ஆந்திர மாநிலத்தைச் சேர்ந்தவர் குமாரசாமி (32). இவர் ஒரு ஐ.டி. நிறுவனத்தில் வேலை செய்து வருகிறார். இவருக்கும் லட்சுமி பிரசன்னா(26) என்பவருக்கும் கடந்த 2012-ஆம் வருடம் திருமணம் நடந்தது. அதன் பின்னர் இவர்கள், சென்னை வேளச்சேரியில் வசித்து வந்தனர். திருமணத்தின்போது குமாரசாமிக்கு வரதட்சணையாக, 100 பவுன் நகை, 5 கிலோ வெள்ளி பொருட்கள், 10 லட்சம் ரூபாய் ரொக்கம் மற்றும் 5 ஏக்கர் நிலம் ஆகியவை கொடுக்கப்பட்டதாக கூறப்படுகிறது.
இந்நிலையில் மேலும் வரதட்சணை கேட்டு மனைவியை குமாரசாமி துன்புறுத்தியுள்ளார். மேலும், மனைவியை வீட்டில் பூட்டி வைத்தும் சித்ரவதை செய்துள்ளார். இதனால் மனமுடைந்த லட்சுமி பிரசன்னா, 7.10.2013 அன்று வீட்டில் தூக்குப்போட்டு தற்கொலை செய்து கொண்டார். இதுபற்றி வேளச்சேரி காவல்துறையினர் வழக்குப் பதிவு செய்து குமாரசாமியை கைது செய்தனர்.
இந்த வழக்கு விசாரணை சென்னையில் இருக்கும் மகளிர் சிறப்பு நீதிமன்ற நீதிபதி முகமது பாரூக் முன்னிலையில் நடந்தது. காவல்துறையினர் தரப்பில் சிறப்பு அரசு வக்கீல் ஆரத்தி பாஸ்கரன் ஆஜராகி வாதாடினார். வழக்கை விசாரித்த நீதிபதி, குமாரசாமி மீதான குற்றச்சாட்டு நிரூபிக்கப்பட்டதாக கூறி அவருக்கு 10 வருடம் சிறை தண்டனையும், 15 ஆயிரம் ரூபாய் அபராதமும் விதித்து தீர்ப்பு கூறினார்.
