நடிகர் விஜய்யால் தொடங்கப்பட்ட ‘தமிழக வெற்றிக் கழகம்’, தற்போது தேர்தல் நெருங்கும் வேளையில் கடுமையான உட்கட்சி பூசல்களைச் சந்தித்து வருகிறது. கடந்த 10-ஆம் தேதி சென்னையில் நடைபெற்ற மாவட்ட செயலாளர்கள் கூட்டத்தில் நிலவிய அசாதாரண சூழல், கட்சியின் எதிர்கால ஒற்றுமை குறித்த பெரும் கேள்விகளை எழுப்பியுள்ளது. குறிப்பாக, கட்சியின் பொதுச்செயலாளர் புஸ்ஸி ஆனந்த் மேற்கொண்ட சில அதிரடி அறிவிப்புகள், பல மாவட்ட நிர்வாகிகளின் தேர்தல் கனவில் இடியை பாய்ச்சியுள்ளது.
இந்தக் கூட்டத்தில் பேசிய புஸ்ஸி ஆனந்த், ஒரு சில குறிப்பிட்ட மாவட்டங்களின் பெயர்களை நேரடியாக சுட்டிக்காட்டி, அங்கிருக்கும் தற்போதைய நிர்வாகிகளுக்கு வரும் சட்டமன்ற தேர்தலில் போட்டியிட வாய்ப்பு வழங்கப்படுவது கடினம் என திட்டவட்டமாக தெரிவித்ததாக கூறப்படுகிறது. “சீட் கிடைக்காவிட்டாலும் தளபதியின் வெற்றிக்காக தொய்வின்றி உழைக்க வேண்டும்” என அவர் முன்வைத்த கோரிக்கை, பல ஆண்டுகளாக விஜய்க்காக களப்பணியாற்றி வரும் மாவட்ட செயலாளர்களிடையே கடும் அதிருப்தியை ஏற்படுத்தியுள்ளது. தங்களை வெறும் உழைக்கும் வர்க்கமாக மட்டுமே தலைமை பார்க்கிறதோ என்ற ஆதங்கம் அவர்களிடம் எழுந்துள்ளது.
இந்த திடீர் அறிவிப்பால் மனமுடைந்த சில முக்கிய மாவட்ட செயலாளர்கள், கட்சியில் தொடர்ந்து நீடிப்பதா அல்லது மாற்றுப் பாதையை தேடுவதா என்ற ஆலோசனையில் இறங்கியுள்ளதாக தகவல்கள் கசிகின்றன. தங்களின் உழைப்பிற்கு அங்கீகாரம் கிடைக்காத இடத்தில் நீடிப்பதில் அர்த்தமில்லை என கருதும் சிலர், மற்ற திராவிடக் கட்சிகளுடன் ரகசியப் பேச்சுகளை தொடங்கிவிட்டதாகவும் அரசியல் வட்டாரங்கள் தெரிவிக்கின்றன.
