார் கார்டுகளை இணைக்க தவறுபவர்களின் பான் கார்டு 2026 முதல் முடக்கப்படும். மேலும், 16 வயதுக்கு உட்பட்ட சிறுவர்கள் சமூக வலைதளங்களைப் பயன்படுத்துவதில் புதிய கட்டுப்பாடுகள் மற்றும் வயதுச் சரிபார்ப்பு முறைகளை அரசு கட்டாயமாக்கவுள்ளது.
எரிபொருள் மற்றும் தொழில்நுட்பத் துறையிலும் சில அதிரடி மாற்றங்கள் காத்திருக்கின்றன. ஒருங்கிணைந்த வர்த்தகக் கொள்கையின் கீழ் சிஎன்ஜி (CNG) மற்றும் பிஎன்ஜி (PNG) எரிவாயு விலைகள் கிலோவுக்கு ரூ.2.50 வரை குறைய வாய்ப்புள்ளதாகத் தகவல்கள் தெரிவிக்கின்றன. டிஜிட்டல் பணப்பரிவர்த்தனையைப் பொறுத்தவரை, யுபிஐ (UPI) பாதுகாப்பை வலுப்படுத்த சிம் கார்டு சரிபார்ப்பு உள்ளிட்ட புதிய பாதுகாப்பு அம்சங்கள் அறிமுகமாகின்றன.
இறுதியாக, சுற்றுச்சூழல் பாதுகாப்பைக் கருத்தில் கொண்டு, மெட்ரோ நகரங்களில் காற்று மாசை அதிகப்படுத்தும் பழைய பெட்ரோல் மற்றும் டீசல் வாகனங்களுக்குத் தடை அல்லது புதிய கட்டுப்பாடுகள் விதிக்கப்பட உள்ளன. இந்த மாற்றங்கள் அனைத்தும் 2026-ஆம் ஆண்டை ஒரு நவீன மற்றும் பாதுகாப்பான ஆண்டாக மாற்றும் என எதிர்பார்க்கப்படுகிறது.
Read More : திருமணத் தடைகளுக்கு தீர்வு தரும் திருவேட்களம் முருகன்.. மெய்சிலிர்க்க வைக்கும் பாசுபதேஸ்வரர் ஆலயம்..!
