தங்கள் தடுப்பூசி புதிய மாறுபாடுகளை எதிர்த்து போராட தயாராக இருப்பதாக பாரத் பயோடெக் நிறுவனம் தெரிவித்துள்ளது.
கடந்த சில நாட்களாக ஆசிய நாடுகளில் கோவிட் பரவல் வேகமெடுத்துள்ளது. இந்தியாவிலும் கொரோனா பாதிப்பு எண்ணிக்கை நாளுக்கு நாள் அதிகரித்து வருகிறது. ஜூன் 11 ஆம் தேதி நிலவரப்படி, இந்தியாவில் 7,121 பேருக்கு கோவிட் பாதிப்பு இருப்பது உறுதியாகி உள்ளது.. டெல்லி, குஜராத், கேரளா, மகாராஷ்டிரா மற்றும் மேற்கு வங்காளம் உள்ளிட்ட மாநிலங்களில் தொற்று பரவல் அதிகரித்துள்ளதாக தகவல்கள் தெரிவிக்கின்றன.
JN.1 COVID-19 மாறுபாடு குறித்த அதிகரித்து வரும் கவலைகளுக்கு மத்தியில், இந்திய தடுப்பூசி தயாரிப்பு நிறுவனமான பாரத் பயோடெக், தனது தடுப்பூசி புதிய மாறுபாடுகளை எதிர்த்து போராட தயாராக இருப்பதாக தெரிவித்துள்ளது. இருப்பினும், ஒழுங்குமுறை ஆணையத்தின் ஒப்புதல் கிடைத்தால் மட்டுமே உற்பத்தி மீண்டும் தொடங்கும் என்று கூறியுள்ளது.
பாரத் பயோடெக்கின் நிர்வாக இயக்குனர் சுசித்ரா எல்லா, பிரபல ஆங்கில செய்தி ஊடகத்திற்கு பேட்டியளித்தார்.. அப்போது பேசிய அவர் ” எங்கள் நிறுவனம் தற்போது இருக்கும் சூழ்நிலையை தீவிரமாக கண்காணித்து வருகிறது. எங்கள் தடுப்பூசி வளர்ந்து வரும் மாறுபாடுகளுக்கு ஏற்ப தகவமைப்புத் திறன் கொண்டவை, அவை வளர்ந்து வரும் திரிபுகளுக்கு பதிலளிக்கத் தயாராக உள்ளன என்பதை உறுதி செய்வதில் நாங்கள் உறுதியாக இருக்கிறோம்,” என்று தெரிவித்தார்.
மேலும் “ எங்கள் நிறுவனத்தின் இன்ட்ராநேசல் கோவிட்-19 தடுப்பூசி மேல் சுவாசக்குழாய் பாதுகாப்பு, ஊசிகள் இல்லாமல் செலுத்தும் எளிமை மற்றும் சுற்றும் திரிபுகளுக்கு ஏற்ப மாற்றும் தன்மை ஆகியவற்றை வழங்குகிறது. எங்கள் நிறுவனம் தனது முன்னெச்சரிக்கை கண்காணிப்பு மற்றும் தயார்நிலையை உறுதிப்படுத்துகிறது. நிலைமையை தீவிரமாக கண்காணித்தல் மற்றும் தேவை ஏற்பட்டால் திறம்பட பதிலளிக்க நன்கு நிலைநிறுத்தப்பட்டுள்ளது.” என்று தெரிவித்தார்.
இந்தியாவின் முதல் இன்ட்ராநேசல் கோவிட்-19 தடுப்பூசியான iNCOVACC, பெரியவர்களுக்கு பூஸ்டர் டோஸாக கிடைக்கிறது. ஒவ்வொரு நாசியிலும் சொட்டுகள் செலுத்தப்படும் ஊசி இல்லாத அதன் வடிவமைப்பு, நிர்வாகத்திற்கு பயிற்சி பெற்ற சுகாதார நிபுணர்களின் தேவையை நீக்குகிறது.
