தற்போது தங்கம் மற்றும் வெள்ளியின் விலை வரலாறு காணாத ஏற்ற இறக்கத்துடன் காணப்படுவதால், நடுத்தர மக்கள் மத்தியில் அதிர்ச்சி நிலவுகிறது. திருமணம் மற்றும் பண்டிகை காலங்கள் நெருங்கும் நிலையில், இந்த விலை உயர்வு கவலையை ஏற்படுத்தியுள்ளது.
இந்நிலையில் தங்கம், வெள்ளி உலோகங்களுக்குப் பிறகு, மற்றொரு அத்தியாவசிய உலோகமான தாமிரத்திற்கு (Copper) எதிர்காலத்தில் வரலாறு காணாத தேவை அதிகரித்து, அதன் விலை உயரும் என சந்தை வல்லுநர்கள் கணித்துள்ளனர்.
உலகளவில் தாமிர விலைகள் உயரத் தொடங்கியுள்ளதற்கு முக்கிய காரணம் இந்தோனேசியாவில் உள்ள கிராஸ்பெர்க் சுரங்கத்தில் உற்பத்தி முழுமையாக நிறுத்தப்பட்டதே ஆகும். உலகின் 2-வது பெரிய செப்புச் சுரங்கத்தில் ஏற்பட்டுள்ள இந்த உற்பத்தி தடை, உலகச் சந்தையில் கடுமையான விநியோகப் பற்றாக்குறையை ஏற்படுத்தும் என்ற அச்சத்தை எழுப்பியுள்ளது.
பிஎம்ஓ கேபிடல் மார்க்கெட்ஸ் அறிக்கையின்படி, 2026ஆம் ஆண்டிற்கான உற்பத்தியில் 35% குறைப்பு ஏற்பட வாய்ப்புள்ளது. மேலும், கிராஸ்பெர்க் சுரங்கம் 2027 ஆம் ஆண்டு வரை அதன் முந்தைய உற்பத்தி நிலைக்குத் திரும்ப வாய்ப்பில்லை என்றும் கூறப்படுகிறது. இதனால் வரும் மாதங்களில் தாமிரத்தின் விலை கடுமையாக உயரும் என்று நம்பப்படுகிறது.
ராய்ட்டர்ஸ் அறிக்கையின்படி, கோல்ட்மேன் சாக்ஸ் (Goldman Sachs) நிறுவனம், 2025-ல் 2.5 மில்லியன் டன்கள் முதல் 2.6 மில்லியன் டன்கள் வரையும், 2026-ல் 2.7 மில்லியன் டன்கள் வரையும் உலகளாவிய செப்பு விநியோகத்தில் பற்றாக்குறை இருக்கும் என தனது முன்னறிவிப்பை குறைத்துள்ளது. இந்த விநியோகப் பற்றாக்குறை காரணமாக, டிசம்பர் 2025ஆம் ஆண்டுக்குள் தாமிரத்தின் விலை $10,500 வரை அதிகரிக்க வாய்ப்புள்ளது.
உள்நாட்டுத் தரகு நிறுவனமான மோதிலால் ஓஸ்வால் கூற்றுப்படி, தாமிரத்திற்கான நீண்ட கால சந்தை எதிர்பார்ப்பு மிகவும் வலுவாக உள்ளது. இதற்கு காரணம், உலகப் பொருளாதாரங்கள் தற்போது கார்பன் நீக்கம், மின்மயமாக்கல் மற்றும் டிஜிட்டல் மயமாக்கல் ஆகியவற்றை நோக்கி வேகமாக நகர்வதே ஆகும். இந்த மாற்றங்களின்போது தாமிரத்தின் தேவை பல மடங்கு அதிகரிக்கும்.
இதன் காரணமாக, இந்தியச் சந்தையில் எம்சிஎக்ஸ் பரிமாற்றத்தில் ஒரு கிலோ தாமிரத்தின் விலை ரூ.1,080ஐ எட்டக்கூடும் என அந்நிறுவனம் கணித்துள்ளது. தற்போது உலகளாவிய தாமிர நுகர்வில் சீனா சுமார் 60% பங்களிக்கிறது. அங்குள்ள கிரிட் நவீனமயமாக்கல் திட்டங்களும், சூரிய மின் சக்தி திட்டங்களும் தாமிரத்தின் தேவையை அதிகரித்துள்ளன. இதைவிட முக்கியமாக, அதிகரித்து வரும் மின்சார வாகனங்களின் (EV) புரட்சி தாமிரத்தின் தேவையை அடுத்த கட்டத்திற்கு கொண்டு செல்கிறது.
Read More : தேன் இருந்தால் போதும்..!! சளியை உடனே விரட்டலாம்..!! இப்படி சாப்பிட்டு பாருங்க..!! செம ரிசல்ட்..!!
