கடந்த செவ்வாய் கிழமை முதல் நாடு முழுவதும் உள்ள பல விமான நிலையங்களில் குழப்பம் தொடரும் நிலையில், இன்னும் இன்டிகோ விமான சேவையைச் சுற்றி செயல்பாட்டு பிரச்சினைகள் நீடித்து வரும் காரணத்தால், கடந்த 3 நாட்களில் 1,000-க்கும் மேற்பட்ட இண்டிகோ விமானங்கள் ரத்து செய்யப்பட்டுள்ளன.
வெள்ளிக்கிழமை, சமூக வலைதளங்களில் வந்த வீடியோக்கள் மற்றும் புகைப்படங்களில், இண்டிகோ கவுண்டர்களின் முன் நீண்ட வரிசைகள் காணப்பட்டன.
பல பயணிகள் தங்கள் விமானங்கள் தாமதமாவது, ரத்து செய்யப்படுவது போன்ற பிரச்சினைகள் காரணமாக தங்கள் அதிருப்தியை வெளிப்படுத்தினர்..
மொத்தத்தில், விமான ரத்து மற்றும் தாமதங்கள் காரணமாக, விமான நிலையங்களில் பெரும் குழப்பமும், பயணிகளுக்கு சிரமமும் தொடர்கிறது. நேற்று ஒரே நாளில் மட்டும் 500-க்கும் மேற்பட்ட இண்டிகோ விமானங்கள் ரத்து செய்யப்பட்டன.
குறிப்பிடத்தக்க வகையில், வியாழக்கிழமை 550க்கும் மேற்பட்ட சர்வதேச மற்றும் உள்நாட்டு பயணங்களை இண்டிகோ ரத்து செய்தது, இது பலரின் பயணத் திட்டங்களை கடுமையாக பாதித்தது. கடந்த 20 ஆண்டுகளில் ஒரே நாளில் விமான நிறுவனம் பதிவு செய்த அதிகபட்ச விமான ரத்து இதுவாகும்.
குழப்பத்திற்கு என்ன காரணம்?
இண்டிகோ விமான நிறுவனத்தில் பைலட் பற்றாக்குறை காரணமாக தினமும் 25-க்கும் மேற்பட்ட விமானங்கள் ரத்து செய்யப்பட்டு வந்தன. புதிய FDTL (Flight Duty Time Limitations) விதிகள், பைலட்டுகளுக்கு அதிக ஓய்வு நேரம் வழங்குவது, இரவு நேர பறப்புகளை கட்டுப்படுத்துவது, சோர்வைத் தடுப்பது ஆகிய நோக்கங்களுக்காக கொண்டு வரப்பட்டன.
ஆனால், இந்த புதிய விதிகளால், ஒரு நாளில் பைலட்டுகள் இயக்கக்கூடிய விமான எண்ணிக்கை குறைந்துவிட்டது, குறிப்பாக இரவு நேரப் பறப்புகளில். இதுவே ரத்து, தாமதம் போன்ற பிரச்சினைகளை பெரிதும் அதிகரித்துள்ளது.
இதனிடையே, பயணிகள் எதிர்கொள்ளும் சிரமத்தைக் கருத்தில் கொண்டு, பிப்ரவரி 10, 2026 வரை குறிப்பிட்ட FDTL விதிகளிலிருந்து விலக்கு அளிக்குமாறு இண்டிகோ DGCA-விடம் கோரியுள்ளது. இந்த சிக்கலை சரிசெய்ய விமான நிறுவனத்தால் சரியான நடவடிக்கைகள் எடுக்கப்பட்டு வருவதாக விமான ஒழுங்குமுறை அமைப்புக்கு உறுதியளிக்கப்பட்டுள்ளது.
“பாதுகாப்பு வரம்புகளைப் பராமரிக்கும் அதே வேளையில் பயணிகளின் சிரமத்தைக் குறைக்க, பிப்ரவரி 10, 2026 வரை A320 செயல்பாடுகளுக்கான குறிப்பிட்ட FDTL விதிகளிலிருந்து செயல்பாட்டு மாறுபாடுகள்/விலக்குகளை இண்டிகோ கோரியுள்ளது. சரியான நடவடிக்கைகள் நடந்து வருவதாகவும், பிப்ரவரி 10, 2026க்குள் இயல்பாக்கப்பட்ட மற்றும் நிலையான செயல்பாடுகள் முழுமையாக மீட்டமைக்கப்படும் என்றும் இண்டிகோ DGCA-வுக்கு உறுதியளித்துள்ளது,” என்று DGCA தெரிவித்துள்ளது.
பயணத்தில் மேலும் இடையூறுகள்
விமான நிறுவனம் தனது கால அட்டவணையை நிலைப்படுத்த முயற்சிப்பதால், அடுத்த 2-3 நாட்களில் மேலும் பல விமானங்கள் ரத்து செய்யப்படும் என்று இண்டிகோ நிறுவனம் டிஜிசிஏவிடம் தெரிவித்துள்ளது. இந்த அறிவிப்பைத் தொடர்ந்து, டிஜிசிஏ நிறுவனம் விமான நிறுவனத்தை நோக்கி கடுமையான அணுகுமுறையை எடுத்துள்ளது.
தினசரி செயல்பாட்டு இடையூறுகளை ஓரளவு நிர்வகிக்க உதவும் வகையில் டிசம்பர் 8 முதல் விமானங்களின் எண்ணிக்கையைக் குறைப்பதாக இண்டிகோ நிறுவனம் தெரிவித்துள்ளது.
டிஜிசிஏ எச்சரிக்கை
சிவில் விமான போக்குவரத்து அமைப்பான டிஜிசிஏ வரும் நாட்களில் இண்டிகோவின் விமானங்கள், செயல்பாடுகளை மேம்படுத்த எடுக்கப்பட்ட நடவடிக்கைகள் மற்றும் பயணிகளுக்கு வழங்கப்படும் சேவைகளை உன்னிப்பாகக் கண்காணிப்பதாக தெரிவித்துள்ளது. தற்போதைய சூழ்நிலையைப் பயன்படுத்தி டிக்கெட் விலைகளை உயர்த்துவதற்கு எதிராகவும் விமான நிறுவனத்தை எச்சரித்துள்ளது.
சிவில் விமானப் போக்குவரத்து அமைச்சர் ராம் மோகன் நாயுடு நிலைமையை மதிப்பாய்வு செய்து, சிக்கித் தவிக்கும் பயணிகளுக்கு சாத்தியமான அனைத்து உதவிகளையும் வழங்குமாறு விமான நிலையங்களுக்கு அறிவுறுத்தியுள்ளார்..
Read More : Breaking : ரெப்போ ரேட் குறைப்பு.. ரிசர்வ் வங்கி அறிவிப்பு.. கடன் வாங்கியவர்களுக்கு குட்நியூஸ்..!
