பாட்டாளி மக்கள் கட்சியில், தற்போது ஏற்பட்டுள்ள தந்தை மற்றும் மகனுக்கு இடையேயான அதிகார போர் உச்சகட்டத்தை எட்டியுள்ளது. கட்சியின் தலைமைப் பொறுப்பு மற்றும் பாரம்பரியமான ‘மாம்பழம்’ சின்னம் தொடர்பாக டாக்டர் ராமதாஸ் மற்றும் டாக்டர் அன்புமணி ராமதாஸ் ஆகியோரிடையே நிலவும் மோதல், இப்போது சென்னை உயர் நீதிமன்றத்தின் கதவுகளைத் தட்டியுள்ளது.
கட்சியின் தலைவர் பதவிக்காலம் முடிந்த பின்னரும், அன்புமணி ராமதாஸ் அந்தப் பொறுப்பில் நீடிப்பதாகக் கூறி டாக்டர் ராமதாஸ் தரப்பு போர்க்கொடி தூக்கியுள்ளது. குறிப்பாக, தேர்தல் ஆணையம் மாம்பழ சின்னம் தொடர்பான அதிகாரப்பூர்வ கடிதங்களை அன்புமணியின் முகவரிக்கு அனுப்பியதை எதிர்த்துத் தொடரப்பட்ட வழக்கினை, சென்னை உயர் நீதிமன்ற தலைமை நீதிபதி தலைமையிலான அமர்வு விசாரித்தது.
இந்த விவகாரத்தில் விரிவான விளக்கம் அளிக்குமாறு இந்திய தேர்தல் ஆணையம் மற்றும் டாக்டர் அன்புமணி ராமதாஸ் ஆகியோருக்கு நீதிமன்றம் நோட்டீஸ் அனுப்பியுள்ளது. உட்கட்சி பூசல்கள் தேர்தல் ஆணையத்தின் முடிவுகளில் தாக்கத்தை ஏற்படுத்தக் கூடாது என்றும், முறையான ஆவணங்களைச் சமர்ப்பிக்க வேண்டும் என்றும் நீதிபதிகள் அறிவுறுத்தியுள்ளனர்.
நீதிமன்றத்தில் தாக்கல் செய்யப்பட்ட பிரமாணப் பத்திரத்தில் ராமதாஸ் தரப்பு மிகவும் கடுமையான குற்றச்சாட்டுகளை முன்வைத்துள்ளது. அன்புமணி ராமதாஸ் போலி ஆவணங்களை காட்டி தேர்தல் ஆணையத்தை தவறாக வழிநடத்துவதாகவும், கட்சியின் சட்டதிட்டங்களின்படி அவரது தலைவராக நீடிக்கும் தகுதி 2025 மே மாதத்துடனேயே முடிவுக்கு வந்துவிட்டதாகவும் தெரிவிக்கப்பட்டுள்ளது.
2026-ஆம் ஆண்டு சட்டமன்றத் தேர்தல் நெருங்கி வரும் வேளையில், தலைமை குறித்த இந்தக் குழப்பம் லட்சக்கணக்கான பாமக தொண்டர்களிடையே தேவையற்ற மன உளைச்சலையும், கட்சியின் செயல்பாடுகளில் தொய்வையும் ஏற்படுத்தும் என ராமதாஸ் தரப்பு வாதிட்டுள்ளது.
வன்னியர் சமூகத்தின் பெரும்பான்மை வாக்கு வங்கியைத் தனது பலமாக கொண்டுள்ள பாமகவில், தந்தை – மகன் இடையே வெடித்துள்ள இந்தப் பிளவு தமிழக அரசியல் வட்டாரத்தில் பெரும் அதிர்ச்சியை ஏற்படுத்தியுள்ளது. தந்தைக்கும் மகனுக்கும் இடையிலான இந்த ‘ஈகோ’ யுத்தம், வரும் தேர்தலில் கட்சியின் வெற்றியைப் பாதிக்குமா என்ற கேள்வி எழுந்துள்ளது. தேர்தல் ஆணையம் தாக்கல் செய்யப்போகும் பதில் மனுவும், நீதிமன்றத்தின் இறுதித் தீர்ப்பும்தான் பாமகவின் அடுத்தகட்டத் தலைமையையும், ‘மாம்பழம்’ சின்னம் யாருக்குச் சொந்தம் என்பதையும் தீர்மானிக்கப்போகும் முக்கிய காரணிகளாகப் பார்க்கப்படுகின்றன.
Read More : சிலிண்டர் விலை முதல் பிஎஃப் பணம் வரை..!! மார்ச் 1இல் அதிரடி மாற்றம்..!! முக்கிய அப்டேட்ஸ் இதோ..!!
