இருள் விலகி ஒளி பிறக்கும் உன்னத இரவான மகா சிவராத்திரி, சிவபெருமானின் அருளைப் பெற்று நமது கர்மவினைகள் மற்றும் பாவங்களிலிருந்து விடுபடுவதற்குரிய மிகச் சிறந்த நாளாகப் போற்றப்படுகிறது. சிவபெருமான் லிங்கத் திருமேனியாகத் தோன்றி அருள்பாலித்ததும், அன்னை பார்வதி தேவியை அவர் மணம் புரிந்ததும் இந்தத் திருநாளில் தான் என்று புராணங்கள் கூறுகின்றன. இத்தகைய தெய்வீக ஆற்றல் மிக்க நாளில் சிவ-சக்தி வழிபாட்டை மேற்கொள்வது இல்லத்தில் மகிழ்ச்சியையும், செல்வ வளத்தையும் நிலைநாட்டும் என்பது பக்தர்களின் அசைக்க முடியாத நம்பிக்கை.
2026-ஆம் ஆண்டிற்கான மகா சிவராத்திரி விழா வரும் பிப்ரவரி 15-ஆம் தேதி ஞாயிற்றுக்கிழமை அன்று கோலாகலமாக கொண்டாடப்பட உள்ளது. அன்று மாலை தொடங்கி பிப்ரவரி 16-ஆம் தேதி அதிகாலை வரை, தமிழகத்தில் உள்ள அனைத்துச் சிவாலயங்களிலும் நான்கு கால பூஜைகள் மிகச் சிறப்பாக நடைபெறவுள்ளன. கோடிக்கணக்கான பக்தர்கள் இரவு முழுவதும் கண்விழித்து, விரதமிருந்து ஈசனைத் துதிக்கும் இந்த நன்னாளில், நீண்ட நாட்களாகத் திருமணம் கைகூடாமல் தவிப்பவர்களுக்காக ஒரு விசேஷ வழிபாட்டு முறையை ஆன்மீகப் பெரியோர்கள் பரிந்துரைக்கின்றனர்.
திருமணத் தடைகள் நீங்க வேண்டும் என்று விரும்புவோர், மகா சிவராத்திரி அன்று சிவபெருமானுக்கும் பார்வதி தேவிக்கும் மனதாரப் பூஜைகள் செய்து, தங்கள் கரங்களால் மஞ்சளை அவர்களது திருவடிகளில் சமர்ப்பித்து வேண்டிக்கொள்ள வேண்டும். அதேபோல், திருமண வாழ்க்கையில் கருத்து வேறுபாடுகளால் பிரிந்து வாழும் தம்பதியரும் இந்த எளிய வழிபாட்டை செய்வதன் மூலம் மீண்டும் இணைந்து வாழும் சூழல் உருவாகும். மகா சிவராத்திரி இரவு முழுவதும் சிவ மந்திரங்களை உச்சரித்துக் கொண்டே இந்த வேண்டுதலை வைப்பது, ஜாதக ரீதியான தோஷங்களை அகற்றி மனதிற்கு இனிய வாழ்க்கைத் துணையை அடைய வழிவகுக்கும்.
வழிபாட்டுடன் சேர்த்து, அன்றைய தினம் சிவனடியார்களுக்கு அல்லது தேவையுள்ள இரண்டு பேருக்காவது அன்னதானம் செய்வது மிகச்சிறந்த பலன்களைத் தரும். சாஸ்திரங்களின்படி, ஒருவரது ஜாதகத்தில் கிரக அமைப்புகளால் ஏற்படும் தடைகளை உடைக்கும் சக்தி அன்னதானத்திற்கு உண்டு. எனவே, அபிஷேகப் பொருட்களைத் தானமாக வழங்குவது மற்றும் பசித்தோருக்கு உணவிடுவது போன்ற புண்ணிய காரியங்களை மகா சிவராத்திரியில் மேற்கொள்வதன் மூலம், ஒருவரது வாழ்வில் உள்ள அனைத்துத் துன்பங்களும் விலகி மகிழ்ச்சியான எதிர்காலம் அமையும் என்பது உறுதி.
