அதிமுக அரசியலில் அதிகாரப் போர் ஒரு முடிவுக்கு வராத நிலையில், முன்னாள் முதல்வர் ஓ.பன்னீர்செல்வத்தின் அரசியல் எதிர்காலம் குறித்த விவாதங்கள் மீண்டும் சூடுபிடித்துள்ளன. அதிமுகவின் கதவுகள் தனக்கு நிரந்தரமாக மூடப்பட்டுவிட்டதையும், எடப்பாடி பழனிசாமி தனது முடிவில் உறுதியாக இருப்பதையும் உணர்ந்துள்ள ஓபிஎஸ் தரப்பு, தற்போது மாற்றுப் பாதைகளை நோக்கி நகர தொடங்கியுள்ளது. இந்தச் சூழலில், ஓபிஎஸ்-ஸின் நிழலாக வலம் வந்த அவரது தீவிர ஆதரவாளர் ஜேசிடி பிரபாகர் விடுத்துள்ள ஒரு பகிரங்க அழைப்பு, தமிழக அரசியல் களத்தில் புதிய புயலை கிளப்பியுள்ளது.
“ஓபிஎஸ் அவர்கள் விரைவில் ஒரு தீர்க்கமான முடிவை எடுக்க வேண்டும்; அவர் நடிகர் விஜய்யின் ‘தமிழக வெற்றிக் கழகத்தில்’ இணைவதுதான் தற்போதைய சூழலில் அவருக்குப் பொருத்தமானதாக இருக்கும்” என ஜேசிடி பிரபாகர் தெரிவித்துள்ளார். அதிமுகவில் தனக்கான அங்கீகாரம் மறுக்கப்பட்ட நிலையில், ஒரு புதிய சக்தியாக உருவெடுத்துள்ள விஜய்யுடன் கைகோர்ப்பது ஓபிஎஸ்-க்கு அரசியல் மறுவாழ்வு அளிக்கும் என்பது பிரபாகரின் கணிப்பாக உள்ளது.
எனினும், தமிழகத்தின் முதலமைச்சராக 3 முறை பதவி வகித்த ஒரு மூத்த அரசியல் தலைவர், திரைத்துறையில் இருந்து அரசியல் களம் புகுந்துள்ள ஒரு இளம் தலைவரின் தலைமையின்கீழ் பணியாற்ற முன்வருவாரா? என்பதே பிரதான கேள்வியாக உள்ளது. விஜய்யின் அரசியல் வருகை இளைஞர்களிடையே ஒரு தாக்கத்தை ஏற்படுத்தியுள்ள நிலையில், ஓபிஎஸ் போன்ற அனுபவம் வாய்ந்த தலைவர்கள் தவெக-வில் இணைந்தால் அது கட்சிக்கு நிர்வாக ரீதியிலான பலத்தை சேர்க்கும் என ஒரு தரப்பினர் கருதுகின்றனர்.
அதேசமயம், ஓபிஎஸ்-ஸை தனது கட்சியில் இணைத்துக்கொள்வது தவெக-வின் ‘மாற்றத்திற்கான அரசியல்’ என்ற பிம்பத்திற்குப் பலம் சேர்க்குமா அல்லது பின்னடைவை ஏற்படுத்துமா என்ற தயக்கம் விஜய் தரப்பிலும் இருக்கலாம் எனப் பேசப்படுகிறது. தனித்துப் போட்டியிடுவதா அல்லது புதிய கூட்டணியில் ஐக்கியமாவதா என்ற இக்கட்டான நிலையில் இருக்கும் ஓ.பன்னீர்செல்வம், தனது ஆதரவாளர்களின் விருப்பத்தை விஜய் ஏற்றுக்கொள்வாரா அல்லது தனது அரசியல் அனுபவத்தை வைத்துப் புதிய வியூகம் அமைப்பாரா என்பது வரும் நாட்களில் தெரியவரும்.
