வாயில் உள்ள தொற்றுநோய் கிருமிகள், குறிப்பாக பாக்டீரியாக்கள், உடல்நலத்துடன் நேரடி தொடர்புடையவை என்பதனை பல ஆய்வுகள் நிரூபித்துள்ளன. இருப்பினும், வாயில் உள்ள இந்த மைக்ரோப்களின் சரியான சமநிலை உடல்நலத்தை பாதுகாக்க முக்கியமாக கருதப்படுகிறது. இந்தநிலையில், தற்போது வெளியான புதிய ஆய்வு, வாயில் உள்ள பாக்டீரியாக்களில் பன்முகத்தன்மை இல்லாதது மன அழுத்தத்துடன் தொடர்புடையதாக இருக்கக்கூடும் என்பதை வெளிப்படுத்தியுள்ளது. மன அழுத்தம் என்பது ஒரு சிக்கலான மனநலக் குறைபாடு ஆகும். இது நீண்டகாலம் நீடிக்கும் கவலை, நம்பிக்கையின்மை மற்றும் ஒருவருக்கு இன்பம் அளிக்கும் செயல்களில் ஆர்வக்குறைபாடு போன்றவைகளால் அடையாளம் காணப்படுகிறது.
அமெரிக்காவின் NYU Rory Meyers கல்லூரியின் செவிலியர் துறையைச் சேர்ந்த ஆராய்ச்சியாளர்கள் நடத்திய சமீபத்திய ஆய்வில், வாயில் உள்ள மைக்ரோப்களின் (நுண்ணுயிரிகள்) குறைந்த பன்முகத்தன்மை மன அழுத்தத்துடன் தொடர்புடையது என்பதைக் கண்டறிந்துள்ளது. இத்தகைய குறைந்த நுண்ணுயிரிகள், மனநலத்தில் ஏற்படும் மாற்றங்களை பிரதிபலிக்கக்கூடியதாகவும், மன அழுத்தத்தின் ஒரு காரணியாக இருப்பதாக ஆய்வில் தெரிவிக்கப்பட்டுள்ளது.
பாக்டீரியா, வைரஸ்கள் மற்றும் பூஞ்சைகள் உள்ளிட்ட பல்வேறு வகையான நுண்ணுயிரிகள் உடலில் நுழைவதற்கு வாய் தான் முக்கிய காரணமாகும். இந்த நுண்ணுயிரிகள் வாய்வழி ஆரோக்கியத்திலும் ஒட்டுமொத்த நல்வாழ்விலும் முக்கிய பங்கு வகிக்கின்றன.
“வாய்வழி நுண்ணுயிரிக்கும் மனச்சோர்வுக்கும் இடையிலான உறவைப் பற்றி நன்கு புரிந்துகொள்வது மனச்சோர்வுக்கு அடிப்படையான வழிமுறைகளைப் பற்றி அறிய உதவுகிறது. இதுமட்டுமல்லாமல், மனநிலைக் கோளாறுகளுக்கான புதிய உயிரணுக் குறியீடுகள் (biomarkers) அல்லது சிகிச்சை முறைகளை உருவாக்கவும் வழிவகுக்கக்கூடும் என்று NYU ரோரி மேயர்ஸ் நர்சிங் கல்லூரியின் ஆராய்ச்சிக்கான துணை டீனும் ஆய்வின் மூத்த ஆசிரியருமான பெய் வு ஒரு அதிகாரப்பூர்வ வெளியீட்டில் தெரிவித்தார்.
இந்த ஆய்வு BMC ஓரல் ஹெல்த் இதழில் வெளியிடப்பட்டுள்ளது. இந்த ஆய்வை நடத்துவதற்காக ஆராய்ச்சியாளர்கள் நோய்கள் தடுப்பு மற்றும் கட்டுப்பாட்டு மையம் (CDC) மேற்கொண்ட தேசிய ஆரோக்கிய மற்றும் ஊட்டச்சத்து ஆய்வின் (National Health and Nutrition Examination Survey – NHANES) கணக்கெடுப்பு மற்றும் உயிரியல் தரவுகளை ஆராய்ந்தனர்.
18 வயது மற்றும் அதற்கு மேற்பட்ட 15,000 க்கும் மேற்பட்ட அமெரிக்க பெரியவர்களிடமிருந்து தரவைப் பயன்படுத்தி, உமிழ்நீர் மாதிரிகள் மூலம் மனச்சோர்வின் அறிகுறிகளை அளவிடும் கேள்வித்தாள்களை ஆராய்ச்சியாளர்கள் பகுப்பாய்வு செய்தனர். மாதிரிகள் 2009 மற்றும் 2012 க்கு இடையில் சேகரிக்கப்பட்டன. ஆய்வில், வாய்வழி நுண்ணுயிரிகளில் குறைவான பன்முகத்தன்மை கொண்டவர்களுக்கு மனச்சோர்வின் அறிகுறிகள் இருப்பதற்கான வாய்ப்புகள் அதிகம் என்று ஆராய்ச்சியாளர்கள் கண்டறிந்தனர். புகைபிடித்தல், மது அருந்துதல் மற்றும் பல் பராமரிப்பு ஆகியவை வாயில் உள்ள பாக்டீரியாக்களின் அமைப்பை மாற்றக்கூடும்.
“வாய்வழி நுண்ணுயிரி வீக்கம் அல்லது நோயெதிர்ப்பு மண்டலத்தில் ஏற்படும் மாற்றங்கள் மூலம் மனச்சோர்வு அறிகுறிகளை பாதிக்க வாய்ப்புள்ளது. மாறாக, மனச்சோர்வு உணவு உட்கொள்ளல், மோசமான வாய்வழி சுகாதாரம், அதிகரித்த புகைபிடித்தல் மற்றும் குடிப்பழக்கம் அல்லது மருந்துகளின் பயன்பாடு உள்ளிட்ட மாற்றங்களை ஏற்படுத்தும் – இவை அனைத்தும் வாய்வழி நுண்ணுயிரியை மாற்றும் ஆற்றலைக் கொண்டுள்ளன,” என்று வு கூறினார்.
வாய்வழி நுண்ணுயிர் மன ஆரோக்கியத்தை மட்டுமல்ல, அறிவாற்றல் வீழ்ச்சி மற்றும் டிமென்ஷியாவின் தொடக்கத்தையும் எவ்வாறு பாதிக்கிறது என்பதைப் புரிந்துகொள்வதற்காக கூடுதல் ஆராய்ச்சி தேவை என்றும் ஆய்வாளர்கள் தெரிவித்தனர்.
Readmore: ஷாக்!. மலட்டுத்தன்மை அதிகரிக்க Wi-Fi தான் காரணமாம்!. ஜப்பான் ஆய்வில் அதிர்ச்சி தகவல்!
