சென்னை செங்குன்றம் அருகே ஆன்மிகப் பொக்கிஷமாக திகழும் ‘ஞாயிறு’ கிராமத்தில் அமையப்பெற்றுள்ளது அருள்மிகு புஷ்பரதேஸ்வரர் திருக்கோவில். ஒருமுறை பிரம்மதேவர் நடத்திய யாகத்தில் ஏற்பட்ட பிழையினால், சூரிய பகவான் தனது ஒளியை இழந்ததாகவும், இத்தலத்து ஈசனை வழிபட்டு மீண்டும் தனது பிரகாசத்தை மீட்டெடுத்ததாகவும் தல வரலாறு கூறுகிறது. சூரியனே இத்தலத்து இறைவனை நேரில் வந்து வழிபட்டதால், இவ்வூருக்கே ‘ஞாயிறு’ (சூரியன்) என்ற பெயர் நிலைபெற்றுள்ளது.
சூரிய ஓரையில் வழிபாட்டின் அற்புதம் : இத்தலத்தில் ஞாயிற்றுக்கிழமை தோறும் மேற்கொள்ளப்படும் வழிபாடு மிகவும் சக்தி வாய்ந்ததாகக் கருதப்படுகிறது. அதிலும் குறிப்பாக, சூரியனுக்குரிய ‘சூரிய ஓரை’ நேரங்களான காலை 6-7 மணி, மதியம் 1-2 மணி மற்றும் மாலை 6-7 மணி ஆகிய காலங்களில் இறைவனை தரிசிப்பது பெரும் பலன்களை தரும். இந்த விசேஷ நேரங்களில் புஷ்பரதேஸ்வரரை மனமுருகி வேண்டினால், ஜென்ம பாவங்கள் அனைத்தும் விலகி, மோட்சம் கிட்டும் என்பது பக்தர்களின் தீராத நம்பிக்கையாக உள்ளது.
எதிரிகள் தொல்லை நீக்கும் பரிகாரத் தலம் : நமது அன்றாட வாழ்வில் அண்டை வீட்டாரால் ஏற்படும் மனஸ்தாபங்கள், தொழில் போட்டிகள் அல்லது அரசியல் ரீதியான மறைமுக எதிர்ப்புகள் போன்ற இன்னல்களால் அவதிப்படுபவர்களுக்கு இத்தலம் ஒரு சிறந்த தீர்வாக அமைகிறது. கண்ணுக்குத் தெரியாத எதிரிகளால் ஏற்படும் முட்டுக்கட்டைகளைத் தகர்க்கும் அபூர்வ சக்தி இந்த ஆலயத்திற்கு உண்டு. எதிரிகளின் சூழ்ச்சிகளிலிருந்து விடுபட நினைப்பவர்கள், ஞாயிற்றுக்கிழமைகளில் இந்த ஆலய வளாகத்தில் அமர்ந்து ‘ஆதித்ய ஹ்ருதயம்’ ஸ்தோத்திரத்தைப் பாராயணம் செய்வது மிகுந்த பலனைத் தரும்.
வழிபாட்டுப் பலன்கள் : இந்த ஆலயத்திற்கு வந்து இறைவனையும், அங்கிருக்கும் சூரிய பகவானையும் வழிபடுவதன் மூலம் வாழ்வில் ஒளி பிறக்கும் என்பது ஐதீகம். எதிரிகளால் ஏற்படும் அச்சுறுத்தல்கள் மறைந்து, ஒருவிதமான மன அமைதியும், பாதுகாப்பும் கிடைப்பதை இத்தலத்திற்கு வரும் பக்தர்கள் அனுபவப்பூர்வமாக உணர்கின்றனர்.
Read More : பறவைக் காய்ச்சல் பீதி..!! இன்னைக்கு Sunday வேற..!! சிக்கன் சாப்பிடலாமா..? மருத்துவர்கள் பகீர் விளக்கம்..!!
