இந்தியாவின் மிகப்பெரிய தனியார் துறை வங்கிகளில் ஒன்றான எச்டிஎஃப்சி (HDFC Bank), தனது சேமிப்புத் திட்டங்களில் ஒன்றான நிலையான வைப்புத் தொகை (Fixed Deposit) வட்டி விகிதங்களைக் குறைப்பதாக அறிவித்துள்ளது. இந்திய ரிசர்வ் வங்கி (RBI) தனது வட்டி விகிதத்தை (Repo Rate) 5.50 சதவீதத்தில் இருந்து 5.25 சதவீதமாக குறைத்ததை தொடர்ந்து, நாட்டின் நிதிச் சந்தையில் ஏற்பட்டுள்ள மாற்றங்களுக்கு ஏற்ப எச்டிஎஃப்சி வங்கியும் இந்த முடிவை எடுத்துள்ளது.
நாட்டின் பொருளாதாரம் வலுவாக இருப்பதாலும், விலைவாசி உயர்வு (Inflation) கட்டுக்குள் இருப்பதாலும் ரிசர்வ் வங்கி இந்த வட்டி குறைப்பு நடவடிக்கையை மேற்கொண்டுள்ளது. இது வரும் டிசம்பர் 17, 2025 முதல் அமலுக்கு வருகிறது. முக்கியமாக, நடுத்தர கால முதலீடுகளான 18 மாதங்கள் முதல் 21 மாதங்கள் வரை முதலீடு செய்யப்படும் தொகைகளுக்கான வட்டி விகிதங்கள் கணிசமாக குறைக்கப்பட்டுள்ளன.
சாதாரண முதலீட்டாளர்களுக்கு இதுவரை 6.60 சதவீதமாக வழங்கப்பட்டு வந்த வட்டி இனி 6.45 சதவீதமாக குறையும். அதேபோல், மூத்த குடிமக்களுக்கு வழங்கப்பட்டு வந்த 7 சதவீத வட்டி விகிதம் தற்போது 6.60 சதவீதமாக குறைக்கப்பட்டுள்ளது. இதேபோல பாரத ஸ்டேட் வங்கியும் (SBI) தனது வட்டி விகிதங்களை குறைத்துள்ள நிலையில், தனியார் வங்கியான எச்டிஎஃப்சி வங்கியின் இந்த அறிவிப்பு முதலீட்டாளர்கள் மத்தியில் கவலையை ஏற்படுத்தியுள்ளது.
புதிய விதிமுறைகளின்படி, 7 நாட்கள் முதல் 10 ஆண்டுகள் வரையிலான பல்வேறு காலக்கட்டங்களுக்கு வட்டி விகிதங்கள் மாற்றி அமைக்கப்பட்டுள்ளன. உதாரணமாக, ஓராண்டு முதல் 15 மாதங்கள் வரையிலான வைப்பு தொகைகளுக்கு 6.25 சதவீத வட்டியும், 5 ஆண்டுகள் முதல் 10 ஆண்டுகள் வரையிலான நீண்ட கால முதலீடுகளுக்கு 6.15 சதவீத வட்டியும் நிர்ணயிக்கப்பட்டுள்ளது. மூத்த குடிமக்களுக்கு பொதுவான முதலீட்டாளர்களை விட அனைத்துக் காலக்கட்டங்களிலும் 0.50 சதவீதம் கூடுதல் வட்டி வழங்கப்படுகிறது. எனினும், மூத்த குடிமக்களுக்கான இந்தச் சிறப்பு வட்டிச் சலுகை வெளிநாடு வாழ் இந்தியர்களுக்கு (NRI) பொருந்தாது என்பதையும் வங்கி தெளிவுபடுத்தியுள்ளது.
பொதுவாக பாதுகாப்பான முதலீட்டை விரும்புபவர்கள் மற்றும் ஓய்வூதியத்தை மட்டுமே நம்பியிருக்கும் முதியவர்கள் இத்தகைய வங்கி வைப்புத் தொகைகளையே பெரிதும் சார்ந்துள்ளனர். ரிசர்வ் வங்கியின் இந்த வட்டி குறைப்பு நடவடிக்கை வங்கிக் கடன்களுக்கான வட்டியைக் குறைத்துத் தொழில்துறையை ஊக்குவிக்கும் என்றாலும், சேமிப்பாளர்களுக்குக் கிடைக்கும் வருமானம் குறைய வாய்ப்புள்ளது. எனவே, முதலீட்டாளர்கள் தங்களின் நிதித் திட்டங்களை இந்த புதிய வட்டி விகிதங்களுக்கு ஏற்ப மறுபரிசீலனை செய்ய வேண்டியது அவசியம்.
Read More : ரூ.18 சிகரெட் இனி ரூ.72-க்கு விற்பனை..!! அமலுக்கு வருகிறது புதிய விலை..!! மத்திய அரசு தடாலடி உத்தரவு..!!
