ரயில்களில் செல்லும்போது மலைகள், பசுமையான வயல்கள் என அழகான காட்சிகளை ரசித்தவாறே ரயிலில் பயணம் மேற்கொள்வது பலருக்கும் பிடிக்கும். நாட்டில் உள்ள லட்சக்கணக்கான மக்கள் தினமும் ரயிலில் பயணம் செய்கின்றனர். அவர்களுக்கு தேவையான தேநீர், காஃபி, உணவுப் பொருட்கள், தண்ணீர் பாட்டில்கள் போன்ற அத்தியாவசியப் பொருட்கள் ரயில் நிலையங்களில் எளிதில் கிடைக்கின்றன.
ஆனால், மக்கள் கூடும் பெரிய ரயில் நிலையங்களில் கூட, அவசரத் தேவைக்கான ஒரு மருந்துக் கடை கூட இருப்பதில்லை என்பதை நீங்கள் கவனித்துள்ளீர்களா? இந்தக் கேள்விக்கான விடை மற்றும் அதற்கான காரணங்களை இப்போது விரிவாகப் பார்க்கலாம்.
மருந்துக் கடைகளுக்கு ஏன் தடை..?
இந்திய ரயில் நிலையங்களில் மருந்துக் கடைகள் இல்லாததற்கு பின்னால், கடுமையான சட்ட விதிமுறைகளும், லாபகரமான சவால்களும் முக்கியக் காரணங்களாக உள்ளன. மருந்துகளை சட்டப்பூர்வமாக விற்பனை செய்வதற்கு மிகக் கடுமையான விதிமுறைகள் உள்ளன.
ஒவ்வொரு மருந்துக் கடையிலும் கட்டாயம் உரிமம் பெற்ற மருந்தாளுநர் (Pharmacist) இருக்க வேண்டும். மருந்துகள் சரியான வெப்பநிலையிலும், மிகவும் பாதுகாப்பான இடத்திலும் சேமிக்கப்பட வேண்டும். ரயில் நிலையங்கள் போன்ற பொது இடங்களில், இந்த சுகாதார மற்றும் பாதுகாப்பு விதிகளைக் கடைப்பிடிப்பது மிகவும் கடினமான ஒன்றாகும்.
ரயில் நிலையங்களில் கடைகளுக்குரிய வாடகை மிக அதிகமாக இருக்கும். பொதுவாக, இந்த அதிக வாடகைச் சுமையைத் ஈடுகட்ட, தேநீர், சிற்றுண்டி போன்ற பொருட்களின் விலையை உயர்த்த முடியும். ஆனால், மருந்துகளின் விலையைச் சட்ட ரீதியாக உயர்த்துவது சாத்தியமற்றது. அத்துடன், பெரும்பாலான பயணிகள் தங்களுக்குத் தேவையான மருந்துகளை முன்கூட்டியே தங்களுடன் எடுத்துச் செல்வதால், ரயில் நிலையத்தில் மருந்துக் கடைகள் நடத்துவது லாபகரமான வணிகமாக இருப்பதில்லை.
எப்போதும் மக்கள் கூட்டம், அடிக்கடி நிகழும் நகர்வுகள் போன்ற காரணங்களால், அதிக மதிப்புள்ள மருந்துகளின் பாதுகாப்பான சேமிப்பு மற்றும் கண்காணிப்பு இங்கு ஒரு சவாலாக உள்ளது. ரயில் நிலையங்களில் மருந்துக் கடைகள் இல்லாததால், பயணிகளின் உடல்நலன் மற்றும் பாதுகாப்பை ரயில்வே புறக்கணிக்கிறது என்று அர்த்தம் கிடையாது. மாறாக, பயணிகளின் அவசர மருத்துவத் தேவைகளைப் பூர்த்தி செய்ய ரயில்வே நிர்வாகம் மாற்று ஏற்பாடுகளைச் செய்துள்ளது.
கிட்டத்தட்ட அனைத்துப் பெரிய ரயில் நிலையங்களிலும் முதலுதவி அறை (First Aid Room) அல்லது மருத்துவ மையம் செயல்பட்டு வருகிறது. இங்கு அவசர காலங்களில் பயணிகளுக்கு உடனடி சிகிச்சை அளிக்க பயிற்சி பெற்ற ஊழியர்கள் மற்றும் மருத்துவர்கள் உள்ளனர். மருத்துவ உதவி தேவைப்படும்போது, அதைப் பயணிகள் பெறுவதை உறுதிசெய்ய ரயில்வே நிர்வாகம் சிறப்பு ஏற்பாடுகளை மேற்கொள்கிறது.
ஆகவே, கடுமையான சட்ட விதிமுறைகள், லாபத்தில் உள்ள சிக்கல்கள் மற்றும் பாதுகாப்புச் சவால்கள் ஆகியவையே இந்திய ரயில் நிலையங்களில் மருந்துக் கடைகள் இல்லாமல் இருப்பதற்கு முக்கியக் காரணங்களாக உள்ளன. எனினும், ரயில்வே நிர்வாகம் பயணிகளின் பாதுகாப்பை உறுதி செய்ய முதலுதவி மற்றும் மருத்துவ உதவிகளுக்கு முக்கியத்துவம் கொடுக்கிறது.
