மாயமான மலேசிய விமானம் ஞாபகம் இருக்கா? அது ‘கருந்துளையில்’ மூழ்கியதா? முடிவுக்கு வந்த மர்மம்?

மார்ச் 8, 2014 அதிகாலையில், மலேசிய ஏர்லைன்ஸ் விமானம் MH370 கோலாலம்பூரிலிருந்து பெய்ஜிங்கிற்குப் புறப்பட்டது. முதல் 40 நிமிடங்களுக்கு எல்லாம் இயல்பாக தான் தெரிந்தது. பின்னர் 01:19 மணிக்கு இறுதி வானொலி செய்தி வந்தது, முதல் அதிகாரி ஃபரிக் ஹமீத் அமைதியாக, “குட் நைட் மலேசியன் 370” என்று வழங்கினார்.

சில வினாடிகள் கழித்து, போயிங் 777 வியட்நாமிய வான்வெளியைக் கடந்தபோது, ரேடாரில் இருந்து நழுவியது. அதன் பின்னர் அந்த விமானம் மாயமானது.. அதில் 239 பேர் இருந்தனர். அவர்களின் கதி என்னவென்று தெரியவில்லை.

MH370: தொடரும் மர்மம்

மாயமான மலேசிய விமானம் தொடர்பாக கிட்டத்தட்ட 10 ஆண்டுகளாக பல கோட்பாடுகள், தேடல்கள், தவறான குறிப்புகள் வலம் வருகின்றனர்.. எனினும் ஓய்வுபெற்ற டாஸ்மேனியா பல்கலைக்கழக ஆராய்ச்சியாளரான டாக்டர் வின்சென்ட் லைன், இந்த விமானம் இந்தியப் பெருங்கலில் ஒரு கருந்துளையில் மூழ்கி இருக்கலாம் என்று தெரிவித்துள்ளார்.

கடல் தளத்தை வரைபடமாக்கும் GEBCO ஆழ அளவீட்டுத் தரவைப் பயன்படுத்தி, டாக்டர் லைன், ஒரு பிரகாசமான மஞ்சள் பிக்சலைக் கண்டுபிடித்தார்: அட்சரேகை 33.02°S, தீர்க்கரேகை 100.27°E, பெர்த்திற்கு மேற்கே தோராயமாக 1,500 கிலோமீட்டர் தொலைவில் அதை அவர் கண்டுபிடித்தார்… அந்த பிக்சல், செங்குத்தான சரிவுகள், முகடுகள் மற்றும் ஆழமான வண்டல் நிறைந்த துளைகளால் வடுக்கள் நிறைந்த நீருக்கடியில் மலைத்தொடரான ப்ரோக்கன் ரிட்ஜின் கிழக்கு முனையில் 6,000 மீட்டர் ஆழமான குழிக்குள் இருப்பதாக அவர் கூறுகிறார்.

அவர் அதை பினாங்கு தீர்க்கரேகை ஆழமான துளை என்று அழைக்கிறார், மேலும் MH370 இந்த இடத்தில் சென்று மறைந்திருக்கலாம் என்று அவர் நம்புகிறார்.

மேலும் “ப்ரோக்கன் ரிட்ஜ் டயமண்டினா மண்டலத்தை சந்திக்கும் பரந்த கடலில் ஆழமாக மறைந்திருக்கும் ஒரு பிரகாசமான பிக்சல் வெளிப்பட்டுள்ளது, இது முன்னெப்போதும் இல்லாத துல்லியத்துடன் இடிபாடுகளை சுட்டிக்காட்டுகிறது.. எனவே இந்த MH370 விமானம் இந்த இடத்தில் மறைந்திருக்கலாம் ,” என்று லைன் கூறினார்.

MH370 எவ்வாறு விபத்துக்குள்ளானது ?

விபத்து தற்செயலானது அல்ல என்று டாக்டர் லைன் உறுதியாக நம்புகிறார். உலகத்திலிருந்து இடிபாடுகளை மறைக்க வேண்டும் என்பதற்காக, இந்த விபத்து முடிவடைய வேண்டுமென்றே திட்டமிடப்பட்டது என்று அவர் வாதிடுகிறார். “அந்த முன் திட்டமிடப்பட்ட இடம், உடைந்த ரிட்ஜின் கிழக்கு முனையில் மிகவும் ஆழமான 6000 மீட்டர் துளையைக் கொண்டுள்ளது… ஒரு துல்லியமான ‘மறைவு’ இடம்..

இந்த நிலப்பரப்பு, தற்செயலானது அல்ல. ஒரு தடயமும் இல்லாமல் மறைந்து போவதற்கு ஏற்றது. விமானி, இந்த கருந்துளையின் மையத்தில் மோத முயன்றார், ஆனால் அதற்கு பதிலாக விமானம் செங்குத்தான சரிவில் மோதி கீழே விழுந்துள்ளது.. மிகவும் கரடுமுரடான மற்றும் ஆபத்தான கடல் சூழல், குறுகிய செங்குத்தான பக்கங்களைக் கொண்டது. பெரிய முகடுகள் மற்றும் பிற ஆழமான துளைகளால் சூழப்பட்டுள்ளது,” என்று லைன் தெரிவித்தார்..

