தமிழ் சினிமாவில் ஒரு காலத்தில் துணை நடிகராக இருந்த சூரி ஹீரோவாக மாறிவிட்டார். வெண்ணிலா கபடிகுழு படத்தில் பரோட்டா காட்சியில் நடித்து மக்களின் மனதில் நீங்கா இடம் பிடித்தவர். நகைச்சுவை வேடங்களின் மூலம் ரசிகர்கள் மனதில் தனி இடம் பிடித்துள்ளார். இன்று தனக்கென ஒரு தனித்துவமான அடையாளத்தையும் அவர் உருவாக்கியுள்ளார்.
கிராமத்தில் இருந்து சினிமா கனவுடன் வந்து, வாய்ப்பு இல்லாமல் அலையும் காலத்தில் இருந்து, இன்று முக்கிய இயக்குநர்கள் கதாநாயகனாகத் தேர்ந்தெடுக்கும் அளவிற்கு வளர்ந்திருக்கும் சூரியின் பயணம், திரைப்படக் கதை போலவே இருக்கிறது.
காமெடியனாக இருந்த சூரி விடுதலை, கருடன், மாமன் படங்களில் முன்னணி நாயகனாக நடித்தார். ‘விடுதலை’ முதல் ‘மாமன்’ வரை சூரியின் கதாபாத்திரங்கள் ரசிகர்களை வெகுவாக கவர்ந்தது. அவர் நடித்த மாமன் படம், பாரம்பரியமான கதையம்சம் கொண்டிருந்தாலும், சூரியின் இயற்கையான நடிப்பால் மேலும் உயர்ந்தது. இது ரசிகர்கள் மட்டுமல்லாது விமர்சகர்களிடமும் நல்ல வரவேற்பைப் பெற்றது.
இந்த வெற்றியின் தொடர்ச்சியாக, சூரி தற்போது ‘ஏழு கடல் ஏழு மலை’ மற்றும் ‘மண்டாடி’ போன்ற புதிய படங்களில் முக்கிய வேடங்களில் நடித்து வருகிறார். இந்த படங்கள், திரையரங்கில் வெளியாவதற்குள் ஏற்கனவே ரசிகர்களிடையே எதிர்பார்ப்பு அதிகரித்துள்ளது.
இந்நிலையில் தான், ஆகஸ்ட் 27-ஆம் தேதியான இன்று தனது 48-வது பிறந்த நாளை சூரி கொண்டாடுகிறார். அவருக்கு திரையுலகினர், ரசிகர்கள் என பலரும் வாழ்த்து தெரிவித்து வருகின்றனர். இவர் வெறும் ஹீரோவாக மட்டுமல்ல, பணம் மற்றும் பரிமாணத்தில் சினிமாவிற்கு அப்பாற்பட்ட பல துறைகளிலும் தன் தாக்கத்தை ஏற்படுத்தியுள்ளார்.
தற்போது வெளிவந்துள்ள தகவலின்படி, சூரியின் மொத்த சொத்து மதிப்பு ரூ.70 கோடிக்கு மேல் என்று கூறப்படுகிறது. மேலும், ஒரு திரைப்படத்திற்காக அவர் ரூ.5 கோடி வரை சம்பளம் பெறுகிறார் எனத் தகவல்கள் வெளியாகியுள்ளன. சினிமா மட்டுமல்லாமல், வணிகத் துறையிலும் வெற்றிகரமாக செயல்பட்டு வருகிறார் சூரி. மதுரையில் ‘அம்மன் உணவகம்’ என்ற பெயரில் ஓட்டல் ஒன்றை நடத்தி வருகிறார்.
நகைச்சுவைக்கு மட்டுமே கட்டுப்படாமல், தனது நடிப்பு திறனைத் தொடர்ந்து விரிவாக்கிக் கொண்டிருக்கும் சூரி, தமிழ்த் திரை உலகில் ஒரு புதிய வகை ஹீரோவாக வளர்ந்து வருகிறார். இச்சமயம், அவரின் பிறந்த நாளில் ரசிகர்கள் மட்டுமல்ல, திரையுலகமும் ஒரு சிரிப்பு மன்னனை வலிமையான கதாநாயகனாக பாராட்டிக்கொண்டு இருக்கிறது.
