மாநிலங்களவை தேர்தலில் போட்டியிடுவதற்கான வேட்புமனு தாக்கல் இன்று தொடங்குகிறது.
தமிழ்நாட்டில் 6 மாநிலங்களவை எம்பிக்களின் பதவிக்காலம் விரைவில் முடிகிறது. இதனால், மாநிலங்களவை தேர்தல் ஜூன் 19ஆம் தேதி நடைபெறவுள்ளது. அதே நாள் மாலையில் வாக்கு எண்ணிக்கை நடைபெறவுள்ளது. இதில், திமுக 4 மற்றும் அதிமுக இரண்டு இடங்களை இந்த தேர்தலில் பெறும். மாநிலங்களவைக்கான தேர்தல் ஜூன் 19 ஆம் தேதி நடைபெறும், அதே நாளில் மாலை 5 மணிக்கு வாக்கு எண்ணிக்கை நடைபெறும்.
தமிழ்நாட்டில் தற்போது பமகவின் அன்புமணி ராமதாஸ், தொமுச சண்முகம், சந்திரதேகரன், முகமது அப்துல்லா, வில்சன், வைகோ ஆகியோர் மாநிலங்களவை எம்பிக்களாக உள்ளனர். இவர்களின் பதவிக்காலம் தான் ஜூலை 24ஆம் தேதி முடிகிறது. இந்நிலையில், மாநிலங்களவை தேர்தலுக்கான திமுக வேட்பாளர்களாக வில்சன், கவிஞர் சல்மா, எஸ்.ஆர்.சிவலிங்கம் போட்டியிட உள்ளனர். அதேபோல், திமுக சார்பில் மக்கள் நீதி மய்யம் தலைவர் கமல்ஹாசனும் மாநிலங்களவை தேர்தலுக்கு போட்டியிடுகிறார்.
திமுகவுடனான தேர்தல் ஒப்பந்தத்தைத் தொடர்ந்து கமல்ஹாசன் மாநிலங்களவைக்கு தேர்வாகி உள்ளார். கடந்த மக்களவை லோக்சபா தேர்தலில் திமுக கூட்டணியில் மக்கள் நீதி மய்யம் கைகோர்த்தது. அப்போது, 2 லோக்சபா சீட்டும், 1 ராஜ்யசபா சீட்டும் பெற்றுவிட வேண்டும் என கமல்ஹாசன் காய்களை நகர்த்தியிருந்தார். அதன்படியே, தற்போது அவருக்கு வாய்ப்பு வழங்கப்பட்டுள்ளது.
கடந்த மக்களவை தேர்தல் சமயத்தில், ஒரு லோக்சபா சீட் தருகிறோம், உதயசூரியன் சின்னத்தில் நில்லுங்கள் என கமல்ஹாசனிடம் ஆரம்பத்தில் இருந்தே திமுக தலைமை சொல்லி வந்தது. ஆனால், அவர் அதை ஏற்காமல் தனிச் சின்னத்தில் தான் நிற்போம் என ஒற்றை காலில் நின்றார். இந்நிலையில் தான், தற்போது அவருக்கு ராஜ்யசபா எம்பி சீட் வழங்கப்பட்டுள்ளது. இதற்கிடையே, மீண்டும், ராஜ்யசபாவுக்கு செல்ல விருப்பப்பட்ட வைகோவுக்கு வாய்ப்பு வழங்கப்படவில்லை.
அதேபோல், அதிமுக சார்பில் இன்பதுரை, தனபால் ஆகியோர் மாநிலங்களவை எம்பி வேட்பாளர்களாக அறிவிக்கப்பட்டுள்ளனர். இந்த அறிவிப்பை அதிமுகவின் மூத்த தலைவர் கேபி முனுசாமி வெளியிட்டார். மேலும், தேமுதிகவுக்கு அடுத்த ராஜ்யசபா தேர்தலில் இடம் வழங்கப்படும் என்றும் அவர்களுடனான கூட்டணி தொடருவதாகவும் அதிமுக அறிவித்துள்ளது.