ஊசி மற்றும் இன்ட்ராநேசல் கோவிட்-19 தடுப்பூசி தளங்களின் தகவமைப்புத் திறனை அவர் உறுதிப்படுத்தினார். இதுகுறித்து பேசிய அவர் “இருப்பினும், ஒழுங்குமுறை ஆணையத்தின் ஒப்புதல்களைப் பொறுத்து தான் மீண்டும் உற்பத்தியை தொடங்க முடியும். வளர்ந்து வரும் அறிவியல் மற்றும் பாதுகாப்பு தரநிலைகளுடன் ஒத்துப்போகிறது என்பதை உறுதிசெய்ய ஒழுங்குமுறை அமைப்புகளுடன் நெருக்கமான ஒருங்கிணைப்பில் நாங்கள் தொடர்ந்து பணியாற்றுகிறோம்,” என்று கூறினார்.
பூஸ்டர் டோஸ் அவசியமா?
பல நாடுகள் அதிக ஆபத்துள்ள மற்றும் பாதிக்கப்படக்கூடிய மக்கள் பூஸ்டர் டோஸ் தடுப்பூசிகளை போட வேண்டும் என்று பரிந்துரைக்கின்றன. ஆனால் இந்தியாவில் உள்ள நிபுணர்கள் இன்னும் அத்தகைய பரிந்துரையை வெளியிடவில்லை.
தேசிய ஒழுங்குமுறை அமைப்பின் உத்தரவுப்படி மட்டுமே கோவிட்-19 தடுப்பூசி உற்பத்தி மீண்டும் தொடங்கும் என்று சுசித்ரா எல்லா தெளிவுபடுத்தினார். தேவை குறைந்து வருவதால் தடுப்பூசி வீணாகும் அளவையும் அவர் வெளிப்படுத்தினார்: “2022 ஆம் ஆண்டின் தொடக்கத்தில், கோவாக்சின் உற்பத்தி குறைக்கப்பட்ட தேவை மற்றும் வழங்கப்பட்ட கொள்முதல் ஆர்டர்கள் ரத்து செய்யப்பட்டதன் காரணமாக இடைநிறுத்தப்பட்டது. அதைத் தொடர்ந்து, சுமார் 20 கோடி டோஸ் மொத்தமாகவும், கிட்டத்தட்ட 5 கோடி டோஸ் தடுப்பூசிகளை அழித்தோம்.” என்று தெரிவித்தார்.
இதனிடையே கோவிட்-19 பாதிப்பு அதிகரித்து வருவதால் பீதியடைய தேவை இல்லை என்றும், தற்போதைய போக்கை பருவகால காய்ச்சலுடன் ஒப்பிடுவதாகவும் மத்திய சுகாதாரத்துறை வட்டாரங்கள் தெரிவிக்கின்றன. உடனடி தடுப்பூசி தேவையில்லை என்றாலும், கொரோனாவின் அறிகுறிகள் இருந்தால், அடிப்படை முன்னெச்சரிக்கைகள் அறிவுறுத்தப்படுகின்றன. இருமல் அல்லது சளி இருந்தால் மாஸ்க் அணிய வேண்டும். நீரிழிவு, சிறுநீரக நோய் போன்ற இணை நோய்கள் உள்ளவர்கள் இந்தக் காலகட்டத்தில் குறிப்பாக எச்சரிக்கையாக இருக்க வேண்டும் என்று நிபுணர்கள் அறிவுறுத்துகின்றனர்.
இந்தியாவில் தற்போது பூஸ்டர் ஷாட்கள் தேவையில்லை என்றாலும், தற்போதைய மாறுபாடுகளால் ஏற்படும் லேசான, இன்ஃப்ளூயன்ஸா போன்ற நோயைக் கருத்தில் கொண்டு, இந்திய தடுப்பூசி நிறுவனங்களின் தயார்நிலை மிகவும் கடுமையான கோவிட்-19 வகைகள் அல்லது பிற நோய்க்கிருமிகள் தோன்றினால் உதவக்கூடும் என்று நிபுணர்கள் கூறுகின்றனர்.
