கர்நாடக மாநிலம் கல்புர்கி மாவட்டம் சின்சொலி நகரில் உள்ள அரசுப் பேருந்து நிலையத்தில் நேற்று முன்தினம் இரவு மர்ம நபர்கள் சிலர் அரசுப் பேருந்தை திருடி சென்ற சம்பவம் பரபரப்பை கிளப்பியுள்ளது. அரசுப் பேருந்து நிலையத்தில் நிறுத்தி வைக்கப்பட்டிருந்த KA 38 F 971 பதிவு எண் கொண்ட அரசு டவுன் பஸ்ஸை திருடர்கள் திருடிச் சென்றுள்ளனர். இதுதொடர்பான காட்சிகள் பேருந்தில் நிலையத்தில் உள்ள சிசிடிவி கேமராவில் பதிவாகியுள்ளது.
இந்த சம்பவம் குறித்து வழக்குப் பதிவு செய்து விசாரணை மேற்கொண்ட காவல்துறை அதிகாரிகள் நகரை சுற்றியுள்ள அனைத்து சுங்கச் சாவடிகளையும் ஆய்வு செய்த போது, திருடர்கள் சின்சொலி நகரில் இருந்து மிரியானா, தண்டூரா பகுதிகளை கடந்து தெலுங்கானா மாநிலத்திற்கு பேருந்தை கடத்தி சென்றுள்ளது கண்டுபிடிக்கப்பட்டுள்ளது. இதையடுத்து, தெலுங்கானா மாநிலத்திற்கு விரைந்த தனிப்படை போலீசார், பேருந்தை திருடிச் சென்ற திருடர்களை பிடிக்கும் முயற்சியில் தீவிரம் காட்டிவருகின்றனர்.
