அமெரிக்காவின் இந்திய வம்சாவளியினருக்கு பெருமை சேர்க்கும் வகையில், கலிபோர்னியா மாகாணத்தில் இந்துக்கள் மற்றும் தெற்காசிய சமூகத்தினரின் முக்கியப் பண்டிகையான தீபாவளிக்கு இனி அதிகாரப்பூர்வ மாநில விடுமுறை அளிக்கப்பட்டுள்ளது. கலிபோர்னியா ஆளுநர் கவின் நியூசம் (Gavin Newsom) சட்டமன்ற மசோதாவில் கையெழுத்திட்டதன் மூலம், இந்த அறிவிப்பு சட்டமாகியுள்ளது.
இந்த வரலாற்றுச் சிறப்புமிக்க அறிவிப்பு, கலிபோர்னியாவில் வசிக்கும் சுமார் 1 மில்லியனுக்கும் அதிகமான தெற்காசிய வம்சாவளியினரிடையே பெரும் மகிழ்ச்சியை ஏற்படுத்தியுள்ளது. ஆளுநர் நியூசம் கையெழுத்திட்ட இந்தச் சட்டத்தின் கீழ், கலிபோர்னியாவில் உள்ள அரசு ஊழியர்கள், பொதுப் பள்ளிகள் மற்றும் சமூகக் கல்லூரிகளுக்கு இனி தீபாவளி அன்று விடுமுறை அளிக்கப்படும்.
இதன் மூலம், மாநிலத்தில் உள்ள இந்திய மற்றும் இந்து சமூகம், ஒளி மற்றும் நல்லிணக்கத்தின் பண்டிகையான தீபாவளியைச் சிரமமின்றிப் பங்கேற்றுக் கொண்டாட முடியும். முன்னதாக, அமெரிக்காவின் பென்சில்வேனியா மற்றும் கனெக்டிகட் மாகாணங்கள் தீபாவளியை அதிகாரப்பூர்வ விடுமுறையாக அறிவித்த நிலையில், தற்போது கலிபோர்னியா இந்தப் பட்டியலில் இணைந்துள்ளது.
கலிபோர்னியாவின் இந்தப் புதிய சட்ட முடிவுக்கு, அமெரிக்க வாழ் இந்திய மற்றும் இந்து சமூகங்கள் ஆளுநர் கவின் நியூசமுக்குத் தங்கள் பாராட்டுகளைத் தெரிவித்துள்ளன. முன்னாள் அமெரிக்க அதிபர் ஜோ பைடனின் ஆலோசகராகப் பணியாற்றிய அஜய் பூடோரியா இதுகுறித்து தனது மகிழ்ச்சியைப் பதிவு செய்துள்ளார். “தீபாவளியைக் கலிபோர்னியாவின் மாநில விடுமுறையாக மாற்றியதற்காக ஆளுநர் கவின் நியூசமுக்கு என் நன்றிகள். இந்த வரலாற்றுச் சிறப்புமிக்க மசோதாவைக் கொண்டு வந்த சட்டமன்ற உறுப்பினர்கள் ஆஷ் கல்ரா மற்றும் தர்ஷன் படேல் ஆகியோருக்கும் நன்றி. இது ஒளி, ஒற்றுமை மற்றும் பன்முகத்தன்மையின் கொண்டாட்டம்” என்று அவர் பாராட்டியுள்ளார்.
Read More : விடிய விடிய ஊற வைத்த கறிவேப்பிலை தண்ணீர்..!! வெறும் வயிற்றில் குடித்தால் கிடக்கும் அசர வைக்கும் பலன்கள்..!!
