நேற்று உச்ச நீதிமன்றத்திற்குள் இந்திய தலைமை நீதிபதி (CJI) பி.ஆர். கவாய் மீது செருப்பு வீச முயன்ற 71 வயது வழக்கறிஞர் ராகேஷ் கிஷோர், தனது செயல்களுக்கு எந்த வருத்தமும் தெரிவிக்கவில்லை.. தான் சிறையை எதிர்கொள்ளத் தயாராக இருப்பதாகவும், ஒரு தெய்வீக சக்தி தன்னை செயல்பட கட்டாயப்படுத்தியதாகவும் தெரிவித்துள்ளார்..
மயூர் விஹாரில் வசிக்கும் கிஷோர், தனக்கு எந்த அரசியல் தொடர்புகளும் இல்லை என்பதை தெளிவுபடுத்தினார். கிஷோர் 2009 இல் டெல்லி பார் கவுன்சிலில் பதிவு செய்திருந்தார். உச்ச நீதிமன்ற பார் அசோசியேஷன், ஷாஹ்தாரா பார் அசோசியேஷன் மற்றும் டெல்லி பார் கவுன்சிலின் உறுப்பினர் அட்டைகளை எடுத்துச் சென்றது கண்டுபிடிக்கப்பட்டது. மத்தியப் பிரதேசத்தின் கஜுராஹோவில் உள்ள ஜவாரி கோவிலில் தலை துண்டிக்கப்பட்ட விஷ்ணு சிலையை மீட்டெடுப்பது குறித்து சமீபத்தில் நடந்த விசாரணையின் போது கவாய் தெரிவித்த கருத்துகளால் தான் கோபமடைந்து செருப்பை வீசியதாக கூறியுள்ளார்..
“நான் சிறையில் இருந்திருந்தால் நன்றாக இருந்திருக்கும். நான் செய்ததில் என் குடும்பத்தினர் மிகவும் அதிருப்தி அடைந்துள்ளனர். அவர்களால் புரிந்து கொள்ள முடியவில்லை,” என்று கிஷோர் தெரிவித்துள்ளார்..
விஷ்ணு சிலை வழக்கு குறித்து பேசிய அவர் “அந்தத் தீர்ப்புக்குப் பிறகு என்னால் தூங்க முடியவில்லை.. அத்தகைய அவமானத்திற்குப் பிறகு நான் எப்படி ஓய்வெடுக்க முடியும் என்று சர்வவல்லமையுள்ளவர் ஒவ்வொரு இரவும் என்னிடம் கேட்டுக்கொண்டிருந்தார்.” என்று தெரிவித்தார்..
மொரிஷியஸில் தலைமை நீதிபதியின் உரையைக் கேட்ட பிறகு தனது விரக்தி அதிகரித்ததாகவும் கிஷோர் கூறினார். அங்கு கவாய் “இந்தியாவின் சட்ட அமைப்பு புல்டோசரின் ஆட்சியின் கீழ் அல்ல, சட்டத்தின் ஆட்சியின் கீழ் செயல்படுகிறது” என்று கூறியிருந்தார்.
உச்ச நீதிமன்ற பதிவேட்டில் குற்றச்சாட்டுகளை சுமத்த வேண்டாம் என்று முடிவெடுத்த பிறகு கிஷோர் விடுவிக்கப்பட்டதை டெல்லி காவல்துறை உறுதிப்படுத்தியது. சம்பவத்தைத் தொடர்ந்து அவர் மூன்று மணி நேரம் விசாரிக்கப்பட்டார்.
உச்ச நீதிமன்றத்திற்குள் தலைமை நீதிபதி மீது தாக்குதல் முயற்சி
நேற்று தலைமை நீதிபதி மற்றும் நீதிபதி கே. வினோத் சந்திரன் தலைமையிலான அமர்வு வழக்கறிஞர்கள் தங்கள் வழக்குகளைப் பற்றிப் பேசுவதைக் கேட்டுக்கொண்டிருந்தபோது இந்தத் தாக்குதல் நடந்தது. அந்த நேரத்தில், கிஷோர் திடீரென பெஞ்சை அணுகி, தனது ஷூவை கழற்றி, நீதிபதிகள் மீது வீச முயன்றார்.
