தமிழகத்தில் 2026-ஆம் ஆண்டு சட்டமன்ற தேர்தல் களம் நெருங்கி வரும் சூழலில், அரசியல் கட்சிகள் தங்களது பலத்தை நிரூபிக்க இப்போதே தயாராகி வருகின்றன. ஆளுங்கட்சியான திமுக மற்றும் எதிர்க்கட்சியான அதிமுக ஆகிய இரு பெரும் கட்சிகளுமே மாற்றுக் கட்சி நிர்வாகிகளையும், தொண்டர்களையும் தங்கள் பக்கம் ஈர்ப்பதில் தீவிரமான போட்டியில் இறங்கியுள்ளன. இந்த முறை எப்படியாவது ஆட்சி கட்டிலில் அமர வேண்டும் என்ற முனைப்பில் உள்ள அதிமுக, பாஜக உடனான கூட்டணி பலத்துடன் புதிய தேர்தல் வியூகங்களை வகுத்து வருகிறது.
அதன் ஒரு பகுதியாக, தமிழகம் முழுவதும் மாற்றுக் கட்சியினரை அதிமுகவில் இணைக்கும் படலம் மிக வேகமாக நடைபெற்று வருகிறது. இந்நிலையில், கடலூர் மாவட்டம் புவனகிரி சட்டமன்றத் தொகுதியில் அதிமுக தனது பலத்தை நிரூபிக்கும் வகையில் ஒரு மாபெரும் இணைப்புக் கூட்டத்தை நடத்தியது. இதில் பல்வேறு கட்சிகளைச் சேர்ந்த 500-க்கும் மேற்பட்ட தொண்டர்கள் மற்றும் நிர்வாகிகள் தங்களை அதிமுகவில் இணைத்துக் கொண்டனர்.
அதிமுகவின் முக்கியப் பிரமுகரும், நாடாளுமன்ற உறுப்பினருமான சி.வி. சண்முகம் முன்னிலையில் இந்த நிகழ்ச்சி நடைபெற்றது. அதிமுகவில் இணைந்த அனைவருக்கும் அவர் கட்சியின் அடையாள துண்டை அணிவித்து, உற்சாகமாக வரவேற்றார். தேர்தல் நெருங்கும் வேளையில், அடிமட்ட தொண்டர்களைத் திரட்டுவது தங்களுக்குப் பெரும் சாதகமாக அமையும் என அக்கட்சியினர் கூறி வருகின்றனர்.