காணாமல் போன MH370 விமானம்

MH370 வேண்டுமென்றே திசைதிருப்பப்பட்டதாக சந்தேகம் எழுப்பும் முதல் நபர் டாக்டர் லைன் அல்ல. பல நிபுணர்களும் இதே சந்தேகத்தை எழுப்பி உள்ளனர்.. 2024 பிபிசி ஆவணப்படமான Why Planes Vanish: The Hunt for MH370 இல், முன்னாள் விமானப் போக்குவரத்துக் கட்டுப்பாட்டு மேலாளர் Jean-Luc Marchand மற்றும் ஓய்வுபெற்ற விமானி Patrick Blelly ஆகியோர் பேசிய போது “ விமானம் கண்ணுக்கு தெரியாத இடத்தில் மறைந்தது.. இது புத்திசாலித்தனம், ஏனெனில் விமானம் காணாமல் போன பகுதியின் தேர்வு உண்மையில் கோலாலம்பூருக்கும் வியட்நாமுக்கும் இடையிலான ஒரு கருந்துளை. நீங்கள் மறைந்து போக விரும்பினால், இங்கேதான் அதைச் செய்ய வேண்டும்,” என்று கூறினர்..

MH370 விமானம் IGARI வழிப்பாதையைக் கடந்து, மலாய் தீபகற்பத்தின் குறுக்கே பறந்து, மலாக்கா ஜலசந்தி வரை பறந்து, பல்வேறு வான்வெளிகளின் எல்லைகளைத் தாண்டி, கவனிக்கப்படாமல் இருக்க, ஒரு கூர்மையான U-திருப்பத்தை அவர்கள் சுட்டிக்காட்டினர். “இது கவனத்தையும் திறமையையும் கோருகிறது. அதனால் தான் இது ஒரு விபத்து அல்ல என்று நாங்கள் நம்புகிறோம்… ஒரு அனுபவம் வாய்ந்த விமானியால் மட்டுமே இதைச் செய்ய முடியும் என்று நாங்கள் உறுதியாக நம்புகிறோம்,” என்று தெரிவித்தார்..

விமானி ஜஹாரி அஹ்மத் ஷா காரணமா?

மாயமான விமானத்தின் விமானியான கேப்டன் ஜஹாரி அஹ்மத் ஷா நீண்ட காலமாக ஊகங்களின் மையமாக இருந்து வருகிறார். சிலர் இது ஒரு தற்கொலை என்று கூறுகின்றனர். இன்னும் சிலரோ விமானி நிரபராதி என்று நம்புகிறார்கள். 2018 இல் வெளியிடப்பட்ட அதிகாரப்பூர்வ மலேசிய அறிக்கை, விமானம் அதன் போக்கை மாற்ற “மேனுவலாக கையாளப்பட்டது” என்று முடிவு செய்தது, ஆனால் யார் அதனை செய்தது என்பதை குறிப்பிடவில்லை..

MH370: மாயமான துண்டுகள்

MH370 இன் துண்டுகள் என உறுதிப்படுத்தப்பட்ட அல்லது சந்தேகிக்கப்படும் 30 க்கும் மேற்பட்ட துண்டுகள் மொசாம்பிக், மடகாஸ்கர் மற்றும் ரீயூனியன் தீவு போன்ற இடங்களில் கரை ஒதுங்கியுள்ளன. ஆனால் விமானம் ஏன் காணாமல் போனது அல்லது விமான உடற்பகுதி எங்கே உள்ளது என்பதை அவர்களில் யாரும் கூறவில்லை.

2018 ஆம் ஆண்டு ஓஷன் இன்ஃபினிட்டியால் மேற்கொள்ளப்பட்ட தேடல் உட்பட, முந்தைய தேடல் நடவடிக்கைகள் மாயமான விமானத்தை கண்டுபிடிக்கத் தவறிவிட்டன. இந்த ஆண்டின் தொடக்கத்தில், ஓஷன் இன்ஃபினிட்டி இறுதித் தேடலைத் தொடங்கியது. அர்மடா 7806 என்ற கப்பல், பெர்த்திலிருந்து 1,200 மைல் தொலைவில் உள்ள கடல் தளத்தின் புதிய பகுதியைத் தேட பிப்ரவரி மாத இறுதியில் வந்தது.

இந்தப் புதிய தேடல் ““no-find, no-fee” என்ற ஒப்பந்தத்தின் கீழ் நடத்தப்படுகிறது. இதில் வெற்றி பெற்றால், ஓஷன் இன்ஃபினிட்டி 70 மில்லியன் டாலர் வரை சம்பாதிக்க முடியும். அங்கீகரிக்கப்பட்ட மண்டலம் 15,000 சதுர கிலோமீட்டர் பரப்பளவை உள்ளடக்கியது என்று மலேசிய போக்குவரத்து அமைச்சர் அந்தோணி லோக் அறிவித்தார்.

காணாமல் போன 239 பயணிகள் மற்றும் பணியாளர்களின் குடும்பங்கள், விமானம் என்ன ஆனது என்பதை தெரிந்து கொள்ள ஒரு தசாப்தத்திற்கும் மேலாக காத்திருக்கின்றனர்.. ஒருவேளை, டாக்டர் லைன் சொல்லும் கோட்பாடு உண்மையானால், 2014- ம் ஆண்டு மார்ச் 8-ம் தேதி இரவு உண்மையில் என்ன நடந்தது என்பது முழுமையாக தெரியவரும்..