உடல் எடையை குறைக்கும் டயட்டில் இருப்பவர்கள், இனி சிரமப்பட வேண்டியதில்லை. ருசியான உணவுகளுடன் உங்கள் எடையைக் கட்டுக்குள் வைக்க ஒரு சிறந்த வழி இருக்கிறது. ஆம், உடல் எடையைக் குறைக்கும் பயணத்தில் உங்களுக்கு உதவும் சில அற்புதமான உணவுப் பொருட்களை உங்கள் தினசரி உணவில் சேர்த்துக் கொள்வதன் மூலம், தேவையற்ற கொழுப்பைக் கரைப்பது சுலபமாகும். அத்தகைய ஊட்டச்சத்து நிறைந்த, ஆனால் எளிதில் கொழுப்பைக் கரைக்கும் பண்புகள் கொண்ட ஒரு அத்தியாவசியப் பொருள் தான் கொள்ளு.
சாதாரணமாக, கொள்ளு விதைகளைக் கொண்டு கஞ்சி அல்லது கடையல் செய்து சாப்பிடுவது வழக்கம். ஆனால், இன்னும் கூடுதல் சுவையுடன், அனைவரும் விரும்பும் வகையில் இதை ஆரோக்கியமான உணவாக மாற்ற விரும்பினால், சத்தான கொள்ளு சாம்பார் செய்து பாருங்கள். இது காலை உணவான இட்லி, தோசை மட்டுமின்றி, மதிய உணவு சாதத்துடனும் சேர்த்துச் சாப்பிட மிகவும் அற்புதமாக இருக்கும். பெரியவர்கள் முதல் குழந்தைகள் வரை அனைவரும் விரும்பிச் சாப்பிடும் இந்த சாம்பார், ஆரோக்கியத்தை மேம்படுத்தும் ஒரு எளிய வழியாகும். எனவே, உடல் எடையை குறைக்கும் கொள்ளு சாம்பாரை வீட்டிலேயே எளிதில் தயாரிக்கும் முறையை இப்போது பார்க்கலாம்.
தேவையான பொருட்கள் :
கொள்ளு: 50 கிராம்
துவரம் பருப்பு: 50 கிராம்
கத்திரிக்காய்: 1/4 கிலோ (சிறு துண்டுகளாக)
முருங்கைக்காய்: 1 (துண்டுகளாக)
தக்காளி: 2 (நறுக்கியது)
பச்சை மிளகாய்: 1 (நடுவில் கீறியது)
தேங்காய் (துருவியது): 1/2 கப்
புளி: சிறிய நெல்லிக்காய் அளவு (ஊற வைத்து சாறு எடுக்கவும்)
சாம்பார் தூள்: 1 1/2 டீஸ்பூன்
மஞ்சள் தூள்: 1/4 டீஸ்பூன்
நல்லெண்ணெய்: தாளிக்க 1 டேபிள் ஸ்பூன்
சமையல் எண்ணெய்: 1 டேபிள் ஸ்பூன்
உப்பு: தேவையான அளவு
தாளிப்பதற்கு:
நல்லெண்ணெய்: 1 டேபிள் ஸ்பூன்
கடுகு: 1/2 டீஸ்பூன்
உளுத்தம் பருப்பு: 1/2 டீஸ்பூன்
வெங்காயம்: 1 (பொடியாக நறுக்கியது)
கறிவேப்பிலை: 1 கொத்து
செய்முறை :
முதலில், அடுப்பில் ஒரு வாணலியை வைத்து, கொள்ளு விதைகளைச் சேர்த்து மிதமான தீயில் நிறம் மாறும் வரை வறுத்து தனியே ஒரு தட்டில் வைத்துக் கொள்ளவும். பின்னர் அதே வாணலியில் துவரம் பருப்பையும் சேர்த்து லேசாக வறுத்து தனியே எடுத்து ஆறவிடவும். இரண்டு பருப்புக்களும் நன்கு ஆறிய பின்னர், மிக்சர் ஜாரில் சேர்த்து, மென்மையான பவுடராக அரைத்துக் கொள்ளவும்.
அடுத்ததாக, ஒரு வாணலியில் சிறிது சமையல் எண்ணெய் ஊற்றி சூடானதும், நறுக்கிய கத்திரிக்காய் மற்றும் முருங்கைக்காய் துண்டுகளைச் சேர்த்து நன்கு வதக்கவும். சிறிது நேரம் மூடி வைத்து வேக வைத்தால் காய்கறிகள் விரைவில் மிருதுவாகும்.
காய்கறிகள் சற்று வெந்ததும், நறுக்கிய தக்காளி மற்றும் கீறிய பச்சை மிளகாயை சேர்த்து, தேவையான அளவு உப்பு தூவி நன்கு வதக்கவும். மீண்டும் மூடி வைத்து, மிதமான தீயில் 3 முதல் 4 நிமிடங்கள் வேக வைக்கவும். தக்காளி நன்கு குழைந்து வதங்கியதும், அதில் மஞ்சள் தூள் மற்றும் சாம்பார் தூளைச் சேர்த்து பச்சை வாசனை போக கிளறி விடவும்.
இப்போது, சாம்பாருக்குத் தேவையான அளவு சூடான நீரை ஊற்றி நன்கு கொதிக்க விடவும். இதற்கிடையில், மிக்சர் ஜாரில் துருவிய தேங்காயைச் சேர்த்து, சிறிது நீர் விட்டு மைய அரைத்துக் கொள்ளவும்.
கொதிக்கும் சாம்பாரில், அரைத்து வைத்த பருப்புப் பொடியைச் சேர்த்து கட்டி தட்டாமல் கிளறவும். பின்னர் அரைத்து வைத்த தேங்காய் விழுதை சேர்த்து மீண்டும் கிளறி விடவும்.
சாம்பார் நன்கு கொதிக்க ஆரம்பித்தவுடன், எடுத்து வைத்த புளிச்சாற்றைச் சேர்த்து நன்கு கிளறி, புளியின் பச்சை வாசனை நீங்கும் வரை சில நிமிடங்கள் கொதிக்க விடவும்.
சாம்பார் கொதித்ததும் அடுப்பை அணைத்து இறக்கி வைத்துக் கொள்ளவும். இறுதியாக, மற்றொரு தாளிப்பு வாணலியை அடுப்பில் வைத்து நல்லெண்ணெய் ஊற்றி சூடாக்கவும். அதில் கடுகு, உளுத்தம் பருப்பு சேர்த்து பொரிந்ததும், பொடியாக நறுக்கிய வெங்காயத்தைச் சேர்த்து கண்ணாடி பதத்திற்கு வதக்க வேண்டும். இறுதியாக, ஒரு கொத்து கறிவேப்பிலை சேர்த்து தாளித்து, அதை நேரடியாக சாம்பாருடன் சேர்த்து கிளறினால், சுவையான மற்றும் ஆரோக்கியமான கொள்ளு சாம்பார் தயார்!
Read More : நெருங்கும் தீபாவளி..!! ரயிலில் இந்த பொருட்களை மட்டும் எடுத்துச் செல்லாதீங்க..!! சிறை தண்டனை உறுதி..!!
