கர்நாடக மாநிலத்தில் முதல் ஜிகா வைரஸ் பாதிப்பு கண்டறியப்பட்டுள்ளது. ஜிகா வைரஸ் நோய் பாதிக்கப்பட்ட ஏடிஸ் கொசுக்கள் மூலம் பரவுகிறது, அவை டெங்கு மற்றும் சிக்குன் குனியாவையும் பரப்புகின்றன. இந்த வைரஸ் முதன்முதலில் 1947ஆம் ஆண்டு உகாண்டாவில் பதிவாகியது. இந்த சூழலில் கர்நாடகாவில் முதல் ஜிகா வைரஸ் தொற்று ராய்ச்சூரில் கண்டறியப்பட்டது. கர்நாடக மாநிலம் ராய்ச்சூர் பகுதியில் சேர்ந்த 5 வயது சிறுமிக்கு ஜிகா வைரஸ் பாதிப்பு உறுதி செய்யப்பட்டுள்ளது.
கேரளா, மகாராஷ்டிரா மற்றும் வடமாநிலங்களில் ஜிகா வைரஸ் ஏற்கனவே கண்டறியப்பட்டாலும், அது மாநிலத்திற்குள் நுழையவில்லை. தற்போது, முதன்முறையாக ராய்ச்சூர் மாவட்டத்தில் 5 வயது சிறுமிக்கு ஜிகா வைரஸ் இருப்பது கண்டறியப்பட்டுள்ளது. சிறுமிக்கு கடந்த 15 நாட்களாக காய்ச்சல், வாந்தி, வயிற்றுப்போக்கு ஏற்பட்ட நிலையில், சிந்தனூர் தாலுகா அரசு மருத்துவமனையில் சிகிச்சை பெற்றார். இதையடுத்து, அவருக்கு டெங்கு காய்ச்சல் இருப்பது உறுதி செய்யப்பட்டு விஜயநகரில் உள்ள விம்ஸ் மருத்துவமனைக்கு அனுப்பி வைக்கப்பட்டார். மருத்துவமனை நிர்வாகம் சிறுமியின் 3 மாதிரிகளை புனே ஆய்வகத்திற்கு அனுப்பிய நிலையில், ஜிகா வைரஸ் பாதிப்பு இருப்பது உறுதியானது.
மேலும், அரசு அனைத்து முன்னெச்சரிக்கை நடவடிக்கைகளை மேற்கொண்டு வருவதால் பொதுமக்கள் அச்சப்பட வேண்டாம் என்று அம்மாநில சுகாதாரத்துறை அமைச்சர் சுதாகர் கேட்டுக் கொண்டுள்ளார். அத்துடன் ஜிகா வைரஸ் தொற்று கவனமாக கண்காணிக்கப்பட்டு வருகிறது. ராய்ச்சூர் மற்றும் அண்டை மாவட்டங்களின் சுகாதாரத் துறை அதிகாரிகளுக்கு, ஏதேனும் சந்தேகத்திற்கிடமான தொற்று வழக்குகள் மருத்துவமனைகளில் கண்டறியப்பட்டால், ஜிகா வைரஸ் பரிசோதனைக்கு மாதிரிகளை அனுப்ப தேவையான அறிவுறுத்தல்கள் வழங்கப்பட்டுள்ளதாக அமைச்சர் கூறியுள்ளார்.
