கர்ப்ப காலத்தில் தலைவலி, காய்ச்சல் மற்றும் வலியை நிர்வகிக்க பொதுவாகப் பாதுகாப்பானது என கருதப்படும் பாரசிட்டமால் மாத்திரையை உட்கொள்வது, குழந்தையின் நரம்பியல் வளர்ச்சியில் பாதிப்பை ஏற்படுத்தும் வாய்ப்புகள் உள்ளதாக ஒரு புதிய ஆய்வறிக்கை எச்சரித்துள்ளது.
அமெரிக்காவின் மவுண்ட் சினாய் மருத்துவப் பள்ளியைச் சேர்ந்த ஆராய்ச்சியாளர்கள், 1 லட்சத்திற்கும் மேற்பட்டோரிடம் 46 ஆய்வுகளை மேற்கொண்டு இந்த முடிவுகளை வெளியிட்டுள்ளனர். இந்த ஆய்வறிக்கையின்படி, கர்ப்பிணிகள் உட்கொள்ளும் பாரசிட்டமால் மருந்து நஞ்சுக் கொடி வழியாகக் கருவில் இருக்கும் குழந்தையை அடைந்து, மூளையின் வளர்ச்சிக்கு இடையூறுகளை ஏற்படுத்தக்கூடும் என்று தெரிவிக்கப்பட்டுள்ளது.
இது ஆட்டிசம் மற்றும் கவனக்குறைவு ஹைபராக்டிவிட்டி குறைபாடு போன்ற நரம்பியல் வளர்ச்சிக் கோளாறுகள் வருவதற்கான வாய்ப்பை அதிகரிக்கலாம் என ஆய்வு முடிவு சுட்டிக்காட்டுகிறது. பாரசிட்டமால் நஞ்சுக்கொடியைப் பாதிப்பதோடு மட்டுமல்லாமல், ஆக்ஸிஜனேற்ற அழுத்தத்தைத் தூண்டலாம், ஹார்மோன்களை சீர்குலைக்கலாம் மற்றும் மரபணு நடத்தை மாற்றங்களை ஏற்படுத்தக்கூடும் என்றும் ஆராய்ச்சியாளர்கள் கூறியுள்ளனர்.
மருத்துவர்கள் எச்சரிக்கை :
இது குறித்துப் பேசிய அமெரிக்காவின் மவுண்ட் சினாயில் உள்ள இகான் மருத்துவப் பள்ளியின் உதவிப் பேராசிரியர் டிடியர் பிராடா, “மகப்பேறுக்கு முந்தைய அசிட்டமினோஃபென் வெளிப்பாடு மற்றும் ஆட்டிசம், ADHD அபாயங்களுக்கு இடையேயான தொடர்பைக் காட்டும் உயர்தர ஆய்வுகள் வெளிவர அதிக வாய்ப்புகள் உள்ளன” என்று தெரிவித்தார்.
இருப்பினும், இந்த ஆய்வு பாரசிட்டமால் குழந்தைகளிடம் நேரடியாக நரம்பியல் வளர்ச்சிக் கோளாறுகளை உருவாக்குகிறது என்று உறுதியாகக் காட்டவில்லை. ஆனால், இந்த ஆதாரங்கள் தற்போதைய மருத்துவ நடைமுறைகள் குறித்துக் கவலைகளை எழுப்புகின்றன. எனவே, கர்ப்பிணிகள் பாரசிட்டமால் மாத்திரைகளை மருத்துவர்களின் ஆலோசனையின் பேரில் மட்டுமே, மிகக் குறைந்த அளவில் மற்றும் குறிப்பிட்ட கால இடைவெளியில் எச்சரிக்கையுடன் பயன்படுத்த வேண்டும் என்று ஆய்வாளர்கள் அறிவுறுத்தியுள்ளனர்.
