இந்தியாவில் ஆங்காங்கே காணப்பட்ட உடல் பருமன் பிரச்சனை தற்போது ஒரு தேசிய சவாலாக உருவெடுத்துள்ளது. அண்மையில் மத்திய சுகாதார மற்றும் குடும்ப நலத் துறையால் வெளியிடப்பட்ட தேசிய குடும்ப நல ஆய்வறிக்கையின் புள்ளி விவரங்களும் இதை உறுதிப்படுத்துகின்றன.
நாட்டின் மக்கள் தொகையில் 20%-க்கும் மேற்பட்டோர் உடல் பருமன் பிரச்சனையால் அவதிப்பட்டு வருகின்றனர் என்று அந்த அறிக்கை சுட்டிக்காட்டுகிறது. விரிவான தகவல்களின்படி, நாடு முழுவதும் 24 விழுக்காடு பெண்களும், 23 விழுக்காடு ஆண்களும் உடல் பருமனுடன் இருப்பதாக தெரிய வந்துள்ளது.
இந்த அளவுக்குப் பாதிப்பு இருக்கும்போது, அதற்கான மருந்துகள் இல்லையா என்ற கேள்வி எழலாம். சந்தையில் மருந்துகள் இருந்தாலும், அவை இந்தியாவில் அதிக அளவில் விற்பனையாவதில்லை என்று மருந்து நிறுவனங்கள் கூறுகின்றன. இதற்கு கடுமையான பக்க விளைவுகளும் அதிக செலவும் முக்கியக் காரணங்கள்.
பக்க விளைவுகள் : உடல் பருமன் மருந்துகளைப் பயன்படுத்தும்போது வாந்தி, மயக்கம், வயிறு மற்றும் குடல் கோளாறுகள் போன்ற பக்கவிளைவுகள் ஏற்படுகின்றன. மருந்துகளைப் பயன்படுத்திப் பழகிய பின் நிறுத்தினால், மீண்டும் எடை அதிகரிக்கும் அபாயமும் உள்ளது.
அதிக செலவு : எடை குறைப்புக்கான மருந்துகளுக்கு மாதந்தோறும் ரூ.15,000 வரை செலவு ஆகிறது. இந்த அதிக செலவு மற்றும் பக்கவிளைவுகள் காரணமாகவே மக்கள் இந்தப் பிரிவின் மருந்துகளைத் தவிர்த்து விடுகின்றனர்.
உலக சுகாதார நிறுவனம் டென்மார்க்கில் மேற்கொண்ட கணக்கெடுப்பின்படி, எடை குறைப்புக்காக மருந்தை எடுத்துக் கொண்டவர்களில் 50% பேர் ஓராண்டுக்குள் மருந்தைப் பாதியில் நிறுத்திவிட்டது தெரியவந்துள்ளது.
மருத்துவர்கள் கொடுக்கும் தீர்வு : உடல் எடையைக் குறைப்பதற்கு மருந்துகளை மட்டுமே நம்பியிருப்பது சரியான தீர்வு அல்ல. உடல் எடையை குறைப்பதற்கான மருந்துகள் ஒரு வகையில் உதவிக்கு மட்டுமே பயன்படும். ஆனால், நீடித்த பலன் பெற உணவுக் கட்டுப்பாடு மற்றும் உடற்பயிற்சி ஆகியவற்றை மன உறுதியுடன் வாழ்நாள் முழுவதும் மேற்கொள்ள வேண்டும்.
உடல் நலம் என்பது ஒரே நாளில் கிடைத்துவிடும் ஒரு விடயம் அல்ல; அது ஒரு நீண்ட காலப் பயணம் என்றும், இந்தப் பயணத்தில் உடற்பயிற்சி செய்வது கட்டாயமானது என்றும் மருத்துவர்கள் அறிவுறுத்துகின்றனர்.
