உடல்நலக்குறைவு ஏற்படும்போது நாம் எடுக்கும் மருந்துகளின் சீட்டுகளிலும், மருந்து அட்டைகளிலும் இடம்பெறும் சில குறியீடுகள் பலருக்கும் குழப்பத்தை ஏற்படுத்தலாம். ஆனால், இந்தக் குறியீடுகளின் அர்த்தங்களைப் புரிந்துகொள்வது என்பது நாம் தவறான மருந்துகளைத் தவிர்த்து, பாதுகாப்பான முறையில் சிகிச்சை பெறுவதற்கு மிகவும் அவசியமாகும்.
பெரும்பாலானோர் மருத்துவரின் ஆலோசனையின்றி நேரடியாக மருந்துக் கடைகளில் மருந்துகளை வாங்கிச் சாப்பிடுவது வழக்கம். எனினும், மருத்துவ வல்லுநர்கள் எப்போதும் மருத்துவரின் முழுப் பரிசோதனைக்குப் பின்னரே மருந்துகளை எடுத்துக்கொள்ள வேண்டும் என்று வலியுறுத்துகின்றனர்.
சிவப்புக் கோடு மற்றும் ‘Rx’ குறியீட்டின் பொருள் :
மருந்துகளை நாம் வாங்கும் போது, அவற்றின் அட்டைகளின் பின்புறம் சில நேரங்களில் நீங்கள் கவனித்திருக்கக்கூடிய சிவப்பு நிறக் கோடுகள், வெறுமனே வடிவமைப்பிற்காக அச்சிடப்பட்டவை அல்ல. இந்தக் கோடுகள், அந்த மருந்துகள் ஆன்டிபயாட்டிக் (Antibiotic) வகையைச் சேர்ந்தவை என்பதை குறிக்கின்றன. அதாவது, மருத்துவரின் எழுத்துப்பூர்வமான பரிந்துரை (மருத்துவச் சீட்டு) இல்லாமல் இந்தக் குறிப்பிட்ட மருந்துகளை விற்பனை செய்யவோ அல்லது உட்கொள்ளவோ கூடாது என்பதை இது திட்டவட்டமாக உணர்த்துகிறது. அதேபோல, மருந்துகளின் மீது அச்சிடப்பட்டிருக்கும் ‘Rx’ என்ற குறியீடும் மருத்துவரின் ஆலோசனையின்றி மருந்துகளை எடுத்துக்கொள்ளக் கூடாது என்பதையே வலியுறுத்துகிறது.
தீவிர மருந்துகளுக்கான எச்சரிக்கை குறியீடுகள் :
மருந்து அட்டையில் “Schedule H” என்று குறிப்பிடப்பட்டிருந்தால், அந்த மருந்துகளை மருத்துவரின் பரிந்துரை இல்லாமல் பயன்படுத்தவே கூடாது என்று அர்த்தம். இதைவிடக் கடுமையான கட்டுப்பாடுகளுக்கு உட்பட்ட மருந்துகளைக் குறிக்க “Schedule X” என்ற குறியீடு பயன்படுத்தப்படுகிறது. இந்த ‘Schedule X’ மருந்துகள் பொதுவாக, மனநலச் சிகிச்சைகளுக்காக மட்டுமே பயன்படுத்தப்படும் தீவிர மருந்துகள் என்பதைக் குறிக்கும்.
மருந்தளவுக்கான எளிய விளக்கங்கள் :
மருத்துவர்கள் பரிந்துரைக்கும் மருந்துச் சீட்டில், மருந்துகளை எடுத்துக்கொள்ள வேண்டிய நேரத்தையும் அளவையும் குறிக்கும் எளிய குறியீடுகளும் உள்ளன.
1-0-1 : காலை மற்றும் இரவில் ஒரு மாத்திரை எடுத்துக்கொள்ள வேண்டும், மதியம் தவிர்க்க வேண்டும் என்று பொருள்.
OD (Once Daily) : ஒரு நாளைக்கு ஒரு முறை மட்டும் மருந்தை உட்கொள்ள வேண்டும்.
BD (Twice Daily) : ஒரு நாளைக்கு இரண்டு முறை மருந்தை உட்கொள்ள வேண்டும்.
TDS (Thrice Daily) : ஒரு நாளைக்கு மூன்று முறை மருந்தை உட்கொள்ள வேண்டும்.
SOS (Si Opus Sit) : “தேவைப்படும்போது மட்டும்” மருந்தை எடுத்துக்கொள்ள வேண்டும் என்பதை குறிக்கிறது. உதாரணமாக, வலி அல்லது அமிலத்தன்மை (Acidity) அதிகமாக இருக்கும்போது மட்டுமே இந்த மருந்துகளைச் சாப்பிட வேண்டும். இந்த குறியீடுகளைத் தெரிந்துகொள்வது, தவறான மருந்துகளை உட்கொள்வதைத் தவிர்த்து, சரியான நேரத்தில் சரியான அளவில் மருந்துகளை எடுத்துக்கொள்ள உதவுவதோடு, நம் ஆரோக்கியப் பாதுகாப்பை உறுதி செய்யவும் துணைபுரிகிறது.
Read More : பாத்ரூம் தண்ணீர் வெளியேற மாட்டீங்குதா..? வீட்டிலிருக்கும் பொருளை வைத்தே அடைப்பை சரிசெய்யலாம்..!!
