தங்கத்தின் மதிப்பை அடிப்படையாகக் கொண்டு வழங்கப்படும் கடன்களுக்கு புதிய வரம்புகள் இன்று முதல் அமலுக்கு வந்துள்ளன. மத்திய நிதி அமைச்சகத்தின் வழிகாட்டுதலின்படி, வங்கிகள் மற்றும் நிதி நிறுவனங்கள் இந்த மாற்றங்களை நடைமுறைப்படுத்தத் தொடங்கியுள்ளன.
இதுவரை பொதுவான விதிமுறைகளின் கீழ் வழங்கப்பட்ட தங்கக் கடன்கள், இனி வாடிக்கையாளர்கள் கோரும் கடன் தொகையைப் பொறுத்து விகிதாச்சார அடிப்படையில் வழங்கப்பட உள்ளன. இதன் மூலம், சிறு அளவு கடன் பெறுபவர்களுக்கும், அதிக தொகை கடன் கோருபவர்களுக்கும் தனித்தனி வரம்புகள் நிர்ணயிக்கப்பட்டுள்ளன.
புதிய விதிகளின்படி, ரூ.2.5 லட்சம் வரை தங்க அடமானக் கடன் பெறுபவர்கள், தங்கள் தங்கத்தின் சந்தை மதிப்பில் அதிகபட்சம் 85 சதவீதம் வரை கடன் பெறலாம். நடுத்தர வர்க்கத்தினருக்கு சலுகை அளிக்கும் வகையில் இந்த உயர்ந்த விகிதம் நிர்ணயிக்கப்பட்டுள்ளது.
அதே நேரத்தில், ரூ.2.5 லட்சம் முதல் ரூ.5 லட்சம் வரை கடன் பெறுவோருக்கு 80 சதவீதம் வரை மட்டுமே கடன் வழங்கப்படும். மேலும், ரூ.5 லட்சத்திற்கு மேல் கடன் பெற விரும்புவோருக்கு தங்கத்தின் மதிப்பில் இருந்து 75 சதவீதம் வரை மட்டுமே கடன் வழங்கப்படும் என அறிவிக்கப்பட்டுள்ளது. இதன் மூலம் அதிக தொகை கடன்களுக்கு கட்டுப்பாடுகள் அதிகரிக்கப்பட்டுள்ளன.
உலகச் சந்தையில் தங்கத்தின் விலையில் ஏற்படும் ஏற்ற இறக்கங்களால் நிதி நிறுவனங்களுக்கு ஏற்படும் இழப்புகளைத் தவிர்க்கும் நோக்கில் இந்த முன்னெச்சரிக்கை நடவடிக்கை எடுக்கப்பட்டுள்ளதாக அதிகாரிகள் தெரிவித்துள்ளனர். தங்கத்தின் விலை திடீரென குறைந்தால், அதிக அளவில் கடன் வழங்கியிருப்பது வங்கிகளுக்கு அபாயமாக மாறக்கூடும் என்பதால் இந்த மாற்றம் அவசியமானதாக கருதப்படுகிறது.
இந்த புதிய விதிகள் அமலுக்கு வந்ததையடுத்து, அதிக தொகை கடன் பெற்று தொழில் தொடங்க திட்டமிட்டிருந்தவர்கள் மற்றும் அவசர தேவைக்காக பெரிய தொகையை எதிர்பார்த்தவர்கள் கவலையடைந்துள்ளனர். குறிப்பாக சிறு தொழில் முனைவோர் மற்றும் நடுத்தர வர்க்கத்தினர் மீது இதன் தாக்கம் இருக்கும் என நிபுணர்கள் கூறுகின்றனர்.
Read more: பெண் வாடிக்கையாளர் முன் சுய இன்பத்தில் ஈடுபட்ட இளைஞன்.. சூப்பர் மார்க்கெட்டில் நடந்த ஒழுங்கீனம்..!!
