நமது உடலில் உள்ள இரண்டு சிறுநீரகங்கள் மனித உடலின் மிக முக்கியமான உறுப்புகளாகக் கருதப்படுகின்றன. அவை நாளும் நிமிடமும் இடைவிடாமல் செயல்பட்டு, இரத்தத்தில் கலந்திருக்கும் நச்சுப் பொருட்கள், கழிவுப் பொருட்கள் மற்றும் அதிகப்படியான நீரை சிறுநீரின் மூலம் வெளியேற்றுகின்றன. இதன் மூலம் உடலின் உள்ளக சூழல் சுத்தமாகக் காப்பாற்றப்படுகிறது.
சிறுநீரகங்கள் இந்தப் பணியை மட்டும் செய்யவில்லை. உடலின் இரத்த அழுத்தத்தை கட்டுப்படுத்தும் ஹார்மோன்களை ஒழுங்குபடுத்துவதிலும் அவை முக்கிய பங்கு வகிக்கின்றன. மேலும், சோடியம், பொட்டாசியம், கால்சியம் போன்ற தாதுக்கள் உடலில் சரியான அளவில் இருக்கச் செய்வதற்கும் சிறுநீரகங்களே காரணம். இந்த தாது சமநிலை பாதிக்கப்பட்டால், தசை பலவீனம், இதயத் துடிப்பு சீர்கேடு போன்ற பிரச்சினைகள் ஏற்படக்கூடும்.
இத்தகைய முக்கிய பணிகளைச் செய்யும் சிறுநீரகங்கள் சரியாகச் செயல்படவில்லை என்றால், உடலுக்குள் நச்சுகள் மெதுவாக குவியத் தொடங்கும். இதன் விளைவாக, சோர்வு, வீக்கம், வாந்தி, மூச்சுத்திணறல், உயர் இரத்த அழுத்தம் போன்ற பல்வேறு உடல்நலப் பிரச்சினைகள் ஒவ்வொன்றாக தோன்றும். இந்த காரணத்தால், சிறுநீரக நோய்களை ஆரம்பக் கட்டத்திலேயே கண்டறிதல் மிகவும் அவசியம். ஆரம்ப நிலையில் கண்டறியப்பட்டால், சரியான சிகிச்சை மற்றும் வாழ்க்கை முறை மாற்றங்கள் மூலம் நோயின் தீவிரத்தை கட்டுப்படுத்த முடியும்.
சிறுநீரக செயலிழப்பு அறிகுறிகள்: சிறுநீரகப் பிரச்சனைகள் ஆரம்பத்தில் லேசான அறிகுறிகளுடன் தோன்றலாம், ஆனால் புறக்கணிக்கப்பட்டால், அவை கடுமையான சிக்கல்களுக்கு வழிவகுக்கும். கவனிக்க வேண்டிய 5 முக்கிய எச்சரிக்கை அறிகுறிகளைப் பற்றி இப்போது அறிந்து கொள்வோம்.
சோர்வு மற்றும் பலவீனம்: சிறுநீரகங்கள் சரியாக செயல்படவில்லை என்றால், உடலுக்குள் நச்சுகள் சேரத் தொடங்கும். இதன் காரணமாக, போதுமான தூக்கம் இருந்தும் எப்போதும் சோர்வாகவும், உடல் பலவீனமாகவும்
உணரலாம். இது சிறுநீரக செயல்பாடு குறைவதற்கான ஒரு ஆரம்ப அறிகுறியாக இருக்கலாம்.
வீக்கம் (எடிமா): சிறுநீரகங்கள் அதிகப்படியான திரவத்தை வெளியேற்ற முடியாத நிலையில், கால்கள், கைகள், கண் சுற்று மற்றும் முகம் போன்ற பகுதிகளில் வீக்கம் தோன்றும். காலை நேரத்தில் முக வீக்கம் அதிகமாகக் காணப்பட்டால், கவனம் தேவை.
சிறுநீரில் ஏற்படும் மாற்றங்கள்: சிறுநீரகங்களின் நிலையை அறிய சிறுநீர் ஒரு முக்கியக் குறியீடாகும். அடர் நிற சிறுநீர், நுரை அல்லது குமிழி போன்ற தோற்றம், அடிக்கடி சிறுநீர் கழிக்க வேண்டிய அவசியம், எரிச்சல் அல்லது சிரமம் போன்ற மாற்றங்கள் சிறுநீரகப் பிரச்சனைகளை சுட்டிக்காட்டலாம்.
சுவாசிப்பதில் சிரமம்: சிறுநீரகங்கள் திரவத்தை சரியாக வடிகட்டவில்லை என்றால், அந்த திரவு நுரையீரலில் சேரும் வாய்ப்பு உள்ளது. இதனால், மூச்சுத்திணறல் சுவாசிக்க கஷ்டமாக உணர்வு ஏற்படலாம். இது ஒரு முக்கிய எச்சரிக்கை அறிகுறியாகும்.
வறண்ட சருமம், அரிப்பு: சிறுநீரக நோயால் இரத்தத்தில் தாதுக்களின் சமநிலை பாதிக்கப்படும். இதன் விளைவாக, சருமம் அதிகமாக வறண்டு போகும், அடிக்கடி அரிப்பு ஏற்படும். இது பொதுவாக சிறுநீரக நோயின் கடைசி கட்டங்களில் அதிகமாக தெரியும்.
இந்த அறிகுறிகள் எப்போதும் தீவிரமாகத் தோன்றாமல் போகலாம், ஆனால் அவற்றைப் புறக்கணிப்பது ஆபத்தானது. சிறுநீரின் நிறத்தில் ஏற்படும் மாற்றம் மற்றும் சுவாசிப்பதில் சிரமம் போன்றவை இதயம் அல்லது நுரையீரல் பிரச்சினைகள் போல் தோன்றினாலும், அடிப்படைக் காரணம் சிறுநீரகங்களாக இருக்கலாம். எனவே, நீங்கள் ஒரு சிறிய மாற்றத்தைக் கண்டாலும், மருத்துவரை அணுகுவது நல்லது. நோய் மோசமடைவதற்கு முன்பு சிகிச்சையைத் தொடங்க ஆரம்பகால சோதனைகள் உங்களுக்கு உதவும்.
Read more: ஆரம்ப சம்பளம் ரூ.50,925.. மத்திய அரசின் காப்பீடு நிறுவனத்தில் வேலை..!! எப்படி விண்ணப்பிப்பது..?
