இந்தியாவின் மிக முக்கிய அடையாள ஆவணமாக திகழும் ஆதார் அட்டை, இன்றைய காலகட்டத்தில் வங்கிப் பரிவர்த்தனைகள் முதல் அரசின் நலத்திட்டங்கள் வரை அனைத்திற்கும் ஒரு திறவுகோலாக உள்ளது. பொதுவாக, திருமணத்திற்குப் பிறகு பெண்கள் தங்களின் அடையாள சான்றுகளில் தந்தையின் பெயருக்குப் பதிலாக கணவரின் பெயரை மாற்ற விரும்புவது வழக்கம். இதனை எளிமைப்படுத்தும் வகையில், இந்திய தனித்துவ அடையாள ஆணையம் (UIDAI) இணையதளம் வழியாகவும், நேரடியாகவும் விவரங்களைப் புதுப்பிக்கும் வசதியை வழங்கியுள்ளது.
தொழில்நுட்ப வசதி கொண்டவர்கள் வீட்டிலிருந்தபடியே UIDAI-ன் அதிகாரப்பூர்வ இணையதளத்திற்கு சென்று, தங்களின் ஆதார் எண் மற்றும் பதிவு செய்யப்பட்ட மொபைல் எண்ணிற்கு வரும் OTP-யைப் பயன்படுத்தி உள்நுழையலாம். அதில் ‘ஆதார் ஆன்லைன் அப்டேட்’ (Update Aadhaar Online) என்ற பிரிவை தேர்ந்தெடுத்து, உறவுமுறை விவரங்களில் கணவரின் பெயரைப் பதிவிட வேண்டும். இதற்கு ஆதாரமாக திருமணச் சான்றிதழ் அல்லது உரிய ஆவணங்களைப் பதிவேற்றம் செய்து விண்ணப்பத்தை முடிக்கலாம்.
விண்ணப்பம் சமர்ப்பிக்கப்பட்டதும் வழங்கப்படும் ‘சர்வீஸ் ரிக்வஸ்ட் நம்பர்’ (SRN) மூலம் அதன் நிலையை அவ்வப்போது அறிந்து கொள்ள முடியும். இந்த முறையில் அதிகபட்சமாக 10 வேலை நாட்களுக்குள் மாற்றங்கள் பிரதிபலிக்கும். இணைய வசதி இல்லாதவர்கள் அல்லது கைரேகை சரிபார்ப்பு தேவைப்படுபவர்கள், அருகில் உள்ள ஆதார் சேவை மையங்களை நாடலாம். அங்கு வழங்கப்படும் திருத்தப் படிவத்தைப் பூர்த்தி செய்து, திருமணச் சான்றிதழ், பாஸ்போர்ட் அல்லது வாக்காளர் அடையாள அட்டை போன்ற ஆவணங்களின் நகல்களை சமர்ப்பிக்க வேண்டும். மையத்தில் பயோமெட்ரிக் சரிபார்ப்பு முடிந்ததும் உங்களுக்கு ஒரு ரசீது வழங்கப்படும். இந்த முறையில் விவரங்கள் புதுப்பிக்கப்பட சுமார் 20 முதல் 25 நாட்கள் வரை ஆகலாம்.
ஆதார் விவரங்களை மாற்றும்போது மொபைல் எண் செயல்பாட்டில் இருப்பது மிகவும் அவசியம். அதேபோல், ஆவணங்களில் ஏதேனும் முரண்பாடுகள் இருந்தாலோ அல்லது தவறான தகவல்கள் அளிக்கப்பட்டாலோ விண்ணப்பம் நிராகரிக்கப்பட வாய்ப்புள்ளது. எனவே, ஆவணங்களை தெளிவாக சமர்ப்பித்து இந்த சேவையை பயன்படுத்திக் கொள்ளுமாறு அறிவுறுத்தப்படுகிறது.
