காஷ்மீருக்குச் சிறப்பு அந்தஸ்து நீக்கப்பட்ட பிறகு லடாக் சட்டசபை இல்லாத யூனியன் பிரதேசமாக இருக்கிறது. இதற்கிடையே லடாக் பகுதியை இந்திய அரசியலமைப்பின் ஆறாவது அட்டவணையில் சேர்க்க வேண்டும், மாநில அந்தஸ்து வழங்கக்கோரி காலச்சார ஆர்வலர் சோனம் வாங்சுக் தலைமையில் கடந்த செப்டம்பர் 10ஆம் தேதி முதல் உண்ணாவிரதப் போராட்டம் நடந்து வருகிறது. இந்த போராட்டத்தில் திடீரென நேற்று வன்முறை வெடித்தது. இதில் பலர் உயிரிழந்தனர்.
போராட்டத்தின் போது, மாணவர்கள் பாதுகாப்புப் படையினரை கற்களால் தாக்கினர். கும்பல் ஒரு பாஜக அலுவலகத்தையும் ஒரு சிஆர்பிஎஃப் வாகனத்தையும் தீக்கிரையாக்கியது. லேவில் நடந்த வன்முறையை நன்கு திட்டமிடப்பட்ட சதி என்று மத்திய உள்துறை அமைச்சகம் கருதுகிறது. நிலைமையைக் கட்டுப்படுத்த மத்திய ரிசர்வ் போலீஸ் படையின் (சிஆர்பிஎஃப்) குறைந்தது 12 கம்பெனிகள் லேவுக்கு அனுப்பப்படுகின்றன. நான்கு சிஆர்பிஎஃப் கம்பெனிகள் ஏற்கனவே வந்துவிட்டன, மேலும் நான்கு கம்பெனிகள் வியாழக்கிழமைக்குள் வந்து சேரும். ஏற்கனவே அங்கு நிறுத்தப்பட்டுள்ள ஏழு கம்பெனிகளுக்கு கூடுதலாக, பாதுகாப்பை அதிகரிக்க மேலும் நான்கு ஐடிபிபி கம்பெனிகளும் நிறுத்தப்பட்டுள்ளன. தேவைப்பட்டால், லடாக்கில் மற்ற துணை ராணுவப் படைகளும் நிறுத்தப்படும்.
லே மாவட்ட நிர்வாகம் இந்திய தண்டனைச் சட்டத்தின் (IPC) பிரிவு 163 ஐ அமல்படுத்தியுள்ளது. இது ஐந்து அல்லது அதற்கு மேற்பட்ட மக்கள் கூடுவதைத் தடை செய்கிறது. அனுமதியின்றி எந்த ஊர்வலம், பேரணி அல்லது அணிவகுப்பும் இப்போது நடத்தப்படக்கூடாது. அமைதியைக் குலைக்கும் அல்லது சட்டம் ஒழுங்கைப் பாதிக்கும் அறிக்கைகளை யாரும் வெளியிடக்கூடாது என்றும் உத்தரவு தெளிவுபடுத்துகிறது. அமைதியைப் பேணுவதற்கும் நிலைமை மோசமடைவதைத் தடுப்பதற்கும் இந்த முடிவு எடுக்கப்பட்டதாக நிர்வாகம் தெரிவித்துள்ளது.
இந்தப் போராட்டங்களில் கவனிக்க வைக்கும் விஷயமே இதில் இளைஞர்கள், குறிப்பாக GEN Z தலைமுறையினர் அதிகம் பங்கேற்றிருந்தனர். சமூக வலைத்தளங்களிலும் இது தொடர்பாகப் பரவலான கருத்துகளைப் பார்க்க முடிகிறது. நெட்டிசன் ஒருவர் “ஜென் Z தலைமுறையினர் லடாக் வீதிகளில் இறங்கியுள்ளனர்” என்ற பதிவிட்டு லேவில் இருந்து ஒரு வீடியோவைப் பகிர்ந்திருந்தார். லடாக்கில் ஜென் Z போராட்டக்காரர்களே பாஜக அலுவலகத்திற்கு தீ வைத்ததாக இன்னொரு நபர் பதிவிட்டுள்ளார்.
லடாக்கின் லே பகுதியில் நடந்த போராட்டங்களில் ஏற்பட்ட வன்முறைக்குக் காங்கிரஸ் கட்சிதான் காரணம் என்று பாஜக குற்றம் சாட்டியுள்ளது. பாஜக தலைவர் அமித் மால்வியா வன்முறை தொடர்பான போட்டோக்களையும் வீடியோக்களையும் பகிர்ந்து காங்கிரஸை குற்றம் சாட்டினார். இது தொடர்பாக அவர், “லடாக்கில் கலவரத்தில் ஈடுபட்ட நபர், லே வார்டின் காங்கிரஸ் கவுன்சிலர் புன்ட்சோக் ஸ்டான்சின் செபாக் ஆவார். இவர் தான் வன்முறையைத் தூண்டிவிட்டு, பாஜக அலுவலகத்தைக் குறிவைத்து நடந்த வன்முறைக்குக் காரணமாக இருக்கிறார். இதைத் தான் ராகுல் காந்திக்கு எதிர்பார்க்கிறாரா?” என்று சாடியுள்ளார்.
முன்னதாக, காலச்சார ஆர்வலர் சோனம் வாங்சுக் ஏற்கனவே 18 மாதங்களாக தொடர்ந்து போராட்டம் நடத்தி வருகிறார் . மார்ச் 2024 இல், அவர் 21 நாள் சாகும் வரை உண்ணாவிரதம் இருந்தார், அதன் பிறகு மத்திய அரசு அவருக்கு பேச்சுவார்த்தை நடத்துவதாக உறுதியளித்தது. செப்டம்பர் 2024 இல், அவர் லேவிலிருந்து டெல்லிக்கு பேரணியாகச் சென்றார், ஆனால் தலைநகரின் எல்லையில் கைது செய்யப்பட்டார். அக்டோபர் 2024 இல் டெல்லியில் அவர் தனது உண்ணாவிரதப் போராட்டத்தை மீண்டும் தொடங்கிய பிறகு, மத்திய அரசு மீண்டும் பேச்சுவார்த்தைக்கு உறுதியளித்தது. அதே மாதத்தில், அவர் லேவில் 16 நாள் உண்ணாவிரதப் போராட்டத்தைத் தொடங்கினார், மத்திய அரசு மீண்டும் பேச்சுவார்த்தைக்கு உறுதியளித்தது. ஆகஸ்ட் 2025 இல் கார்கிலில் அவர் நடத்திய போராட்டத்திற்கு எதிர்க்கட்சி நாடாளுமன்ற உறுப்பினர்கள் மற்றும் தலைவர்களின் ஆதரவு கிடைத்தது. செப்டம்பர் 2025 இல் லேவில் அவர் மேற்கொண்ட உண்ணாவிரதம் 35 நாட்கள் தொடர்ந்தது, மேலும் உள்ளூர் அமைப்புகளிடமிருந்தும் ஆதரவைப் பெற்றது.
