முன்னோக்கி நடப்பது எளிது. ஆனால் பின்னோக்கி நடப்பது உடலுக்கும் மூளைக்கும் ஒரே நேரத்தில் சவால் விடும் செயல். அதில் சமநிலை, கவனம், ஒத்துழைப்பு அனைத்தும் ஒன்றாக இயங்க வேண்டும். அதனால் தான் தினமும் பத்து நிமிடங்கள் பின்னோக்கி நடந்தாலே போதும், அது பல ஆரோக்கிய நன்மைகளை வழங்கும் என நிபுணர்கள் கூறுகின்றனர். அந்த நன்மைகள் என்னென்ன என்பதை இந்த பதிவில் பார்க்கலாம்.
முதுகு வலியிலிருந்து நிவாரணம்: இன்றைய நவீன வாழ்க்கை முறை முதுகு வலியை சாதாரண பிரச்சனையாக மாற்றிவிட்டது. அலுவலகங்களில் மணி கணக்கில் நாற்காலியில் அமர்ந்து வேலை செய்வதும், உடல் இயக்கம் குறைவதும், தவறான உட்காரும் நிலைகளும் முதுகெலும்பில் அதிக அழுத்தத்தை ஏற்படுத்துகின்றன. இதன் விளைவாக பலர் தொடர்ந்து முதுகுவலியால் அவதிப்படுகிறார்கள்.
இத்தகைய சூழலில் வலி குறைக்கும் மருந்துகளை எடுத்துக்கொள்வதற்குப் பதிலாக, பின்னோக்கி நடப்பது நல்லது. முன்னோக்கி நடப்பதை விட பின்னோக்கி நடப்பது, முதுகெலும்பில் ஏற்படும் அழுத்தத்தை குறைத்து, தசைகள் மற்றும் மூட்டுகளை இயற்கையாக சீர்செய்கிறது. இதன் மூலம் முதுகு மற்றும் இடுப்பு தசைகள் வலுவாகி, உடல் தோரணை (posture) மேம்படுகிறது. இதனால் முதுகு வலி மட்டுமல்ல, நீண்ட நேரம் உட்கார்ந்திருப்பதால் ஏற்படும் அசௌகரியமும் குறைகிறது.
முழங்கால்களை வலுப்படுத்துதல்: முன்னோக்கி நடப்பதை விட பின்னோக்கி நடப்பது, முழங்கால்களில் ஏற்படும் அழுத்தத்தை குறைக்கிறது. இதன் மூலம் நரம்புகள் மற்றும் மூட்டுகளில் சுமை குறைவதால் வலி குறையும். மேலும், இது முழங்கால்களை தாங்கும் தொடை மற்றும் தொடை தசைகளை வலுப்படுத்துகிறது. தசைகள் வலுவாகும் போது, மூட்டுகள் இயற்கையாகச் சீராக செயல்படத் தொடங்குகின்றன. நிபுணர்கள் கூறுவதாவது, தினமும் 5 முதல் 10 நிமிடங்கள் பின்னோக்கி நடப்பது, முழங்கால் வலியை தணிப்பதோடு மட்டுமல்லாமல், மீண்டும் வலி வராமல் தடுக்கவும் உதவுகிறது.
சமநிலை மற்றும் ஒருங்கிணைப்பை மேம்படுத்துகிறது: நாம் பின்னோக்கி நடக்கும் போது, வழக்கமான முன்னோக்கி நடைப்போல அல்லாமல், மூளை புதிதாக செயல்படுகிறது. ஒவ்வொரு அடியிலும் உடல் எடை, திசை, தூரம் ஆகியவற்றை கணக்கிட மூளை அதிக கவனம் செலுத்துகிறது. இதனால் உடல் விழிப்புணர்வு (Body Awareness) அதிகரிக்கிறது
மேலும், நமது உள் காது (Inner Ear) மற்றும் மூளை இடையிலான ஒருங்கிணைப்பு (Coordination) மேம்படுகிறது. இது நமது சமநிலையை நிலைநிறுத்தும் திறனை உயர்த்துகிறது. குறிப்பாக வயதானவர்களுக்கு, பின்னோக்கி நடப்பது விழுந்து விடும் அபாயத்தை குறைக்கும் ஒரு சிறந்த வழியாகும் என்று நிபுணர்கள் கூறுகின்றனர்.
எடை குறைப்பவர்களுக்கு நல்லது: முன்னோக்கி நடப்பதை விட பின்னோக்கி நடப்பது சுமார் 30 முதல் 40 சதவீதம் அதிக ஆற்றல் தேவைப்படுகிறது. இதனால் உடலில் கலோரிகள் வேகமாக எரிகின்றன. இந்த நடைபயிற்சி உடலுக்கு புதிய அனுபவமாக இருப்பதால், தசைகள் கூடுதல் முயற்சி எடுக்க வேண்டி வருகிறது. இதுவே உடல் மெட்டபாலிசத்தை (Metabolism) அதிகரிக்கச் செய்து, கொழுப்பு எரிக்கும் வேகத்தையும் உயர்த்துகிறது.
நினைவாற்றலை மேம்படுத்துகிறது: பின்னோக்கி நடக்கும்போது ஒவ்வொரு அடியிலும் கவனம், செறிவு மற்றும் விழிப்புணர்வு தேவைப்படும். இதனால் மூளை செயல்பாடு அதிகரித்து, நினைவாற்றல் மற்றும் ஒருமைப்பாடு மேம்படுகிறது. இது மூளையை எப்போதும் சுறுசுறுப்பாகவும், விழிப்பாகவும் வைத்திருக்கிறது.
அத்துடன், பின்னோக்கி நடப்பது மூட்டு ஆரோக்கியத்துக்கும் பெரும் நன்மை அளிக்கிறது. குறிப்பாக முழங்கால் மற்றும் இடுப்பு பகுதியில் ஏற்படும் அழுத்தத்தை குறைத்து, தசைகள் மற்றும் நரம்புகளை வலுப்படுத்துகிறது. இதன் மூலம் மூட்டுகளில் ஏற்படும் வலி மற்றும் நெரிச்சல் குறைகிறது.
