வேறு பெண்ணுடன் இருந்ததை தட்டிகேட்ட மனைவியை காரை ஏற்றிக் கொலை செய்ய முயன்ற சினிமா தயாரிப்பாளரை காவல்துறையினர் வலைவீசி தேடி வருகின்றனர்.
பாலிவுட் பட தயாரிப்பாளர் கமல் கிஷோர் மிஸ்ரா. இவர், மும்பை அந்தேரி மேற்கு பகுதியில் தனது குடும்பத்தோடு வசித்து வருகிறார். மிஸ்ரா தான் வசிக்கும் கட்டடத்தின் கார் பார்க்கிங் பகுதியில் இருந்து காரை எடுத்துக்கொண்டு புறப்பட தயாரானார். அப்போது, மிஸ்ராவின் மனைவி அவரை தேடி கார் பார்க்கிங் பகுதிக்கு வந்துள்ளார். பின்னர், மிஸ்ரா காரை எடுத்துக்கொண்டு புறப்படத் தயாரானார். ஆனால், காரில் வேறு ஒரு பெண் இருந்தார். அங்கு வந்த மிஸ்ராவின் மனைவி, காரில் வேறு ஒரு பெண் இருப்பதை பார்த்து தனது கணவருடன் வாக்குவாதத்தில் ஈடுபட்டார். அப்போது, இருவருக்கும் இடையே கடுமையான வாக்குவாதம் ஏற்பட்ட நிலையில், சம்பவ இடத்தில் இருந்து தப்பிச்செல்லும் மனநிலையில் இருந்த மிஸ்ரா காருடன் வேகமாக புறப்பட முயன்றார்.
இதில் மிஸ்ரா மனைவி காரில் அடிபட்டு கீழே விழுந்தார். கீழே விழுந்ததில் மிஸ்ராவின் மனைவிக்கு கை, கால், தலையில் காயம் ஏற்பட்டது. இருப்பினும் சம்பவ இடத்தில் இருந்து மிஸ்ரா காரில் தப்பிச்சென்றுவிட்டார். காயம் அடைந்த அவரது மனைவி இதுகுறித்து அம்போலி போலீஸில் புகார் அளித்தார். இதையடுத்து, சம்பவம் நடந்ததாக கூறப்படும் இடத்தில் பொருத்தப்பட்டு இருந்த கண்காணிப்பு கேமரா பதிவுகளை போலீசார் ஆய்வு செய்தனர். அதில், மிஸ்ராவின் கார் இடித்து அவரது மனைவி கீழே விழுவது தெளிவாக பதிவாகி இருந்தது. அதன் அடிப்படையில் கமல் கிஷோர் மிஸ்ரா மீது போலீஸார் வழக்குப்பதிவு செய்து விசாரித்து வருகின்றனர். இதற்கிடையே, தலைமறைவான மிஸ்ராவை வலைவீசி தேடி வருகின்றனர்.
