உணவுப் பொருட்கள், காய்கறிகள் மற்றும் பழங்கள் போன்றவற்றை நீண்ட நாட்களுக்குக் கெட்டுப்போகாமல் பாதுகாக்க, இன்று பெரும்பாலான வீடுகளில் குளிர்சாதனப் பெட்டி (ஃப்ரிட்ஜ்) ஒரு அத்தியாவசியப் பொருளாகிவிட்டது. குளிர்ச்சியை வெளியிடுவதன் மூலம் உணவுப் பொருட்களைப் பாதுகாக்கும் ஃப்ரிட்ஜ்கள் சில சமயங்களில் சரியாகக் கூலிங் ஆகவில்லை என்று பலர் புகார் கூறுவதுண்டு. இதற்கு ஃப்ரிட்ஜின் பிரச்சனை மட்டுமின்றி, நாமே செய்யும் சில தவறுகளும் காரணமாக இருக்கலாம் என்று தொழில்நுட்ப நிபுணர்கள் தெரிவிக்கின்றனர்.
காஸ்கெட்டை சரிபார்த்தல் : ஃப்ரிட்ஜ் கதவைச் சுற்றியுள்ள ரப்பர் பட்டையான ‘காஸ்கெட்’-டில் (Gasket) ஏதேனும் சிறிய வெடிப்புகள் அல்லது ஓட்டைகள் இருந்தால், உள்ளே உள்ள குளிர்ச்சி தொடர்ந்து வெளியேறிக் கொண்டே இருக்கும். இதனால் ஃப்ரிட்ஜின் குளிர்ச்சித் திறன் பாதிக்கப்படுவதுடன், மின்சாரமும் அதிக அளவில் செலவாகும். காஸ்கெட் சரியாக ஒட்டிக் கொள்கிறதா என்பதை உறுதி செய்ய வேண்டும்.
கதவுகளை சரியாக மூடாதது : ஃப்ரிட்ஜ் கதவுகளை வேகமாகவும், முறையாகவும் மூடுவது அவசியம். கதவு சிறிது திறந்திருந்தாலும், உள்ளே அதிக வெப்பம் நுழைந்துவிடும். இதனால் தேவையான குளிர்ச்சி சக்தியை உருவாக்க, ஃப்ரிட்ஜ் அதிக ஆற்றலை எடுத்துக்கொள்ளும். இது விரைவிலேயே ஃப்ரிட்ஜ் பழுதடையவும் காரணமாகிவிடும்.
சரியான வெப்பநிலை அவசியம் : ஃப்ரிட்ஜின் செயல்பாட்டை உறுதி செய்ய, சரியான வெப்பநிலையைப் பராமரிப்பது மிக முக்கியம். பொதுவாக, ஃப்ரிட்ஜ் பகுதியின் வெப்பநிலை 4 டிகிரி செல்சியஸாகவும், ஃப்ரீஸரின் வெப்பநிலை 0 டிகிரி செல்சியஸாகவும் இருக்குமாறு அமைத்துக்கொள்வது சிறந்தது.
ஃப்ரீஸரில் பனிக்கட்டியை நீக்குதல் : ஃப்ரீஸர் பகுதியில் படியும் கடினமான மற்றும் அதிக ஐஸ் கட்டிகளை அவ்வப்போது நீக்குவது (டிஃபிராஸ்டிங் செய்வது) மிக முக்கியம். பனிக்கட்டிகள் அதிகமாகப் படியும்போது, அது ஃப்ரிட்ஜை விரைவாகப் பழுதாக்கி, கூலிங் செய்யும் திறனையும் பெருமளவு குறைத்துவிடும்.
பொருட்களை அடைத்து வைக்கக் கூடாது : பெரும்பாலானோர் ஃப்ரிட்ஜில் அதிகப்படியான உணவுப் பொருட்களை நெருக்கிக் கொண்டு அடுக்கி வைக்கின்றனர். இதனால், குளிர்ச்சியான காற்று அனைத்துப் பொருட்களுக்கும் சீராகப் பரவாமல், குளிர்ச்சித் தன்மை குறைய வாய்ப்புள்ளது. எனவே, பொருட்களை வைக்கும்போது நெரிசலாக இல்லாமல், காற்றுப் பரவுவதற்கு ஏற்றவாறு இடைவெளி விட்டு வைக்க வேண்டும்.
