மத்தியப் பிரதேசம் மாநிலம் காண்ட்வா நகரில் அடக்கம் செய்யப்பட்ட பெண்களின் கல்லறைகளை தோண்டி, சடலங்களை சிதைக்கும் அருவருப்பான சம்பவம் வெளிச்சத்துக்கு வந்துள்ளது. சில தினங்களுக்கு முன்பு, காண்ட்வாவில் கல்லறையில் அடக்கம் செய்யப்பட்ட ஒரு பெண்ணின் உறவினர்கள் மத சடங்குகளை செய்வதற்காக வந்தபோது, கல்லறை திறந்த நிலையில் இருப்பதைப் பார்த்து அதிர்ச்சி அடைந்தனர்.
அதேபோல, அருகே இருந்த மற்றொரு புதிய கல்லறையும் இதே நிலையில் இருப்பதை கண்டறிந்து, உடனடியாக காவல் நிலையத்துக்குத் தகவல் கொடுத்தனர். இதையடுத்து, விரைந்து வந்த காவல்துறையினர் அப்பகுதியில் உள்ள சிசிடிவி காட்சிகளை ஆய்வு செய்தபோது, ஒரு அதிர்ச்சியூட்டும் காட்சி கிடைத்தது.
அதில், முழு நிர்வாணமாக இருந்த இரண்டு இளைஞர்கள் ஒரு கல்லறையை நோக்கி நடந்து சென்றுள்ளனர். பின்னர், சிசிடிவி கேமராவை கண்டதும் அவர்கள் கல்லறையில் இருந்து ஒரு துணியால் உடலை மூடியுள்ளனர். இந்த காட்சிகளை கொண்டு விசாரணை நடத்தியதில், அயூப் கான் என்பவரை காவல்துறையினர் கைது செய்தனர். பின்னர், அவரிடம் நடத்தப்பட்ட விசாரணையில், குற்றத்தை ஒப்புக்கொண்டார்.
இந்தச் சம்பவத்திற்கு 4 மாதங்களுக்கு முன்பு, மே 20 ஆம் தேதி அமாவாசை அன்று, பிரதான கல்லறை உட்பட இரண்டு கல்லறைகளில் 6 கல்லறைகள் இதேபோன்று திறந்திருந்ததாக கூறப்படுகிறது. இந்தச் செயல் தாந்த்ரீக சடங்குகளின் ஒரு பகுதியாக செய்யப்பட்டிருக்கலாம் என்று சந்தேகிக்கப்படுகிறது.
பாதிக்கப்பட்ட குடும்பத்தினர் அளித்த தகவலின்படி, சிதைக்கப்பட்ட அனைத்து கல்லறைகளும் சுமார் 50 வயதுடைய பெண்களுடையவை ஆகும். கல்லறைகள் கால் முனையில் இருந்து தோண்டப்பட்டிருந்தன என்றும், உடல்களை மூடியிருந்த துணிகள் மற்றும் கவசங்களும் சிதைக்கப்பட்டிருந்தன என்றும் குடும்பத்தினர் தெரிவித்தனர். இச்சம்பவம் பெரும் அதிர்ச்சியை ஏற்படுத்தியுள்ளது.
