காபி என்பது பலருக்கும் புத்துணர்ச்சி தரும் பானமாக இருக்கலாம். ஆனால், நீங்கள் சில குறிப்பிட்ட நோய்களுக்காக மருந்து உட்கொள்பவர் என்றால், அதே காபி உங்கள் உயிருக்கே ஆபத்தாக முடியலாம் என்கிறார்கள் மருத்துவ வல்லுநர்கள். காபியில் உள்ள ‘காஃபின்’ (Caffeine) சில மருந்துகளுடன் வேதியியல் ரீதியாக வினைபுரிந்து, மருந்தின் வீரியத்தை குறைப்பதோடு மட்டுமல்லாமல், உடலில் தேவையற்ற பக்கவிளைவுகளையும் ஏற்படுத்துகிறது.
இரத்த அழுத்தம் மற்றும் இதய நோய் மருந்துகள் :
இரத்த அழுத்தத்தைக் கட்டுப்படுத்தும் மருந்துகள் இதயத் துடிப்பைச் சீராக்கி, இரத்த நாளங்களின் அழுத்தத்தைக் குறைக்கப் பயன்படுகின்றன. ஆனால், காபியில் உள்ள காஃபின் இதற்கு நேர்மாறாகச் செயல்பட்டு, தற்காலிகமாக இரத்த அழுத்தத்தை அதிகரிக்கச் செய்யும். இதனால் நீங்கள் உட்கொள்ளும் மருந்தின் பலன் இல்லாமல் போய்விடும். எனவே, பிபி (BP) மாத்திரை போடுபவர்கள் காபியைத் தவிர்த்து, மிகக் குறைந்த அளவில் தேநீர் அருந்துவதே பாதுகாப்பானது.
வலி நிவாரணிகள் :
பாராசிட்டமால் மற்றும் ஆஸ்பிரின் போன்ற வலி நிவாரணிகளில் ஏற்கனவே சிறிதளவு காஃபின் கலக்கப்பட்டிருக்கும். இதனுடன் கூடுதலாக நீங்கள் காபி குடித்தால், மருந்துகள் ரத்தத்தில் மிக வேகமாக உறிஞ்சப்படும். இது வயிற்றில் கடுமையான எரிச்சல், புண் அல்லது உட்புற இரத்தப்போக்கை ஏற்படுத்தக்கூடும். மேலும், இது இதயத்திற்கு தேவையற்ற அழுத்தத்தை தந்து படபடப்பை உண்டாக்கும்.
சளி மற்றும் காய்ச்சல் மருந்துகள் :
சளி மருந்துகளில் பொதுவாக ‘சூடோஎஃபெட்ரின்’ (Pseudoephedrine) என்ற தூண்டுதல் பொருள் இருக்கும். காஃபினும் ஒரு வகை தூண்டுதல் என்பதால், இவை இரண்டும் சேரும்போது நரம்பு மண்டலத்தை அதீதமாகப் பாதிக்கும். இதனால் தலைவலி, கை நடுக்கம், தூக்கமின்மை மற்றும் கடுமையான அமைதியின்மை போன்ற பிரச்சனைகள் ஏற்பட வாய்ப்புள்ளது. குறிப்பாக இதயப் பிரச்சனை உள்ளவர்களுக்கு இது மிக ஆபத்தானது.
மன அழுத்த எதிர்ப்பு மருந்துகள் :
மனச்சோர்வு மற்றும் பதட்டத்திற்கு சிகிச்சை பெறுபவர்கள் காபியை தவிர்க்க வேண்டும். காபியில் உள்ள ‘டானின்கள்’ (Tannins) இந்த மருந்துகளுடன் வேதிவினை புரிந்து, உடல் அவற்றை உறிஞ்சுவதைத் தடுக்கின்றன. சில ஆன்டிசைகோடிக் மருந்துகளைக் காபியுடன் சேர்த்து எடுக்கும்போது, அவற்றின் அளவு இரத்தத்தில் 97% வரை அதிகரித்து, தலைச்சுற்றல் மற்றும் மனக்குழப்பத்தை ஏற்படுத்தும் என ஆய்வுகள் எச்சரிக்கின்றன.
தைராய்டு மருந்துகள் :
தைராய்டு பிரச்சனைக்கு ‘லெவோதைராக்ஸைன்’ (Levothyroxine) மாத்திரை எடுப்பவர்கள் காபி குடிப்பதில் மிகுந்த எச்சரிக்கை தேவை. மாத்திரை எடுப்பதற்கு முன்பு காபி குடித்தால், உடல் அந்த மருந்தை உறிஞ்சும் திறன் 50% வரை குறைந்துவிடும். காபி செரிமானத்தை வேகப்படுத்துவதால், மருந்து முழுமையாக வேலை செய்யும் முன்பே சிதைந்துவிட வாய்ப்புள்ளது.
குறிப்பு :
மருந்து உண்பவர்கள் எப்போதும் காபி குடித்த குறைந்தபட்சம் ஒரு மணி நேரம் கழித்தே மருந்துகளை உட்கொள்ள வேண்டும் அல்லது மருத்துவரின் ஆலோசனையைப் பெற வேண்டும்.
