தமிழ்நாடு அரசின் முன்னோடி திட்டமான ‘கலைஞர் மகளிர் உரிமைத்தொகை’ திட்டம், தற்போது புதிய மைல்கல்லை எட்டியுள்ளது. கடந்த டிசம்பர் 12-ஆம் தேதி சென்னையில் நடைபெற்ற “வெல்லும் தமிழ் பெண்கள்” மாநாட்டில், முதலமைச்சர் மு.க.ஸ்டாலின் கூடுதலாக 19.64 லட்சம் மகளிருக்கு இத்திட்டத்திற்கான அட்டைகளை வழங்கினார். இதன் மூலம், தமிழகம் முழுவதும் பயன்பெறும் பெண்களின் எண்ணிக்கை 1.30 கோடியாக உயர்ந்துள்ளது. அதே மேடையில், வரும் காலங்களில் இந்த உரிமைத் தொகை உயர்த்தப்படும் என்ற மகிழ்ச்சியான அறிவிப்பையும் முதலமைச்சர் வெளியிட்டார்.
இத்திட்டம் விரிவுபடுத்தப்பட்டாலும், தகுதியிருந்தும் சில பெண்களுக்கு இன்னும் பணம் வரவில்லை என்ற புகார்கள் ஆங்காங்கே எழுந்து வருகின்றன. இத்தகைய குறைகளைக் களையவும், பெண்கள் அரசு அலுவலகங்களுக்கு அலைவதைத் தவிர்க்கவும் தற்போது நவீனத் தீர்வு ஒன்றை அரசு அறிமுகப்படுத்தியுள்ளது. அதன்படி, இனி தகுதியுள்ள விண்ணப்பதாரர்கள் ஒரு ‘கியூஆர் கோடு’ (QR Code) அல்லது பிரத்யேக இணையதளம் வாயிலாக தங்கள் புகார்களை நேரடியாகப் பதிவு செய்யலாம்.
விண்ணப்பித்தும் பணம் கிடைக்காத பெண்கள், அரசின் அதிகாரப்பூர்வ இணையதளத்தில் தங்கள் விவரங்களைப் பதிவேற்ற வேண்டும். இதில் விண்ணப்பதாரரின் பெயர், குடும்பத் தலைவரின் பெயர், ரேஷன் அட்டை எண் மற்றும் பதிவு செய்யப்பட்ட கைபேசி எண் ஆகிய தகவல்களை வழங்க வேண்டும். இந்தத் தகவல்களை உள்ளிட்டவுடன், உங்கள் கைபேசிக்கு ஒரு ரகசிய எண் (OTP) அனுப்பப்படும். அந்த எண்ணை உறுதி செய்த பிறகு, உங்கள் புகார் அதிகாரப்பூர்வமாக பதிவு செய்யப்படும்.
பதிவு செய்யப்படும் புகார்கள் அனைத்தும் அந்தந்தப் பகுதி வருவாய் அலுவலர்கள் மூலம் நேரடியாக சரிபார்க்கப்படும். கள ஆய்வின் முடிவில், விண்ணப்பதாரர் அரசின் விதிகளின்படி தகுதியானவர் என்பது உறுதி செய்யப்பட்டால், உடனடியாகத் திட்டத்தில் சேர்க்கப்பட்டு நிதி ஒதுக்கப்படும். இதற்கான அறிவிப்பு விண்ணப்பதாரரின் கைபேசிக்கு குறுஞ்செய்தியாக அனுப்பப்படும்.
இந்த டிஜிட்டல் முறை மூலம் இடைத்தரகர்கள் இன்றி, தகுதியுள்ள ஒவ்வொரு பெண்ணுக்கும் உரிமைத் தொகை சென்றடைவதை அரசு உறுதி செய்துள்ளது. இதனால் நீண்ட தூரம் பயணம் செய்து அதிகாரிகளைப் பார்க்க வேண்டிய அவசியமும் குறைந்துள்ளது. தகுதியான பயனாளிகள் அனைவரும் விரைவில் இந்த நிதியைப் பெறுவார்கள் என துறை சார்ந்த அதிகாரிகள் நம்பிக்கை தெரிவித்துள்ளனர்.
Read More : செங்கோட்டையன் போட்ட மாஸ்டர் பிளான்..!! முடிவை மாற்றினார் ஓபிஎஸ்..!! தவெகவுடன் மெகா கூட்டணி..!!
