ரஷ்ய அதிபர் விளாடிமிர் புடின் இன்று பிரதமர் மோடியுடன் தொலைபேசியில் உரையாடினார்.. உக்ரைன் போர் தொடர்பாக அலாஸ்காவில் அதிபர் டிரம்புடனான சந்திப்பு குறித்து அவர் மோடியிடம் பகிர்ந்து கொண்டார்.. அதிபர் புதினுக்கு நன்றி தெரிவிக்கும் அதே வேளையில், ராஜதந்திரம் மற்றும் உரையாடல் மூலம் மோதலுக்கு அமைதியான தீர்வு காண்பதற்கான இந்தியாவின் நிலையான நிலைப்பாட்டை பிரதமர் அடிக்கோடிட்டுக் காட்டினார். இது தொடர்பான அனைத்து முயற்சிகளையும் இந்தியா ஆதரிப்பதாக அவர் மீண்டும் வலியுறுத்தினார்.
இதுகுறித்து தனது எக்ஸ் பக்கத்தில் பிரதமர் மோடி பதிவிட்டுள்ளார்.. அவரின் பதிவில் “ எனது நண்பர் ஜனாதிபதி புடினின் தொலைபேசி அழைப்புக்கும், அலாஸ்காவில் ஜனாதிபதி ட்ரம்ப் உடனான சமீபத்திய சந்திப்பு குறித்து பகிர்ந்து கொண்டதற்கும் நன்றி. உக்ரைன் மோதலுக்கு அமைதியான தீர்வு காண இந்தியா தொடர்ந்து அழைப்பு விடுத்து வருகிறது, மேலும் இது தொடர்பான அனைத்து முயற்சிகளையும் ஆதரிக்கிறது. வரும் நாட்களில் நமது தொடர்ச்சியான பரிமாற்றங்களை எதிர்நோக்குகிறேன்.” என்று குறிப்பிட்டுள்ளார்.
இந்தியாவிற்கும் ரஷ்யாவிற்கும் இடையிலான சிறப்பு மற்றும் சலுகை பெற்ற மூலோபாய கூட்டாண்மையை மேலும் வலுப்படுத்தும் நோக்கில் இருதரப்பு ஒத்துழைப்பின் பல விஷயங்கள் குறித்தும் இரு தலைவர்களும் பேசி கொண்டனர்..
கடந்த இரண்டு வாரங்களில் பிரதமர் மோடி – புடின் இடையிலான 2வது தொலைபேசி உரையாடல் இதுவாகும். ஆகஸ்ட் 8 ஆம் தேதி நடந்த முந்தைய தொலைபேசி அழைப்பில், உக்ரைன் தொடர்பான முன்னேற்றங்கள் குறித்து அதிபர் புதின் பிரதமர் மோடிக்கு விளக்கினார்.
பிரதமர் மோடியுடன் புடின் அழைப்பதற்கு முன்பு, வெளியுறவு அமைச்சகம் ஒரு அறிக்கையில், அமெரிக்க அதிபர் டொனால்ட் டிரம்ப் மற்றும் ரஷ்ய அதிபர் விளாடிமிர் புதின் இடையே அலாஸ்காவில் நடைபெறும் உச்சி மாநாடு சந்திப்பை இந்தியா வரவேற்பதாகக் கூறியது.
“அமைதியை நிலைநாட்டுவதில் அவர்களின் தலைமை மிகவும் பாராட்டத்தக்கது. உச்சிமாநாட்டில் ஏற்பட்ட முன்னேற்றத்தை இந்தியா பாராட்டுகிறது. பேச்சுவார்த்தை மற்றும் ராஜதந்திரம் மூலம் மட்டுமே முன்னோக்கிச் செல்ல முடியும். உக்ரைனில் ஏற்பட்ட மோதலுக்கு விரைவில் முடிவு காண உலகம் விரும்புகிறது,” என்று வெளியுறவுத்துறை செய்தித் தொடர்பாளர் ரந்தீர் ஜெய்ஸ்வால் கூறினார்.
கடந்த வெள்ளிக்கிழமை அலாஸ்காவில் மூன்று மணி நேர பேச்சுவார்த்தைக்காக புடின் டிரம்பை சந்தித்தார். இருப்பினும், இந்த சந்திப்பில், உக்ரைனில் போர்நிறுத்தம் குறித்து எந்த உடன்பாடும் எட்டப்படவில்லை..
இன்று வாஷிங்டனில் உக்ரைன் அதிபர் வோலோடிமிர் ஜெலென்ஸ்கியையும் பல ஐரோப்பிய தலைவர்களையும் டிரம்ப் சந்திக்க உள்ளார். ரஷ்யாவிற்கு எதிரான போரில் ஒரு சமாதான ஒப்பந்தத்தை ஏற்குமாறு ட்ரம்ப் ஜெலென்ஸ்கியிடம் கேட்டுக் கொண்டார், போரை உடனடியாக முடிவுக்குக் கொண்டுவர அவருக்கு அதிகாரம் உள்ளது, இல்லையெனில் அவர் தொடர்ந்து போராடலாம் என்று கூறினார்.
2014 இல் ரஷ்யாவால் இணைக்கப்பட்ட கிரிமியாவை மீட்டெடுப்பதையும், வடக்கு அட்லாண்டிக் ஒப்பந்த அமைப்பில் (நேட்டோ) உக்ரைனைச் சேர்ப்பதையும் அமெரிக்க ஜனாதிபதி நிராகரித்தார்.. இதை தான் ரஷ்யா நீண்ட காலமாக எதிர்த்து வருகிறது என்பது குறிப்பிடத்தக்கது..