பாதுகாப்புப் பணியாளர்கள் விரைவாகச் செயல்பட்டு, செருப்பு யார் மீதும் படாதவாறு தடுத்தனர். கிஷோர் உடனடியாக நீதிமன்ற அறையிலிருந்து வெளியே அழைத்துச் செல்லப்பட்டு, “சனாதன தர்மத்தை அவமதிப்பதை இந்தியா பொறுத்துக்கொள்ளாது என்று கூச்சலிட்டார்.
இடையூறு இருந்தபோதிலும், தலைமை நீதிபதி கவாய் அமைதியாக இருந்தார்.. மேலும் “இதனால் எல்லாம் திசைதிருப்பப்படாதீர்கள். நாங்கள் திசைதிருப்பப்படவில்லை. இவை என்னைப் பாதிக்காது” என்று கூறி நீதிமன்றத்தை உறுதி செய்தார். கிஷோரின் செயலுக்குப் பின்னால் உள்ள சரியான காரணங்கள் அப்போது முழுமையாகத் தெளிவாகத் தெரியவில்லை.
பின்னணி: விஷ்ணு சிலை சர்ச்சை
மத்தியப் பிரதேசத்தில் உள்ள யுனெஸ்கோ உலக பாரம்பரிய கஜுராஹோ கோயில் வளாகத்தின் ஒரு பகுதியாக இருக்கும் ஜவாரி கோவிலில் 7 அடி விஷ்ணு சிலையை மீட்டெடுப்பது குறித்த செப்டம்பர் விசாரணையின் போது தலைமை நீதிபதி கவாயின் கருத்துக்கள் காரணமாக கோபமான கிஷோர் இந்த தாக்குதலை நடத்தி உள்ளார்.
தலைமை நீதிபதி தலைமையிலான அமர்வு, சிலையை புனரமைத்து மீண்டும் நிறுவக் கோரிய மனுவை நிராகரித்தது. இந்த மனுவை “விளம்பர நல வழக்கு” என்று குறிப்பிட்ட கவாய், “இது முற்றிலும் விளம்பர நல வழக்கு. கடவுளிடமே சென்று ஏதாவது செய்யச் சொல்லுங்கள். நீங்கள் விஷ்ணுவின் தீவிர பக்தர் என்று நீங்கள் கூறினால், நீங்கள் பிரார்த்தனை செய்து தியானம் செய்யுங்கள்” என்று குறிப்பிட்டார்.
“இது ஒரு தொல்பொருள் கண்டுபிடிப்பு, ASI அத்தகைய செயலைச் செய்ய அனுமதிக்குமா இல்லையா, பல்வேறு சிக்கல்கள் உள்ளன,” என்று தலைமை நீதிபதி கூறினார். “இதற்கிடையில், நீங்கள் சைவ மதத்தை வெறுக்கவில்லை என்றால், நீங்கள் அங்கு சென்று வழிபடலாம்; கஜுராஹோவில் மிகப்பெரிய சிவலிங்கம் ஒன்று உள்ளது” என்று தலைமை நீதிபதி மேலும் கூறினார்.
நீதிபதியின் இந்த கருக்குகளுக்கு ஆன்லைனில் கடும் விமர்சனங்கள் எழுந்தனன். திபதி பின்னர் இதுகுறித்து விளக்கம் அளித்த “அனைத்து மதங்களையும்” மதிப்பதாக தெளிவுபடுத்தினார். விஷ்ணு சிலை விவகாரம் குறித்த தனது கருத்துகள் தவறாக சித்தரிக்கப்பட்டதாக தலைமை நீதிபதி கூறினார். “நான் கூறிய கருத்துக்கள் சமூக ஊடகங்களில் தவறாக சித்தரிக்கப்பட்டுள்ளது.. நான் அனைத்து மதங்களையும் மதிக்கிறேன்” என்று கூறியிருந்தார்..
